Te fundit

Hetimi i BBC: Pas sulmit ndaj shtëpisë së Starmer qëndron një rrjet sabotazhi i lidhur me Rusinë

15 Qershor 2026, 22:50Bota TEMA
Hetimi i BBC: Pas sulmit ndaj shtëpisë së Starmer qëndron

Një hetim i BBC ka zbuluar se sulmi me zjarr ndaj një prone të lidhur me kryeministrin britanik Keir Starmer ishte pjesë e një fushate më të gjerë sabotazhi dhe dezinformimi që, sipas gjetjeve të medias britanike, çon deri te operativë të lidhur me shtetin rus.

Në qendër të çështjes ndodhet 22-vjeçari ukrainas Roman Lavrynovych, i cili u shpall fajtor për komplot për zjarrvënie. Sipas hetimeve, ai u rekrutua përmes aplikacionit Telegram nga një person me inicialet “EL”, i cili i premtoi para dhe e udhëzoi për kryerjen e sulmeve.

BBC pretendon se ka identifikuar “EL” si Evgeny Lyukshin, një diplomat rus 23-vjeçar dhe djali i një zyrtari të lartë rus. Sipas medias britanike, Lyukshin ka promovuar mesazhe pro-ruse, ka lavdëruar presidentin Vladimir Putin dhe ka ofruar para e madje shtetësi ruse për persona të gatshëm të kryejnë akte vandalizmi dhe zjarrvënie.

Hetimi zbulon se operativë rusë kanë përdorur rrjete sociale dhe Telegram për të krijuar grupe të rreme të ekstremit të djathtë dhe organizata të tjera të rreme në Britani, me qëllim nxitjen e tensioneve sociale, përçarjes dhe frikës.

Sulmet përfshinin djegien e një makine që më parë kishte qenë në pronësi të Starmer, si dhe sulme ndaj hyrjeve të banesave të lidhura me kryeministrin britanik. Dy persona, Roman Lavrynovych dhe Stanislav Carpiuc, u shpallën fajtorë për komplot për zjarrvënie, ndërsa një i tretë, Petro Pochynok, u shpall i pafajshëm.

Ambasada ruse në Londër ka mohuar çdo lidhje me ngjarjen, duke deklaruar se Rusia nuk përbën kërcënim për Mbretërinë e Bashkuar dhe se nuk ka qëllime agresive ndaj saj.

Sipas BBC-së, rasti konsiderohet një shembull i asaj që ekspertët e sigurisë e quajnë “luftë hibride”, ku operacionet e ndikimit, propaganda dhe sabotazhi përdoren për të destabilizuar shoqëritë perëndimore pa përfshirje të drejtpërdrejtë ushtarake.

Lini një Përgjigje

Më të lexuarat

Blog Tema

Powered by Tomorrow.io