Kuvend/ Debate për situatën ekonomike. Berisha propozon amnisti. Reagojnë ministrat dhe deputetët e PS

Partia Demokratike i kërkon mazhorancës në Kuvendin e Shqipërisë që të anulojë vendimin e datës 20 Shkurt për shkarkimin e Zana Xhuka nga pozicioni i Kryetares së ILDKP-së dhe të rikthejë kushtetueshmërinë në sallën e parlamentit.

Deputeti Eduard Halimi duke marrë fjalën në seancën plenare tha se prej dy muajsh opozita ka kërkuar anullimin e vendimit që zaptoi institucionin që kontrollon pasuritë e zyrtarëve.

“Marrja e të gjitha pushteteve që po ndodh në këtë vend, po çon në udhëkryq demokracinë. Ajo çka Kancelarja gjermane Angela Merkel i kërkoi Kryeministrit Edi Rama në takimin e zhvilluar para pak ditësh në Berlin ishte siguria juridike për bizneset. Por çfarë ka ndodhur në këtë vend me sigurinë juridike në këto 7 muaj? Siguria ka marrë fund, kur bizneseve dhe banesave të qytetarëve i vuri tritolin. Siguria juridike ka marrë fund kur ndërhyri në serverin e tatimeve. Reformat bëhen me strategji, strategjitë bëhen me plane veprimi, të cilat bëhen me ligje. Merkel e ka kuptuar shumë mirë se çfarë reformash do të bëjë Kryeministri për dy muaj deri në qershor kur pritet vendimi për statusin e vendit kandidat, kur Kryeministri Rama nuk ka asnjë strategji. Ai ka prodhuar vetëm propogandë dhe është bërë shumë më agresiv se më parë. i është turrur Presidentit të Republikës, gjyqësorit dhe administratës. Qeveria po bën të kundërtën e asaj që i kërkon BE-ja në prag të statusit. Ato i thonë mos i prek kompetencat e institucioneve të pavarura, dhe ai miraton ligje për ti marrë kompetencat, sikundër është rasti më i fundit ndaj Presidentit të Republikës”, theksoi Halimi.

Ndërkohë deputeti Genc Pollo akuzoi Qeverinë Rama-Meta po tregon jo vetëm një makutëri, por edhe një babëzi për të kapur institucionet e pavarura, me të vetmen arsye për të rritur pushtetin.

“Erdhët në pushtet me premtime të forta anti-korrupsion. Por në vende si Shqipëria, lufta ndaj korrupsionit ka nevojë për vullnet politik, duke pasur parasysh problemet me sistemin e drejtësisë. Korrupsioni është kthyer në një garë mes qeveritarëve tanë dhe kjo po ndodh sepse Qeveria në të njëjtën mënyrë anti-Kushtetuese siç shkarkoi Kreun e ILDKP-së po tenton të bëjë edhe me institucionet e tjera që garantojnë balancën dhe kontrollin e institucioneve”, theksoi Pollo.

Në këtë kuadër, ai cilësoi edhe përpjekjet e mazhorancës për të vënë nën kontroll AMA përmes Memo-ve të fallsifikuara.

“Kemi një situatë anormale në Kuvend që prej datës 20 shkurt. Me memo të fallsifikuara po tentohet shkarkimi i anëtarëve të AMA-s me synimin e vetëm për të kapur një institucion dhe për të vendosur një monopol mediatik në vend, ndoshta të lidhur edhe me Kryeministrin”, theksoi Pollo.

Berisha propozon aministinë për kamatvonesat e energjisë

Kryeministri Sali Berisha i propozoi Kuvendit të Shqipërisë miratimin e një amnistie të plotë për të gjitha kamat vonesat apo vonesat në pagesat për energjinë elektrike për disa kategori. Në këtë kuadër, Berisha propozoi zerimin e të gjitha kamatvonesave për pensionistët, familjet e përfshira në skemën e ndihmës ekonomike apo ato që janë të sëmurë.

“Do të mbështes çdo përpjekje të qeverisë për të kryer dhe rritur pagesat e energjisë elektrike, por të nisim nga zero për këto kategori”, tha Berisha.

Gjithashtu ai propozoi amnistinë nga viti 2011 për bizneset dhe jo sikundër ka thënë Qeveria nga marsi i 2013. “Nëse ju do të bëni amnisti duke filluar nga marsi 2013, atëherë ju po bëni një amnisti klasore”, u shpreh Berisha.

Në fjalën e tij, ish-Kryeministri akuzoi Qeverinë se me politikat që ka ndjekur po e çon drejt falimentit sistemin energjitik për shkak të një keqmenaxhimi total.

“Po dekurajohen prodhuesit vendas, po prishen kontratat me ndërtuesit e HEC-eve, po importohet energji. Ata kanë interes importin dhe jo prodhimin. Keni nisur një revansh duke përzënë ata që do të ndërtonin HEC, po shkelmoni kontratat, jeni një shtet zuzar pasi po shkatërroni sigurinë juridike”, theksoi Berisha. Në vijim ai u shpreh se investimet e Qeverisë në këto 3 muaj janë 73 % më të ulëta se tremujori i parë i vitit që shkoi.

