Te fundit
KPK konfirmon në detyrë një gjyqtar të Krimeve të Rënda dhe një prokuror Apeli
10 Dhjetor 2019, 10:29Kronika
TEMA
Komisioni i Pavarur i Kualifikimit konfirmoi në detyrë të martën gjyqtarin e Gjykatës së Shkallës së Parë për Krimet e Rënda Klodian Kurushi.
Kurushi u vlerësua pozitivisht për figurën dhe profesionalizimin; ndërkohë gjatë seancës dëgjimore Komisioni identifikoi dy gjetje lidhur me disa veprime në përfitimin e një kredie të butë për të cilat gjyqtari dha shpjegime.
Trupa gjykuese që kreu procesin e rivlerësimit për subjektin, e përbërë nga Suela Zhegu kryesuese, Alma Faskaj relatore dhe Lulzim Hamitaj anëtar, gjeti të plota shpjegimet e Kurushit dhe vendosi konfirmimin e tij në detyrë.
Klodian Kurushi ka përfunduar Shkollën e Magjistraturës në vitin 2001 dhe e ka nisur karrierën në drejtësi nga Gjykata e Sarandës. Në nëntor 2005, Kurushi është emëruar gjyqtar i Gjykatës së Krimeve të Rënda, detyrë të cilën vazhdon ta kryejë edhe pas 14 vitesh. Ai është angazhuar gjithashtu në mësimdhënie, si pedagog në Fakultetin e Drejtësisë si dhe ekspert dhe trajnues në Shkollën e Magjistraturës.
Në një vendim tjetër, KPK konfirmoi në detyrë edhe Genti Xholin, prokuror në Prokurorinë e Apelit Tiranë.
Ndërkohë, KPK shkarkoi nga detyra Fatri Islamajn, gjyqtar në Gjykatën e Apelit Tiranë.
Lini një Përgjigje
Më të lexuarat
24 oret e fundit
Javen e fundit
Blog Tema
