Prokurorja shqiptare, që s'tërhiqet as kur e kërcënojnë se do t’i djegin fëmijët e rrëmbejnë burrin

Një vrasje me pagesë, 49 vjet burg, një rrjet kriminal me shtrirje deri në Zvicër – dhe një prokurore e guximshme nga Peja që nuk tërhiqet edhe kur kriminelët e kërcënojnë se do t’i djegin fëmijët. Dhe rrëmbejnë burrin.

Nga Enver Robelli

Nuk e di nëse keni dëgjuar për Valbona Haxhosajn. Me gjasë jo. Në zhurmën e përditshme që e shkaktojnë kacafytjet në parlament dhe kacafytjet nëpër studio televizive, emra të tillë, edhe kur shquhen për heroizëm, në shoqërinë kosovare injorohen. Valbona Haxhosaj është prokurore në Pejë. Grua. Nënë. Qytetare e Kosovës. Juriste. Valbona Haxhosaj është kërcënuar nga një grup kriminal se do t’ia djegin fëmijët nëse nuk tërhiqet nga një lëndë. E kanë kërcënuar se do t’ia kidnapojnë burrin. Valbona Haxhosaj nuk është tërhequr. Nuk është dorëzuar. Grupi kriminal ka provuar të kontaktojë edhe njerëz të politikës dhe udhëheqës të veteranëve të luftës për ta “rregulluar” këtë rast. Prokurorja prapë nuk është dorëzuar.

Dhe Gjykata e Apelit, sipas kallxo.com, e ka vërtetuar vendimin e Gjykatës së Pejës që i kishte shpallur fajtorë pjesëtarët e një grupi prej katër personash për vrasjen e një biznesmeni. Kjo vrasje u krye me pagesë. Porositës i vrasjes ishte një biznesmen tjetër. Ky biznesmen thuhet se ka afërsi me disa emra kumbues nga politika dhe parapolitika. Këta emra kumbues kanë dalë në fotografi me biznesmenin që ka porositur vrasjen. Në fotografi të tre shihen në një jaht dhe duke pirë shampanjë, sipas kallxo.com.

Njëri nga të akuzuarit (tashmë i dënuar) gjatë procesit tha se burrin e prokurores e ka shok të luftës. Tash paramendojeni: këta kërcënojnë edhe familje të atyre që kanë luftuar për çlirimin e Kosovës dhe nuk janë bërë pjesë e mizorive, por duan të mbrojnë rendin e ligjin, siç bëri në ketë rast prokurorja Valbona Haxhosaj! Kjo grua ka treguar heroizëm të pashoq. Dhe ky heroizëm as që është marrë parasysh nga shoqëria. Kallxo.com ka raportuar për kërcënimet. Dhe kjo ngjarje është injoruar.

Nuk është përkrahur kjo prokurore nga zërat publikë, aq më pak është përkrahur nga “analitiçart” që terrorizojnë opinionin me përralla e kërcënime gati çdo mbrëmje. Nuk është përkrahur nga politikanët. Nuk është përkrahur nga partitë. Nuk është përkrahur as nga e ashtuquajtura shoqëri civile. A ka sot heroizëm më të madh se një prokurore që kryen punën e saj dhe me lëndën e saj arrin të bind dy instanca gjyqësore se një grup kriminal, lidhjet e së cilit shtrihen deri në Zvicër, ka vrarë një person me pagesë? Nuk ka heroizëm më të madh. Për fat të keq një pjesë jo e vogël e shoqërisë kosovare i sheh si heronj ata që tentojnë të bëjnë pazare nëpër jahte. Natyrisht me shampanjën e obligueshme.

Shoqëria e Kosovës duhet të solidarizohet, të përkrahë e të bëhet mburojë e prokurorëve si Valbona Haxhosaj sa herë që kryejnë punën për të cilën paguhen nga taksat e qytetarëve. Nëse shoqëria nuk bëhet mburojë e prokurorëve dhe gjykatësve të guximshëm, atëherë shoqëria do të vazhdojë të “habitet” përse ekziston një gjykatë jashtë Kosovës. Ndoshta për shkak se në Kosovë grupet kriminale ndihen aq të fuqishme, saqë mund ta kërcënojnë një prokurore se do t’ia djegin fëmijët. E fëmijët e prokurores, të gjithë fëmijët e Kosovës dhe të gjithë qytetarët e Kosovës duhet të jetojnë të lirë, pa frikë dhe të sigurt se i mbron shteti.

Në zbulimin e këtij krimi një rol të rëndësishëm ka luajtur shteti zviceran. Gjasat janë më të mëdha që një ditë Ambasada e Zvicrës ta dekorojë prokuroren për guximin e saj se sa shoqëria e shteti i Kosovës, përfshirë edhe krerët e saj politikë. Qe, në fund të këtij teksti, edhe një kuriozitet nga gjykimi i grupit kriminal: njëri prej të akuzuarve për vrasjen e biznesmenit të përmendur, i cili ka bashkëpunuar me prokurorinë për zbulimin edhe të kryesve tjerë, erdhi në gjykatë me jelek antiplumb. Edhe kjo flet shumë për sigurinë e dëshmitarëve në Kosovë.

Përgjysmohet numri i rasteve me Covid në Kosovë

20:52 Rajoni

Mali i Zi, nga fitorja në disfatë: Më i infektuari për frymë në rajon

20:07 Rajoni

Cakaj: Drejtësia e luftës së UÇK-së e patjetërsueshme

16:47 Rajoni

Koronavirusi në Serbi: Humbin jetën 11 persona, 351 të infektuar në vetëm 24 orë

16:10 Rajoni

Vuçiç: Do të kemi vaksinën kundër COVID-19 deri në fund të vitit

14:42 Rajoni

Ali Ahmeti: Kryeministri shqiptar ‘është në interesat e Maqedonisë së Veriut’

12:07 Rajoni

INTERVISTA/ John Bolton: Pas idesë së shkëmbimit të territoreve Kosovë -Serbi qëndron këshilltari i Vuçiç, Tony Blair dhe disa europianë. Se di a është paguar

10:23 Rajoni

A do të fillojë Kosova mjekimin e pacientëve me gjakun e të shëruarve nga COVID-19?

09:21 Rajoni

ANALIZA: A kishin të drejtë prokurorët që i bënë publike akuzat ndaj Hashim Thaçit?

17:59 Rajoni

Deputetët shqiptarë i paraqesin Vuçiç 4 kushtet për të qenë pjesë e qeverisë

14:23 Rajoni