Kosova ka nevojë për një konsolidim të brendshëm politik, shoqëror dhe institucional. Dialogu deri tash ishte zhvilluar duke e vënë Kosovën në shërbim të dialogut e jo dialogun në shërbim të Kosovës.

Lajmi se presidenti i Kosovës Hashim Thaçi dhe kreu i PDK-së Kadri Veseli kanë një propozim aktakuze nga Prokurori Special i ka befasuar shumë diplomatë në Bruksel. Jo pse këta janë akuzuar, por mënyra dhe koha se si kjo është bërë publike. Tash ata janë të shqetësuar se si do të rifillojë dialogu.

Por ajo që ndodhi të mërkurën është një “game changer” që thonë në anglisht. Nuk ka nevojë të hymë në analiza të dialogut të deritashëm. Por një gjë është e sigurt: asnjë person nuk i di të gjitha gjërat që kanë ndodhur deri me tash në dialog pos presidentit të Kosovës, Hashim Thaçi. Dhe si rrjedhojë askush nuk di më shumë se ai se në cilin drejtim shkonin planet drejt marrëveshjes përfundimtare, qoftë me ndërmjetësimin e Brukselit apo të Washingtonit. Nuk dihet a ia ka përcjell të gjitha gjërat që kanë ndodhur në këtë proces dikujt tjetër, përfshirë edhe ato që kanë ndodhur në takime “sy me sy”. Tash e ardhmja politike e Thaçit është po ashtu në pikëpyetje sikur edhe pozita e tij si president. E në anën tjetër nuk duket shumë e besueshme se Avdullah Hoti dhe qeveria e tij e kanë pjekurinë e duhur institucionale për ta përfaqësuar Kosovën në një dialog, nëse vërtetë në atë dialog synohet ndonjë marrëveshje “historike”.

Pjesëmarrja e Kosovës në dialog, sikur asgjë nuk ka ndodhur, do të ishte sikur të hysh i lënduar në një ndeshje futbolli dhe atë me kartonë të verdhë e me referin që i jep përparësi kundërshtarit. Kosova tash është përsëri e identifikuar si një vend, prijësit e të cilit po akuzohen për krime lufte dhe krime kundër njerëzimit. E Serbia, ani pse ajo po shndërrohet në shtet autoritar, si një vend me qeveri stabile dhe konstruktive. BE-ja publikisht nuk përmend vërejtjet që i di për Serbinë, siç janë glorifikimi i krimeve të luftës, angazhimi i kriminelëve të dënuar për krime nëpër akademi ushtarake dhe struktura shtetërore dhe mungesën e vullnetin për t’u përballur me të kaluarën. Pa marrë parasysh se çfarë mendon kush, për liderët që mund të akuzohen në Kosovë, është shumë e përfshirë ndjenja e padrejtësisë dhe këtë e ka shtuar vet krijimi i Gjykatës Speciale. Sepse Kosova është i vetmi vend në rajon për të cilin është dashur të krijohet një gjykatë hibride, me seli jashtë vendit për të gjykuar krimet e supozuara edhe pse ka ekzistuar Gjykata e Hagës për Krimet e luftës në ish-Jugosllavi, Gjykata e UMMIK-ut, Gjykata e EULEX-it. Pra të gjitha shteteve tjera u besohet procedimi i krimeve të tilla, por jo edhe Kosovës.

Kosova ka humbur shumë deri me tash e kohëzgjatja e dialogut e ka bërë këtë humbje edhe më të madhe. Po ashtu rezultatet e dialogut kanë qenë të mangëta ndërkohë që ai dialog është shfrytëzuar për të penguar njohjet.

Sjellja e aktorëve politikë në Kosovë muajve të fundit ka qenë shumë kaotike.

Përballja me shumë sfida në të njëjtën kohë e ka keqësuar edhe më shumë atmosferën politike dhe ka thelluar edhe polarizimin në shoqëri.

Është naive të besosh se Kosova ka një unitet dhe stabilitet të duhur për t’u kyçur në dialog.

