Te fundit
Banda shqiptare përdori platformën e real estate për të planifikuar vjedhje luksoze në Britani
24 Prill 2026, 12:15Kronika
TEMA
Një grup kriminelësh shqiptarë është dënuar me vite të gjata burgimi në Britaninë e Madhe, pasi organizuan dhe realizuan dhjetëra vjedhje me thyerje në prona luksoze, duke përdorur teknologjinë dhe platformën online të real estate, Rightmove, për të identifikuar objektivat e tyre.
Banda kreu pothuajse 60 vjedhje në zona të ndryshme të vendit, duke përfituar mallra me vlerë rreth 1 milion paund. Mes sendeve të vjedhura përfshiheshin ora të shtrenjta, çanta dore firmato, bizhuteri dhe para kesh. Ajo që e bën këtë rast të veçantë është mënyra e organizimit: anëtarët përdornin Google për të gjetur zona të pasura dhe më pas platformën Rightmove për të studiuar planet e kateve të shtëpive që synonin.
Katër prej anëtarëve të bandës, Kristian Gropcaj, 31 vjeç, George Pepa, 31 vjeç, Krisjian Dedndreaj, 29 vjeç dhe Sidorjan Lleshi, 27 vjeç, u dënuan me burgime që variojnë nga nëntë deri në dhjetë vjet e nëntë muaj. Ndërkohë, Endrit Nikolli, 27 vjeç, pritet të marrë dënimin në një datë të mëvonshme. Një tjetër e përfshirë, Jade Tubb, 33 vjeçe, partnere e Nikollit, mori një dënim me kusht për zotërimin e pasurive kriminale.
Hetimet ndaj grupit nisën në tetor 2024, kur Policia e Cheshire identifikoi një seri vjedhjesh në zonat lindore të Cheshire, përfshirë Macclesfield, Prestbury, Weston dhe Willaston. Me kalimin e kohës, u zbulua se aktiviteti kriminal shtrihej shumë më gjerë, duke përfshirë disa qarqe në të gjithë Mbretërinë e Bashkuar.
Sipas provave të paraqitura në gjykatë, banda kishte një metodë të qartë veprimi. Ata vendosnin objektiva javore për sasinë e arit që donin të vidhnin dhe madje pozonin për fotografi me sendet e vjedhura. Për të hyrë në banesa, zakonisht përdornin shkallë për të arritur dritaret ose ballkonet e katit të parë, duke shmangur kështu aktivizimin e alarmeve të sigurisë.
Pasi hynin brenda, ata plaçkitnin shtëpitë në mënyrë sistematike. Çarçafët e krevateve përdoren si çanta të improvizuara për të transportuar sendet e vjedhura. Në një rast, kamerat e sigurisë i kapën duke marrë një kasafortë të tërë nga një pronë.
Banda ishte e lidhur me një numër të madh vjedhjesh në të gjithë vendin: tetë në Cheshire, dy në Middlesbrough, nëntë në Derbyshire, dy në Leicestershire, pesë në Nottinghamshire, shtatë në Staffordshire, dy në Warwickshire, tre në Birmingham, tre në Worcestershire, dy në Hereford dhe një në Shropshire.
Një element kyç në hetim ishte një gjurmë këpuce nga një atlete Primark me shputë të dallueshme, e cila u gjet në disa nga vendet e krimit. Gjithashtu, hetuesit zbuluan se një Ford Focus i kuq, i siguruar për Gropcajn, dhe një makinë me qira e marrë nga Jade Tubb, kishin qenë të pranishme në shumë prej vjedhjeve.
Analiza e telefonave celularë rezultoi vendimtare. Autoritetet zbuluan komunikime të vazhdueshme mes Gropcajt, Nikollit, Dedndreajt dhe Pepës, si dhe mesazhe me linqe Google Maps që çonin në vendet e vjedhjeve. Hetimet treguan gjithashtu se katër prej tyre takoheshin rregullisht në një kafene në lagjen e bizhuterive në Birmingham.
Një detaj tjetër që tërhoqi vëmendjen ishte marrëdhënia mes Nikollit dhe Tubbit. Në letrat e shkëmbyera mes tyre, ata e quanin veten “Bonnie dhe Clyde”, duke iu referuar çiftit famëkeq amerikan të viteve 1930.
Operacioni për kapjen e tyre kulmoi më 2 korrik, kur Policia e Cheshire ndërmori bastisje në disa adresa në Walsall, Sutton Coldfield dhe Birmingham, duke arrestuar Nikollin, Pepën, Gropcajn dhe Tubbin. Dedndreaj u arrestua më vonë në Surrey, ndërsa Lleshi u kap në Sheffield më 3 shtator.
Gjatë vjedhjeve, policia gjeti 13 çanta dore firmato dhe 14 ora me vlerë rreth 17.000 paund, si dhe telefona celularë që përmbanin qindra imazhe të sendeve të vjedhura.
Të gjashtë të pandehurit u akuzuan për komplot për të kryer vjedhje me thyerje dhe për posedim të pasurisë kriminale. Në fund, gjykatësi Patrick Thompson theksoi se banda kishte “vjedhur pa mëshirë” dhe kishte lënë viktimat me pasoja të rënda psikologjike, përfshirë ankth dhe ndjenjë pasigurie në shtëpitë e tyre.
Laura Fox nga Policia e Cheshire deklaroi se grupi ishte pjesë e një bande të krimit të organizuar të nivelit të lartë, përgjegjëse për të paktën 59 vjedhje me vlerë të konsiderueshme në të gjithë Mbretërinë e Bashkuar.
Dënimet
Kristian Gropcaj- 10 vite burg
George Pepa- 9 vite burg
Krisjian Dedndreaj- 9 vite burg
Sidorjan Lleshi- 10 vite e 9 muaj burg
Endrit Nikolli- Ende pa dënim (do të dënohet në një datë të mëvonshme)
Jade Tubb- 12 muaj burg (i pezulluar për 2 vite) + 200 orë shërbim komunitar
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Nuk mësuan të bëjnë gjë tjetër në jetë këta halabakët e aksit Mirditë-Laç-Lezhë. Sa nga Italia, Belgjika, Spanja në Angli.