“Ju rrini në diskoteka, nuk e keni mendjen të qeverisni. Prandaj ju nuk mund të hapni një vend të lirë pune. Vetëm amnistia mund tua lehtësojë situatën ku jeni. Keni folur për një borxh të paregjistruar, atëherë kjo do të thotë se ti po paguan në mënyrë të paregjistruar, por si e paguan, kujt do ia paguani. Gjithçka keni ndërtuar e keni ndërtuar mbi bazën e mashtrimit, po ecni drejt skemës së Papandreut, drejt falimentimit”, iu drejtua Berisha deputetëve të mazhorancës.

Braçe: Ngadalësuat rritjen ekonomike

Deputeti i PS-së Erjon Braçe akuzoi qeverinë Berisha për ngadalësimin e rritjes ekonomike të vendit, duke u ndalur edhe tek borxhi i paregjistruar.

“Keni përgjegjësi për ngadalësimin e rritjes ekonomike të këtij vendi dhe dilni këtu dhe kërkoni llogari për dëmin që i keni shkaktuar ekonomisë së këtij vendi. Është e vërtetë që raporti FMN vëren ngadalësim të ritmit të rritjes ekonomike për 2013, por për këtë kanë folur edhe në vitet e kaluara. Është fare e qartë se çfarë ka ndodhur në të katër tremujorët e 2013. Si mund të flasësh për borxh të paregjistruar, kur ti je përgjegjësi, i zhyte kompanitë në vështirësi dhe nuk u paguan. E ke lënë Shqipërinë kantier ndërtimi nga viti 2008”, tha Braçe.

Në vijim ai u shpreh se shqiptarët paguajnë 45 milionë dollarë në vit për shërbime që nuk i marrin fare dhe këto janë për shkak të vendimeve të marra nga ish-Qeveria.

Replikë Berisha-Braçe

“Në qoftë se ka shqiptar që beson se numri turistëve dhe vizitorëve në muajt korrik-shtator ka qenë se 6.6 % më i ulët sesa në muajt prill-qershor, statistikat tuaja janë më të saktat në Botë. Por përveç jush që cdo gjë e bazoni në Shqipërinë e zezë që nuk ekziston, njeri tjetër me minimumin e intelektit nuk e beson një dokërr të tillë. Unë ju them gënjeni sa më shumë, pasi çdo shifër e gënjyer dhe e mashtruar do ju kthehet kundër. Shkoni merrni statistikën e Bujqësisë, si e kanë përfshirë në rritjen ekonomike. E tëra është një falsitet. Keni mashtruar në mënyrë mosntruozë për borxhin 720 milionë, e konsideruat sit ë përligjur nga FMN. Deklaroni se keni 150 milionë dollar më shumë, por keni vetëm 40 milionë dollarë më shumë. Dhe po t u zbresësh kompensimet, dilni me këpucë të kuqe”, tha Berisha.

Ahmetaj: Rritja ekonomike shkoi drejt zeros

Ministri i Zhvillimit Ekonomik Arben Ahmetaj theksoi se investimet totale në 8 vitet e qeverisë Berisha  zbritën nga 34 % e PBB në 21 e saj dhe ky është një fakt që nuk mund të mohohet.

“Kjo tregon se më shumë se në 4-5 vite rënia ekonomike ka qenë e pashmangshme. Ritmet e rritjes ekonomike kanë përfunduar afër zeros për shkak të keqmenaxhimit filozofik dhe për shkak të piramidës së ngritur për borxhet e papaguara. Shifra e borxhit është 726 milionë dollarë dhe ky është një fakt dhe ne kemi paguar mbrapsht 200 milionë dollarë. Kjo është logjika e shifrave, pavarësisht debateve që bëhen në sallën e Kuvendit”, theksoi Ahmetaj.

Në vijim ai theksoi se vetëm në Janar të ardhurat nga sigurimet shoqërore janë rritur me 8 %, pasi janë 19700 të regjistruar të rinj në sistem, që do të thotë se janë punonjës të rinj ose që deri dje ishin në të zezë dhe sot nuk janë më. Ndërkohë në lidhje me rënien ekonomike përgjatë 8 viteve, ministri i Zhvillimit ekonomik tha se rritja e kredive të këqia me 24 % ishte një tjetër shkak që ndaloi rritjen ekonomike në vend.

Gjiknuri: Berisha krijoi kufomën energjitike

Ministri i Energjisë Damian Gjiknuri akuzoi ish-Kryeministrin Sali Berisha se me politikat e ngritura për sektorin energjitik nuk krijoi një superfuqi energjitike, por një kufomë energjitike.

