Te fundit
“Vepro gjelbër tani dhe për të ardhmen”, Festivali Ndërkombëtar i Filmit për të Drejtat e Njeriut me mesazhe humanizmi
18 Shtator 2024, 09:35Kulturë
TEMA
Edicioni i 19-të i Festivalit Ndërkombëtar të Filmit për të Drejtat e Njeriut nisi të hënën në Akademinë e Filmit dhe Multimedias Marubi.
Artistë, kineastë, shkrimtarë dhe diplomatë morën pjesë në ceremoninë e hapjes që e priti publikun me tinguj muzikë të luajtur nga banda muzikore e personave me aftësi të veçanta “The door”.
Duke prezantuar temën e sivjetshme të festivalit, “Vepro gjelbër tani dhe për të ardhmen” drejtori ekzekutiv, Kujtim Çashku, ua la skenën miqve dhe partnerëve të festivalit ndërsa përshëndeti artistët e veçantë.
Ambasadori i BE në Tiranë, Silvio Gonzato u shpreh se në një botë të polarizuar, kinemaja ofron një mundësi unike, për të zhvilluar humanizmin dhe për të marrë veprime kolektive për të mirën e përbashkët dhe u shpreh krenar që BE është mbështetësi kryesor i një festivali që promovon vlerat mbi të cilat është themeluar BE-ja dhe rrit ndërgjegjësimin për çështjet kyçe të të drejtave të njeriut.
“Aderimi i Shqipërisë në Bashkimin Evropian nënkupton miratimin e parimeve të të drejtave të njeriut, demokracisë dhe shtetit të së drejtës. Këto parime janë kryesore për partneritetin tonë. Tema e këtij viti, “Vepro gjelbër për të tashmen dhe për të ardhmen”, është një kujtesë e fuqishme e përgjegjësisë sonë të përbashkët për të mbrojtur planetin. Dhe arsyeja për këtë është e thjeshtë: thjesht nuk ka ‘planet B’”, theksoi ai.
Gonzato theksoi se “tema e festivalit është një kujtesë e fuqishme, për përgjegjësinë për të mbrojtur planetin, sepse kemi vetëm një planet. Programet në Shqipëri theksojnë rëndësinë e gërshetimit të zhvillimit ekonomik me qëndrueshmërinë afatgjatë dhe me ruajtjen e biodiversitetit”.
Ndërsa kryebashkiaku i Tiranës, Erion Veliaj tha se festivali e ka bërë Kinostudion nga vend periferik në një epiqendër të një debati, të një diskutimi, të një provokimi të mendimit intelektual.
“Ndonjëherë filmi na sjell realitete të largëta afër, na sjell atë që ndodh në Ukrainë dhe barbarizmin e agresionit rus. Gjërat që në përditshmërinë tonë janë të padukshme një film i nxjerr në pah dhe na provokon të gjithëve edhe në vendimmarrje”, theksoi Veliaj.
Filmi suedez “Blix not bombs” nga Greta Stocklassa çeli siparin duke sjellë në vëmendje rolin e diplomatit Hans Blik në raportet mbi Irakun në vitet 2000 dhe çështjen e armëve të shkatërrimit në masë.
41 filma do të shfaqen në Tiranë, në COD, te Marubi, në kinemanë “Maks Velo”, te Akademia e Sigurisë, te shkolla e Magjistraturës, te Autoriteti i dosjeve etj, duke sjellë në vëmendje përmes këtij festivali perceptime dhe reflektime, mbi njeriun, ligjin dhe shtetet. /atsh/
Më të lexuarat
24 oret e fundit
Javen e fundit
Blog Tema
Lini një Përgjigje