Berisha: Po, demonstruesit i vrau garda

Një ditë pasi mohoi kategorikisht që policia dhe garda të kishte gisht në vrasjen e të paktën 4 demonstruesve të opozitës, kryeministri i vendi pranoi dje që vrasjet kanë ardhur nga gardistët por i mbrojti duke thënë se zbatuan rregulloren. Ai i shpërbleu ata që vranë me katër paga mujore

Kryeministri Sali Berisha pranoi dje se tre protestuesit e vrarë janë viktima të Gardës së Republikës, duke përsëritur akuzat për kreun e PS si shkaktar i këtyre vrasjeve.  Berisha theksoi se dje bandat e vandalë tentuan por dështuan që nën thirrjen e Ramës të pushtonin kryeministrinë. Kreu i qeverisë deklaroi se çdo tentativë e ngjashme do të marrë reagimin e policisë dhe ndëshkim. “Edvin Kristaq Rama së bashku me dy ish-ministrat e diktaturës, Ruci e Gjinushi dështoi me skenarin puçist të pushtonte kryeministrinë. Rama ti dje drejtove nga lokalet e Fidelit pucin e marrjes së pushtetit me dhunë. Ti që u deklarove shqiptarëve se nuk do të kontrollojmë popullin, por ishe ti që shprehe gëzimin e papërmbajtur për jetët e humbura që u paguan me 20-30 mijë lek për dhunën . Dy fjalë për kriminelët, banditët që u bënë shkas për 4 viktima. Ju garantoj se çdo shkelje ligji dhe dhunimi i tij do të merrni pa asnjë diskutim ndëshkimin më të merituar. Nuk ka forcë në botë që të pushtojë institucionet demokratike të një vendi anëtar të NATO. Një armik i jashtëm nuk mund ta bëjë këtë pa u përballur më parë me anëtarët e NATO. Por, as banditët nuk e bëjnë këtë pa u përballur me ligjin”, tha Berisha. Kreu i qeverisë ritheksoi se do të mbështesë policinë në çdo veprim të tyre duke e konsideruar si vepër terroriste antikushtetuese dhunen e ushtruar dje nga protestuesit ndaj forcave te policise dhe institucioneve. “Të dashur qytetarë, dje unë përjetova dje atë që ndodhi me forcat e policisë. Banda kriminale, trafikantësh, kanë hedhur shishe Molotov, u kapën me armë. Unë shpreh mbështetje për Policinë e Shtetit, trupave të Gardës së Republikës, për qëndresën heroike. Në çdo përballje me krimin, bandat do kenë në anën e tyre një mbështetje të plotë, kryeministrin dhe qeveritarët”, tha dje Berisha.

