Pamjet nga Thethi, ku përplasjet mes banorëve dhe forcave të rendit pasuan shembjen e disa ndërtimeve pa leje, kanë ndezur një debat të vjetër. Në rrjetet sociale u rindezën akuzat për selektivitet, për “shtet që shfaqet vetëm kur ka turistë” dhe për “ligj që bie mbi të dobëtin”. Por e vërteta është më e ndërlikuar dhe më urgjente se kurrë.

Po, aksioni në Theth është i drejtë. Ndërtimi pa leje, qoftë edhe në emër të turizmit, është një plagë që ka shkatërruar natyrën, ka deformuar zonat e mbrojtura dhe ka minuar besimin te shteti. Mbi të gjitha, ka lënë shumicën e shqiptarëve në varfëri ku pronat në tërësi i kanë gëzuar të padrejtët dhe jo trashëgimtarët e tyre. Sot duhet kuptuar se nuk ka turizëm të qëndrueshëm mbi themele të paligjshme. Dhe është një hap pozitiv që qeveria ka vendosur të veprojë me vendosmëri për të ndalur këtë rrënim të heshtur. Thethi nuk është thjesht një fshat i bukur, është një pasuri kombëtare që nuk i përket as një ndërtuesi të caktuar apo ndonjë familjeje.

Por këtu lind edhe pyetja që shumë qytetarë e ngrenë me të drejtë: pse shteti vepron vetëm në zonat turistike, ndërkohë që qindra-mijëra qytetarë në periferitë e qyteteve, në fshatra të harruar apo edhe në lagjet e mëdha urbane, kanë mbi supe barrën e padrejtësive me pronat, prej më shumë se 30 vitesh? Pse askush nuk ndërhyn për t’u kthyer tokat pronarëve të ligjshëm që i kanë fituar vendimet e gjykatave apo janë në pritje, që shohin apo kanë parë për 35 vite sesi pronat e tyre mbushen me ndërtime dhe beton pa asnjë pengesë?

Ajo që mungon në këtë vend nuk është ligji, por një drejtësi e konsistente, që nuk zbatohet sipas sezonit turistik, por sipas parimit se “ligji është i barabartë për të gjithë”. Sot, Shqipëria ka nevojë më shumë se kurrë për një qasje sistematike ndaj çështjes së pronës. Ka nevojë për një gjykatë speciale për pronat, një mekanizëm të dedikuar që të zgjidhë përfundimisht dhjetëra mijëra dosje të bllokuara, të manipuluara ose të vonuara padrejtësisht.

Sepse prona është e shenjtë. Jo vetëm kur ndërtohet pa leje në Theth, por edhe kur zaptuesit marrin tokat e një familjeje në Durrës, në Shkodër apo në Lushnje. Shteti nuk mund të ofrojë vetëm spektakël sezonal, por duhet të jetë një garanci e përditshme.

Aksioni në Theth është një hap në drejtimin e duhur, por nuk duhet të mbetet një përjashtim i bujshëm. Të shembësh një ndërtesë pa leje është e nevojshme, por më e nevojshme është të ndërtosh një sistem ku askujt nuk i lind ideja të ndërtojë pa leje në radhë të parë. Për këtë duhet drejtësi dhe vendime, e jo retorikë. Nëse ky standard do të ndiqet me të njëjtën forcë dhe përkushtim në çdo cep të vendit, atëherë shteti do të fitojë jo vetëm betejën kundër ndërtimeve pa leje, por edhe besimin e një populli të zhgënjyer nga “cirku” me Gjykata, Komisione, Kadastra dhe Aluizna, e që ka pritur shumë gjatë për drejtësi.

3 Komente

s
socialisti i vertete

11 Korrik 2025, 20:48

Thethi nuk eshte thjesht nje fshat i bukur, eshte nje pasuri kombetare qe nuk i perket asnje ndertuesi te caktuar, as nje famile- thote shoku Ardit Rada me siper. Pra sipas Rades dhe Rames Thethi nuk eshte i therhnjaneve , muk eshte i familjeve qe e kane trasheguar brez pas brezi nder shekuj por eshte pasuri kombetare pra e shtetit dhe keshtu shtetit dmth Rames i lind e drejta ti shpronesoje, tu shembe banesat, tu jape copa Thethi investitoreve strategjike, (dhe dihet se kush shpallet investitor strategjike ). Cfare kishte me teper Kushtetuta e vitit 1976, cfare kishte me teper regjimi komunist? Ka vetem nje qellim ne kete histori, rrembimin e pronave, shkaterrimin e bizneseve dhe veshtersimin e jeteses se njerzve te thjeshte me qellim boshatisjen e Shqiperise nga shqiptaret. cfare ka me teper memorandumi i Cubrillovicit per spastrimin etnik te shqiptareve?

Përgjigjjuni
1. P
  Plasmon
  
  11 Korrik 2025, 21:43
  
  E sigurt eshte qe ti kete punen e Thethit e ke me te degjuar neper rrjete sociale. O budalla nuk po mbron njeri investitoret strategjike, por po thote qe ndertimi pa leje duhet trajtuar kudo njesoj. Dhe Thethi nuk eshte i banoreve o injorant, se eshte mal dhe park natyror. Nuk eshte are qe e kane blere stergjysherit e atyre shokeve te tu, edhe sot e kane marre mbrapsht. Se ne Theth nuk mbillet as grure, as perime asgje. Sot qe ka shperthyer ideja e turizmit malor, jane turrir me gjet kufinjte e principatave te kohes se Skenderbeut
  
  Përgjigjjuni
E
E sakte

11 Korrik 2025, 20:48

Ne Shqiperi pushteti vendor eshte pothuajse inexistant dhe ne mase e madhe injorantet e ngaterojne me shtetin. Eshte bashkia qe duhet te ndaloje lypsat trotuareve , qent rrugeve ,te semuret mendore, trotuaret e zene ,koshat e plehrave rruges , kjoskat e shemtuara , fshataret qe shesin dy domate cepave te rruges....... Nuk punone pushteti vendor , me vjen keq qe Rama lodhet me shqiptaret e pa civilizuar. Nje shprehje degjohet ne Shqiperi ( Qéveria e keqe ) . Akoma nuk jane te afte te kuptojne rolin e qeverise dhe ate te bashkise i ngaterojne. Ne Shqiperi thone ky eshte i korruptuar por kur ky personne perfitone ne menyre jo te drejte nuk e konsideron veten te korruptuar . Duhet filluar nga vetja perse ti ndertone ne Theth kur nuk lejohet ?. Nese popullsia do ishte e civilizuar nuk do te ndodhnin épisode te tilla por me nje popullsi te tille dhe nje Berrish qe futi kulture anti ligjin haaa do te duhen 4oo vjet ...

Përgjigjjuni