Te fundit
“Phonegate” në Britani: Vjedhje apo inskenim? Rasti i telefonit të ish-shefit të stafit të kryeministrit Starmer
6 Prill 2026, 12:10Bota
TEMA
Një rast i pazakontë që po trondit politikën britanike është kthyer në qendër të debatit publik, me analistët që paralajmërojnë se mund të dëmtojë seriozisht kryeministrin Keir Starmer, njësoj siç skandali “partygate” goditi Boris Johnson gjatë pandemisë.
Ngjarja daton në mbrëmjen e 20 tetorit 2025, kur Morgan McSweeney, atëherë shef i stafit të kryeministrit britanik, deklaroi se një çiklist i kishte grabitur telefonin në London, ndërsa po kthehej në këmbë në shtëpi.
Sipas të dhënave të publikuara nga Scotland Yard, incidenti është raportuar zyrtarisht. Megjithatë, detajet e telefonatës kanë ngritur dyshime dhe kanë nxitur teori të shumta, madje edhe lidhje me skandalin e Jeffrey Epstein.
McSweeney raportoi vendndodhjen e gabuar të vjedhjes, duke deklaruar se ngjarja ndodhi në Belgrave Street në lindje të Londrës, në vend të Belgrave Road në Westminster. Si pasojë, policia kërkoi pamjet e kamerave në zonën e gabuar, duke dështuar në sigurimin e provave.
Edhe pse po bëhen përpjekje të reja për të gjetur pamjet, mbetet e paqartë nëse ato ekzistojnë ende, gjashtë muaj pas ngjarjes.
Sipas raportimeve, ai nuk u identifikua si zyrtar i lartë i Downing Street, duke i dhënë policisë një adresë në Skoci dhe jo në Londër. Gjithashtu, sipas gazetës The Telegraph, ai nuk iu përgjigj një telefonate të mëvonshme të policisë për të verifikuar nëse kishte gjurmuar pajisjen përmes sistemit të lokalizimit.
Një sondazh i organizatës More in Common tregon se 74% e qytetarëve besojnë se incidenti mund të jetë inskenuar, ndërkohë që qeveria britanike i ka cilësuar këto si “teori konspirative”.
Sipas kritikëve, një arsye e mundshme për inskenimin e vjedhjes mund të jetë fshehja e mesazheve me bashkëpunëtorin e tij të afërt, Peter Mandelson.
Ky i fundit ishte larguar nga posti i ambasadorit në SHBA një muaj më parë, pas zbulimeve për lidhjet e tij me Epstein. Deputetë britanikë kishin planifikuar të kërkonin publikimin e plotë të komunikimeve mes dy zyrtarëve, për të kuptuar si ishte bërë emërimi i tij.
Një mister që mund të mos zbardhet
Përmbajtja e telefonit të zhdukur mund të mos zbulohet kurrë, pasi raportohet se mesazhet nuk ishin ruajtur në kopje rezervë.
Analistët paralajmërojnë se kjo çështje mund të kthehet në një krizë të madhe politike për Starmer, duke e krahasuar me “partygate”, skandalin që tronditi qeverinë e Johnson, pas zbulimit të festave në Downing Street gjatë periudhës së karantinës.
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Kryeministri Starmer rrezikon te jape doreheqjen, pse i kane vjedhur anetarit te stafit te tij celularin, kjo eshte demokraci presioni eshte nga shtypi e publiku. Ne Shqiperi Sulltani i Surrelit Ed Brekushexhiu me atlete nuk e rruan e jo me te jape doreheqje e te vihet para drejtesise per mega-vjedhjet e bera me Lubi Ballukun, bashkepunimin me mafiozin Gys Agasi, firmosjen e 17 tenderave brenda 1 ore per oligaeket e tij qe i sigurojne fitoret ne zgjedhje, apo me keq akoma qe pret ne Kryeministri anetare te kartelit te Sinaloas dhe i pais ata jashte kompetenceve te tij me leje per kazino etj etj..