Konferenca e plotë e Sali Berishës dhënë dje në mesditë

“Dje, Edvin Kristaq Rama, pasi dështoi me puçin e tij të paralajmëruar për të marrë pushtetin me forcë, me banditë, bashibozukë, trafikantë, delinkuentë, u paraqit gjer në orën një të natës disa herë në mediat e vendit, duke u përpjekur të lajë duart me krimin e tij të shëmtuar, përpjekjen për të marrë kryeministrinë, përpjekje në të cilën humbën jetën 3 qytetarë dhe u plagosën 27 anëtarë të forcave të rendit, ndër të cilët edhe në gjendje shumë të rëndë. Unë jam sot këtu, për t’i thënë Edvin Kristaq Ramës, Gramoz Ruçit, Skënder Gjinushit, autorë të vërtetë të krimit të shëmtuar të djeshëm se akti juaj antikushtetues ka vetën emrin tuaj dhe për këtë ju do të përballeni me të gjitha pasojat e tij. Edvin Kristaq Rama, skenari puçist i djeshëm, sulmi për të pushtuar kryeministrinë u projektua, u organizua, u drejtua dhe u pagua vetëm nga ti dhe dy lejtnantët e tu, ish ministra të diktaturës Ruci dhe Gjinushi. Je ti, zoti Rama, që je vërsulur i tërbuar pas karriges së pushtetit, për të pushtuar kryeministrinë dhe ke drejtuar dje të gjithë sulmin nga lokalet e Fidelit karshi godinës së kryeministrisë. Je ti, zoti Rama, drejtues i dhunës antikushtetuese që dhjetë ditë më parë me çakallin tënd të Sigurimit të Shtetit montove videon për të implikuar dhe akuzuar kryeministrin e vendit. Je ti, Edvin Kristaq Rama, që drejtove dje të gjithë sulmin kundër kryeministrisë, që, edhe pasi media që ti e ke shndërruar në hanxhar tëndin politik u detyrua të transmetojë pjesën e montuar dhe faktoi se video ishte e falsifikuar për kryeministrin, u the shqiptarëve që kjo video nuk është e montuar, thirre Asamblenë Kombëtare të Partisë Socialiste, zgjodhe ditën e Leninit, datën 21 janar, për të thirrur demonstratën në Tiranë. Je ti, Edvin Kristaq Rama dhe ministrat e diktaturës hoxhiste Ruçi dhe Gjinushi që do të drejtoje nga lokalet e Fidelit, karshi zyrës sime puçin e marrjes së pushtetit me dhunë dhe që me përfaqësuesin tënd, kryetarin e degës së Partisë Socialiste për Tiranën kërkove leje në Policinë e Shtetit për zhvillimin e demonstratës më datën 21 janar.Je ti, Edvin Kristaq Rama që urdhëroje dhunën për pushtimin e kryeministrisë nga lokalet e Fidelit, që u deklarove shqiptarëve se ju po thërrisni demonstratën, por nuk do të kontrollonit popullin dhe dje u tregua se nuk ishte populli, por ishin bandat tuaja të paguara. Je ti, Edvin Kristaq Rama, dy ministrat e tu të diktaturës Ruci dhe Gjinushi dhe deputetët e tu që rekrutuan me pagesë falangat e krimit të organizuar, kriminelë, trafikantë banditë, që, siç është dëshmuar nga vetë ata në deklaratat e tyre, ju pagove jo vetëm biletën e udhëtimit, por edhe 20 deri në 30 mijë lekë (të reja) secilit, për dhunën që duhet të ushtronin ndaj kryeministrisë. Je ti, zoti Edvin Kristaq Rama që projektin e puçit tënd të marrjes së pushtetit me dhunë e shtrive në parlament, me autorin e masakrës së Shkodrës, ish ministrin e fundit të Sigurimit të Shtetit dhe bastardë të tjerë të bllokut që kërcënuan me të gjitha format në seancën e fundit, kryeministrin e vendit. Je ti që nga strokulla jote ju dërgoje deputeteve të tu në parlament mesazhe dhe i urdhëroje e i nxisje për sulme fizike kundër kryeministrit.Je ti, Edvin Kristaq Rama që me ish ministrat e diktaturës Ruçi e Gjinushi shpalle se do të përmbysnit me dhunë rendin kushtetues. Ndërsa dje, dy lejtnantët e tu, njëri do të deklaronte se sikur edhe 13 mijë të vrarë të kemi ia vlen, kurse tjetri, pasi do ta përzinte nga spitali motra e njërës prej viktimave e do t’i thoshte largohu kriminel se më vrave vëllain, do kishte fytyrë të dilte para gazetarëve e të deklaronte se Shqipërisë i duhen dëshmorë e martirë të rinj, duke shprehur kështu gëzimin e papërmbajtur për jetët e humbura. Puçin e sulmin për të marrë pushtetin me dhunë e organizove ti dhe vetëm ti. Pasi dështove, tani del çdo orë në media për të larë duart me krimin e shëmtuar. Ti harron se çdo shqiptar ka lexuar në fytyrën tënde, fytyrën e ministrave të diktaturës Ruçi dhe Gjinushi, veprën terroriste antikushtetuese.Dje, ju përjetuat një ngjarje shumë tronditëse. Banda kriminale, trafikantë, bashibozukë të paguar sulmuan me gurë, hunj, armë, eksploziv, shishe molotov kryeministrinë e vendit, rendin kushtetues të Shqipërisë. Dje, ju patë bijtë tuaj me uniformë të Policisë së Shtetit dhe Gardës së Republikës, që paguhen për të mbrojtur rendin dhe qetësinë, jetën, punën, veprimtarinë e institucionet tuaja, të sulmohen me gur e hunj, por edhe plumba e shishe molotov, vetëm e vetëm se ata bënin detyrën, kurse Edvin Kristaq Rama, ministrat e diktaturës hoxhiste Ruçi e Gjinushi, bllokmenët e rinj duhet të merrnin patjetër me dhunë kryeministrinë e vendit. Unë kam marrë dje dhe sot me mijëra mesazhe solidarizuese nga mbarë Shqipëria, nga demokratë, por, në të vërtetë, edhe nga socialistë nga mbarë vendi. Dua t’ju lexoj këtu vetëm mesazhin e një qytetari të paparti. Ky është një mesazh i datës 21 janar, ora 19.13 minuta: Si qytetar i paparti me lot e dhimbje të thellë përjetova atë që ndodhi dje ndaj forcave të policisë, sa më provokohej edhe mua në shtëpi, që po humbisja durimin. Përshëndes ata policë heroikë dhe drejtuesit e tyre, ju përshëndes ju që ditët të kalonit atë provokim. Përshëndetje. Besnik, nuk po e the mbiemrin.

