Te fundit
Pentagoni kërkon “armë” kibernetike me AI përballë Kinës, përplasje me kompanitë teknologjike amerikane
27 Shkurt 2026, 16:00Bota
TEMA
Pentagoni po përgatitet për një fazë të re të garës teknologjike me Kinën, duke synuar ndërtimin e mjeteve kibernetike të fuqizuara nga inteligjenca artificiale për të identifikuar dobësitë në infrastrukturën kritike kineze. Sipas një raportimi të Financial Times, Departamenti amerikan i Mbrojtjes ka nisur bisedime me kompani të mëdha të AI për të zhvilluar sisteme që do të mundësojnë zbulim të automatizuar të rrjeteve energjetike, shërbimeve publike dhe rrjeteve të ndjeshme kompjuterike në Kinë dhe vende të tjera rivale.
Qëllimi është i qartë: në rast të një konflikti të mundshëm me Pekinin, SHBA të ketë të hartëzuara paraprakisht dobësitë teknologjike të kundërshtarit, duke i integruar ato në planifikimin ushtarak. Burime me dijeni për planet kanë bërë të ditur për Financial Times se sistemi i propozuar do të përdorë AI për të depërtuar në rrjete kompjuterike, për të identifikuar defekte softuerike dhe për të përzgjedhur objektiva strategjikë.
Shtetet e Bashkuara kanë zhvilluar prej kohësh kapacitete të avancuara të spiunazhit kibernetik, por kjo nismë përfaqëson një hap përtej: automatizim në shkallë të gjerë, me ndërhyrje minimale njerëzore. Një ish-zyrtar i lartë i CIA-s, i cituar nga gazeta britanike, e krahasoi këtë qasje me “hajdutin që provon çdo derë derisa gjen një të hapur”, duke theksuar se AI mund të shumëfishojë në mënyrë eksponenciale numrin e sistemeve të testuara për dobësi.
Raportimi vjen në një moment tensioni mes Pentagonit dhe disa prej kompanive më të mëdha amerikane të inteligjencës artificiale. OpenAI, Anthropic, Google dhe xAI e Elon Musk kanë përfituar kontrata me vlerë rreth 200 milionë dollarë për aplikime ushtarake dhe të sigurisë, por përfshirja e tyre në projektin e ri kibernetik mbetet e paqartë.
Sipas Financial Times, përplasja më e fortë është me kompaninë Anthropic. Sekretari amerikan i Mbrojtjes, Pete Hegseth, ka paralajmëruar se administrata mund të anulojë marrëveshjet ekzistuese nëse kompania refuzon kushtet e bashkëpunimit. Drejtori ekzekutiv i saj, Dario Amodei, ka kundërshtuar përdorimin e modelit Claude në armë autonome vdekjeprurëse dhe në survejim masiv të brendshëm, duke kërkuar kufizime të qarta etike.
Ky debat pasqyron një dilemë më të gjerë në Uashington: si të ruhet avantazhi strategjik ndaj Kinës në fushën e AI, pa e kthyer teknologjinë në një mjet të pakufizuar ushtarak. Një burim i cituar nga Financial Times e përmblodhi logjikën e Pentagonit me fjalët: “Është përdorim pa kufij; nuk mund të kemi pranga kur gjithçka të nisë.”
Në sfond qëndron frika se Kina po ecën shpejt në integrimin e AI në kapacitetet e saj ushtarake dhe kibernetike, ndërsa SHBA kërkon të shmangë një disavantazh strategjik. Në këtë garë të re, inteligjenca artificiale nuk shihet më thjesht si teknologji civile apo ekonomike, por si element kyç i arkitekturës së luftës së së ardhmes.
Raportimi i Financial Times tregon se beteja për epërsinë në AI tashmë ka hyrë në territorin e sigurisë kombëtare dhe se përplasja mes etikës teknologjike dhe interesave ushtarake do të jetë një nga debatet më të forta të viteve në vijim.
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
IA dhe robotē qē luftojn, robotē qē lindin fēmij, robot qē punojn, robot qē llogarisin, ne jemi shumë pas te kjo lloj teknologjie.Na jepet mundēsia tē porosisim nē platformēn shime kukulla silikoni pēr marrdhēnie intime.