Te fundit
Një avion strategjik amerikan në Tiranë mes zgjerimit të rolit ushtarak të Shqipërisë
26 Korrik 2026, 19:25Politika
TEMA
Një avion KC-46A Pegasus i Forcave Ajrore të Shteteve të Bashkuara u ul në Aeroportin Ndërkombëtar të Tiranës më 26 korrik, pasi ishte nisur nga Joint Base McGuire-Dix-Lakehurst në New Jersey, një nga bazat kryesore të Air Mobility Command, komanda përgjegjëse për transportin strategjik dhe furnizimin ajror të ushtrisë amerikane.
Sipas të dhënave të monitorimit të fluturimeve, avioni me thirrjen operative RCH5093 vijoi më pas itinerarin e tij drejt Pragës, duke e bërë Tiranën një nga ndalesat e këtij misioni ajror. Deri tani nuk është bërë publik asnjë shpjegim zyrtar mbi qëllimin e fluturimit apo natyrën e misionit.
Vetë prania e një KC-46 në Shqipëri nuk është pa precedent. Avionë të këtij tipi kanë operuar edhe më parë në Rinas në kuadër të partneritetit afatgjatë mes Gardës Kombëtare të New Jersey-it dhe Forcave të Armatosura Shqiptare.
Megjithatë, ky fluturim zhvillohet në një moment kur bashkëpunimi ushtarak mes Shqipërisë, Shteteve të Bashkuara dhe NATO-s po zgjerohet në mënyrë të dukshme.
Vetëm pak ditë më parë, Tirana priti Konferencën Evropiane të Partneritetit për Operacionet dhe Zhvillimin e Bazave Ajrore, të organizuar nga Forcat Ajrore të Shteteve të Bashkuara në Evropë dhe Afrikë (USAFE-AFAFRICA) në bashkëpunim me Ministrinë e Mbrojtjes.
Mbi 60 përfaqësues ushtarakë nga Shqipëria, Italia, Kosova, Mali i Zi, Bosnjë dhe Hercegovina, Maqedonia e Veriut dhe Shtetet e Bashkuara diskutuan mbi menaxhimin e bazave ajrore, logjistikën, mbrojtjen ajrore të integruar, komunikimet dhe ndërveprueshmërinë mes vendeve aleate.
Gjatë konferencës u zhvillua edhe një vizitë në Bazën Ajrore të Kuçovës, e cila, pas investimeve të NATO-s, është shndërruar në një nga nyjet më të rëndësishme të infrastrukturës ajrore të Aleancës në rajon.
Komandanti i Forcës Ajrore Shqiptare, gjeneral brigade Edmond Voci, deklaroi gjatë aktivitetit se, “forca jonë më e madhe qëndron në aftësinë për të punuar si një ekip i vetëm. Shkëmbimi i njohurive, mësimi nga njëri-tjetri dhe ndërtimi i besimit na mundësojnë të veprojmë së bashku sa herë dhe kudo që të kërkohet.”
Edhe përfaqësuesi i USAFE, nënkoloneli Andrew Zimmer, theksoi rëndësinë e logjistikës dhe gatishmërisë operacionale.
“Një bazë ajrore ushtarake nuk është vetëm një pistë apo një depo. Kur funksionon me furnizim të shpejtë me karburant, siguri të fortë, mirëmbajtje efektive dhe komunikim të qartë, ajo bëhet një platformë për veprim të menjëhershëm”, u shpreh Zimmer.
Itinerari McGuire-Tiranë-Pragë sugjeron se avioni ishte pjesë e rrjetit logjistik të Air Mobility Command, komanda që menaxhon transportin strategjik të Forcave Ajrore amerikane në shkallë globale.
KC-46 Pegasus përdoret jo vetëm për furnizim me karburant në ajër, por edhe për transport personeli, pajisjesh dhe mbështetje logjistike për operacione ushtarake në mbarë botën.
Ndalesa në Tiranë vjen gjithashtu në një periudhë kur aktiviteti ushtarak amerikan është intensifikuar ndjeshëm.
Komanda Qendrore e Shteteve të Bashkuara (CENTCOM) njoftoi se ka përfunduar natën e 13-të radhazi të sulmeve kundër objektivave ushtarake iraniane, ndërsa mbi 50 mijë trupa amerikane janë aktualisht të dislokuara në Lindjen e Mesme.
Paralelisht, Forcat Ajrore amerikane kanë dislokuar në Mbretërinë e Bashkuar avionët më të rinj të luftës elektronike EA-37B Compass Call, ndërsa vazhdojnë lëvizjet e avionëve transportues dhe bombarduesve strategjikë mes Shteteve të Bashkuara, Evropës dhe rajonit.
Megjithatë, nuk ekziston asnjë provë publike që ta lidhë ndalesën e avionit KC-46 në Tiranë me këto operacione. Qëllimi i fluturimit nuk është bërë publik dhe mbetet e paqartë nëse bëhej fjalë për një mision rutinë logjistik, një ndalesë teknike apo pjesë të një aktiviteti tjetër ushtarak.
Në muajin prill, kryeministri Edi Rama deklaroi në një intervistë për Politico se Shqipëria do të ishte e gatshme të lejonte zhvillimin e operacioneve ushtarake amerikane nga territori i saj, me kusht që vendi të pajisej me sisteme të mbrojtjes ajrore.
“Do të lejonim ushtrinë amerikane të zhvillojë operacione nga Shqipëria, me kusht që të na sigurohet mbrojtje ajrore, të cilën nuk e kemi”, u shpreh Rama.
Në një rajon ku logjistika ushtarake është bërë po aq e rëndësishme sa edhe vetë operacionet luftarake, çdo ndalesë e avionëve strategjikë në aeroporte aleate fiton peshë.
Për Shqipërinë, mbërritja e një KC-46 nuk shpjegon domosdoshmërish një mision të caktuar, por pasqyron gjithnjë e më shumë vendin që po zë në arkitekturën e sigurisë euroatlantike. albanianpost
Më të lexuarat
24 oret e fundit
Javen e fundit
Blog Tema
Lini një Përgjigje