Ndaj ne të gjithë, të dashur qytetare e qytetarë, bashkëkombës të mi, le të shprehim mirënjohjen tonë më të thellë ndaj Policisë së Shtetit, trupave të Gardës së Republikës e gjithë atyre që me guxim, trimëri e heroizëm mbrojtën dje ligjin, liritë tuaja, rendin kushtetues demokratik e dëshmuan se aventurierë, trafikantë, banda e banditë kurrë nuk mund të dalin mbi ligjin në këtë vend anëtar të NATO-s. Unë dua t’i siguroj ata, si dhe çdo punonjës në detyrë të këtij vendi se në çdo përballje me krimin, me bandat e zbatimin e ligjit do të kenë në anën e tyre, në mbështetje të plotë kryeministrin, qeverinë dhe qytetarët e vendit të tyre. Unë sërish kam një mirënjohje të thellë ndaj qytetarëve të Tiranës, të cilët me braktisjen  e thirrjes së puçistëve luajtën rol kryesor në mbrojtjen e vlerave qytetare, në dështimin e puçit të Edvin Kristaq Ramës e dy ministrave të tjerë të diktaturës. Por jam këtu gjithashtu për të shprehur vlerësimin tim edhe për ata mijëra protestues paqësorë që erdhën në thirrjen e partisë së tyre për të protestuar para kryeministrisë së vendit, por, sapo kuptuan se ishin ftuar për mish për top, se ishin ftuar për dhunë e puç, u larguan me shpejtësi nga vendi i ngjarjes dhe qëndruan indiferentë në distancë pa asnjë implikim me dhunën e terrorin e grupeve kriminale. Gjej rastin të garantoj çdo qytetar të këtij vendi se unë përulem me nderimin më të madh para lirive dhe të drejtave të tyre themelore, të cilat nuk do të mund të cenohen kurrë në këtë vend të lirë, demokratik, anëtar të NATO-s, të drejtës për të protestuar në mënyrë paqësore, kudo dhe sa herë që ata të duan dhe kam pasur rastin ta faktoj në mënyrën më të plotë. Me dhjetëra herë kanë ardhur para zyrave të mia, kanë vendosur çadra, për javë të tëra kanë bllokuar bulevardin, kanë protestuar paqësisht dhe unë jam përulur e kam respektuar vendimin e tyre. Liria dhe vetëm liria është pasioni im kryesor. Do t’u them dy fjalë mercenarëve, kriminelëve, banditëve që sulmuan dje kryeministrinë me të gjitha mjetet, gurë, shkopinj, armë, bomba molotov dhe që u bënë shkak i 3 viktimave në ato përleshje – mos u bëni, të mjerë, mish për top i një njeriu dhe një grushti të vogël njerëzish që ju duan vetëm si mercenarë për karrigen e tyre. Ju garantoj se për çdo shkelje dhe dhunim ligji, do të merrni pa asnjë diskutim, përgjigjen dhe ndëshkimin më të merituar. Mos harroni se nuk ka forcë në botë sot që të pushtojë institucione demokratike të Shqipërisë, anëtare e NATO-s. Një armik i jashtëm nuk mund ta bëj kurrë këtë pa u përballuar me të gjithë fuqinë ushtarake të Aleancës së Atlantikut të Veriut, Aleancës më të fuqishme të të gjitha kohërave. Puçistë dhe banditë të brendshëm nuk do të mund ta bëjnë kurrë këtë pa u përballur me të gjithë forcën e ligjit, deri në asgjësimin e plotë të mundësisë së tyre për të sulmuar institucionet demokratike të qytetarëve të lirë shqiptarë. U bëj thirrje familjeve të këtyre elementëve që të ushtrojnë të gjithë ndikimin mbi ta, sepse unë kurrë nuk jam për ndëshkime në rrugë. Unë jam për ndëshkime ligjore në procese të drejta gjyqësore, por në qoftë se na imponojnë në flagrancë forca e ligjit do të bjerë mbi ta me të gjithë potencialin e saj. Dy fjalë për Edvin Kristaq Ramën. Në qoftë se mendon se me banda, banditë dhe me trafikantë do të mund të bëhesh faktor dhe do të faktorizohesh, të garantoj se do të trajtohesh njëlloj si ata dhe se nuk do mundesh kurrë të pushtosh as edhe institucionet më të parëndësishme të këtij vendi. Ato do t’i mbrojnë të gjitha forcat e rendit, do t’i mbrojnë qindra dhe mijëra burra e gra të betuar për detyrë, të betuar për flamur. Mjeran, mos guxo! Faktor nuk do të mund të bëhesh kurrë. Përkundrazi, do shkosh drejt atij fundi që meriton – defaktorizimit total. Ka institucione, ka Parlament dhe keni të gjithë hapësirat.”

Prokuroria: Urdhër-arrest për 6 drejtues të Gardës, akuzohen për vrasje

12:58 Politika

Shqipëria tremb Europën

12:15 Politika

Rama: Nuk zbrapsemi!

11:59 Politika

Policia arreston 113 persona. Vetëm njëri me precedent penal

11:35 Politika

Meta: Të droguarit e Edi Ramës provokuan shtetin

11:15 Politika

Lëvizja MJAFT!: Politika të reflektojë

10:58 Politika

Dëshmi: Isha në krah të viktimës

00:07 Politika

Rama: Sot ditë zie, më pas do jem në ballë të protestave

20:22 Politika

Skaneri i të vrarit: U qëllua me snajper nga Kuvendi

20:02 Politika

Policia e Tiranës: Vandalët dëmtuan e vodhën objekte të ndryshme

19:12 Politika