“Në 8 vitet e qeverisjes nuk bëre asnjë investim në sektorin e shpërndarjes dhe kjo është pika më e dobët e sistemit, sikundër bëre një privatizim duke favorizuar CEZ, por duke lënë një gropë të madhe në fushën energjitike. Për shkak të veprimeve të tua, KESH është minus 520 milionë dollarë. i Hoqe shqiptarëve 4 HEC, i privatizove në mënyrën më korruptive dhe i shkaktove një tjetër humbje 30 milionë dollarëshe. Për modelin e tregut që ndërtove, i ktheve investitorët e HEC në viktima të mashtrimit tënd. Krijove një kufomë energjitike për shkak të politikave të tua. Çfarë bëre ti, i the ndërtoni në çdo përrua një HEC dhe sille faturën në shtet. Dhe çfarë bërë, e fute sistemin në një skemë që nuk garanton asnjë gjë”, u shpreh Gjiknuri.

Berisha replika me ministrat

Ish-kryeministri Sali Berisha akuzoi qeverinë Rama se ka rritur 21 taksa, duke rritur nivelin e varfërisë në vend.

”Rritët 21 taksa dhe tarifa të cilat po i shtyjnë të varfrit çdo ditë e më tepër në mjerim. Energjinë drejton një njeri qe thotë se në 8 vite nuk është investuar një qindarkë në shpërndarje. Por gabohet. Kjo do të thotë se ai nuk di se është shpërndarja, prodhimi, transmetimi, por di vetëm të vjedhë”, u shpreh Berisha.

Kodheli: E keqpërdorët institucionin e Presidentit

Ministrja e Mbrojtjes Mimi Kodheli iu përgjigj akuzave të opozitës në lidhje me atë që PD e konsideron si marrjen e kompetencave të Presidentit. Kodheli akuzoi opozitën për shkelje të Kushtetues, dhe keqpërdorim të institucionit të Presidencës, duke u shprehur se qeveria Rama-Meta nuk e ka bërë këtë. Kodheli sqaroi se institucioni që ajo drejton po harton një strategji të re të mbrojtjes.

 “Kur erdha në detyrë si ministre, Shqipëria kishte 4 vjet në NATO, për në dokumentin strategjik lexova “Synimi ynë është të bëhemi anëtarë të NATO-s. Mendoj se ka ardhur koha të nderuar politikanë të reflektoni. Ne po hartojmë një strategji të re të mbrojtjes që duhet të ishte hartuar nga ju sapo vendi i anëtarësua në NATO. Ju në jo pak raste keni shkelur Kushtetutën, dhe keni keqpërdorur institucionin e presidencës. Ju keni prekur përgjegjësitë e presidentit dhe sot na thoni ne. Nuk preket e drejta kushtetuese e presidentit”, tha ministrja Kodheli.

Topalli: Qeveria ka dështuar

Ish-kryetarja e Kuvendit Jozefina Topalli akuzoi Qeverinë “Rama” se ka dështuar në të gjithë fushat dhe i bëri thirrje  të mos merret me shifra pasi “bëhet qesharake”. Ndërsa Kryeministrit Edi Rama i sugjeroi  më mirë të bëjë ndonjë pikturë se do të jetë i suksesshëm. Kalendari i qeverisë, vijoi Topalli nuk ka asnjë projekt për reforma, për punësim,për sigurisë e bizneseve por vetëm për rritjen e taksave”.
“Shqiptarët janë më të varfër dhe dalin në mediat e huaja vetëm për drogë”. “Arrogancë jo vetëm me ligjet por edhe me partnerët dhe të huajt”, tha ajo.

VIDEO/ Momenti i shpërthimit në makinën e ish- biznesmenit në Tiranë

16:58 Politika

Dëmshpërblimi/ Ish- të përndjekurit protestojnë para Kuvendit: Do flijohemi si Lirak Bejko

10:19 Politika

Agolli: Janullatos erdhi për të mësuar priftërinjtë e rinj, jo për të ndenjur

08:57 Politika

Zbardhet enigma e akuzave të Brahos/ “Shkëlzen Trenova” shkarkohet nga hetimi i serverit

08:55 Politika

Qeveria kompenson banorët e ‘pallatit të Bashës’, por ulet sipërfaqja dhe shuma e paguar

08:49 Politika

Mesila Doda: Partitë komuniste të dalin jashtë ligjit/ Reagon Dajti: Bythëpambukë që rrënuat vendin!

08:39 Politika

Fatos Klosi: Kisha Ortodokse ka probleme, s'dua të më mallkojnë

08:33 Politika

Struktura e re e PD-së/ Arqile Gorea dhe Arben Ibro, drejtorët e parë të emëruar nga Basha

08:26 Politika

Amnistia/ Sot 900 të dënuar fitojnë lirinë

08:16 Politika

INTERVISTA/ Celibashi: Mazhoranca i ka numrat, përgjegjësia e saj nëse dështon me reformën në drejtësi

07:56 Politika