Nga ana tjetër mund të dalin edhe emra e të akuzuarve tjerë nga Gjykata Speciale. Sepse ajo edhe është krijuar me qëllim të ngritjes së aktakuzave dhe atë në nivelin e lartë të ish-udhëheqësve të UÇK-së.

Në të njëjtën kohë, Kosova po përballet me rritjen dramatike të numrit të të infektuarve nga virusi Korona. E pret një krizë e madhe ekonomike. Edhe në kushte normale dialogu nuk do të mund të ishte prioriteti kryesor. E tash është edhe më pak.

Kosova duhet të kërkojë sa më shpejt një unitet të plotë për dialog. Kosova duhet të mendoj për veten. Të përgatitet dhe të tregojë kur është gati për dialog. Në këtë moment nuk është. Fakti se tash BE-ja është gati sepse ka një të Dërguar të posaçëm, fakti se Beogradi tash është gati sepse Kosova i ka përmbushur kushtet e Presidentit të Serbisë Vuçiq, nuk janë argumente pse Kosova tash duhet të nxitojë për të hyrë në dialog në këto rrethana.

Kosova duhet të jetë sinqertë me miqtë. Duhet t’u tregojë se ka nevojë tash për kohë, për konsolidim të brendshëm, e pastaj do të lajmërohet vetë kur të jetë gati për dialog. Marrë nga Koha.net

3 komente në “Kosova duhet të pezullojë pjesëmarrjen në dialog për pak kohë”

Duhet te jesh realist ti shikoshe problemet pa syze says:

25 Qershor, 2020 15:23 te 3:23 pm

PER TE SHERUAR PLAGET E GENOCIDI SERBE POLITIKA PERDORI TEKNIKEN E ZBUTJES SE GJAKUT DUKE I PREMTUAR KOSOVES NJE PAMVARSI JO REALE THJESHTE PER TE FITUAR KOHE .
SOT NUK FLITET ME PER 25 MIJE GRA TE PERDHUNUARA SHTEPI TE DJEGURA POR VETEM PER KRIME LUFTE NGA UCK SERBIA NGA E AKUZUAR EDHTE KTHYERE NE VIKTIME
KOSOVARET I ZURI GJUMI DHE ENDERONIN TE BEHESHIN ZVICER BILE AS BASHKIM KOMBETARE NUK DONIN KAQ E THELLE ISHTE DOZA SA JETONIN NE NJE BOTE JO REALE .
TANI TE PERGATITEN SHPIRTERISHT PER TE JETUAR EDHE NJEHERE BASHKIM VLLAZERIM NDERZIM ME NENE SERBIN .

Përgjigjjuni
Baliu says:

25 Qershor, 2020 16:11 te 4:11 pm

Ani more, qa ka lidhje, Taqi do ti udheheqe “bisedimet” edhe nga burgu. Burgu asht per “burra” balo.

Përgjigjjuni
Olimpia says:

25 Qershor, 2020 22:52 te 10:52 pm

Shqiperia dhe Kosova duhet thjeshte te kopjojne Serbine dhe Greqine.Vazhdim i marrdhenieve dhe zgjerim me BE dhe SHBA.Por krahas ketyre ,hapja e rruges per kapitalin kinez,turk,arab,japonez koreanojugor, dhe kushdo tjeter qe kerkon te investoje.Marredhenie pragmatike ekonomike me te gjithe,terheqje e kapitalit te kujdo,taksa minimale per biznesin e huaj qe kerkon zona. te lira.Dy duhet te jene objektivat…ringritja e nje industrie te vogel dhe te mesme hi-tech me prodhim mallrash cilesore dhe..nje sistem bankar me profil nderkombetar,ku cdo person,ngado qe te vije,duhet te jete i garantuar per parate e tij.Ndoshta duhet pare edhe kerkesa per futjen ne BE,Duke e zevendesuar kete me pervoje e Zvicres dhe Norvegjise,marrdhenieve te ngushta por jo detyrime ne politiken ekonomike dhe kryesorja ,mosperzjerja ne perplasjet nderkombetare .Jemi kaq te vegjel,nuk duhet te mendojme problemet e botes por tonat.

Përgjigjjuni