Plani për “turqizimin” e Prizrenit

Frika se mos po humbin identitetin dhe po asimilohen si komunitet, turqit e Kosovës në fillim të procesit të regjistrimit të popullsisë kanë përdorur edhe rrugë joligjore me qëllim që përqindja e këtij komuniteti të rritet dhe të jetë shumë më e madhe sesa në fakt ekziston.

E tëra ka ngjarë në qytetin e Prizrenit, vend në të cilin komuniteti turk është më i pranishëm, madje edhe gjuha turke është mjaft e përdorur edhe nga ata që e cilësojnë vetën kosovarë apo pjesë e komuniteteve të tjera.

Nën organizimin e degës së Partisë Demokratike Turke të Kosovës (KDTP) në Prizren me në krye Xhemil Lumën dhe me përkrahjen e nënkryetarit të komunës së Prizrenit Orhan Lopar, sipas burimeve të gazetës, dy ditë para nisjes së procesit të regjistrimit, janë hapur tri zyra “për të informuar popullatën se si të bëhet regjistrimi”.

Zyrat të cilat janë hapur në lagjet “Kurillë”, “Terzi Mahallë” dhe “Ortakoll” të Prizrenit, sipas burimeve të gazetës kanë pasur të angazhuar punonjës të cilët kanë pasur obligim që të inkurajojnë popullatën për t’u regjistruar si turq dhe që të mos e humbin identitetin, por madje edhe të bindin persona të komuniteteve të tjera të regjistrohen si turq.

Burime brenda komunitetit turk në Prizren, i kanë thënë gazetës se iniciatorët e hapjes së këtyre zyrave kanë marrë donacione e fonde të ndryshme me qëllim të sensibilizimit të komunitetit në lidhje me rëndësinë e këtij projekti.

“Qëllimi i projektit ka qenë ruajtja e identitetit dhe vërtetësia e pranimit të komunitetit turk në shifra reale”, ka thënë një zyrtar brenda komunitetit turk.

Zyrat të cilat janë hapur dy ditë para regjistrimit dhe atë pas takimeve e debateve të ndryshme që janë mbajtur, kanë pasur jetë vetëm një javë, ngase ato janë lajmëruar nga qytetarët tek organet kompetente dhe si të tilla janë mbyllur në ditën e katërt të procesit të regjistrimit në Kosovë, përkatësisht paraditen e 4 prillit.

Se ato zyra kanë ekzistuar nuk e mohon askush, por për veprimtarinë e tyre ka shumë interpretime.

“Nuk dihet kush i hapi”

Koordinatori dhe përgjegjësi për sensibilizim në Komisionin Komunal për regjistrim në Prizren, Nexhat Çoçaj, është i informuar se ato zyra janë hapur, por sipas tij janë mbyllur ngase kanë qenë në kundërshtim me nenin 15 të Ligjit për Regjistrimin e Popullsisë.

Ky nen sipas tij, saktëson se kush është përgjegjës për informimin e popullsisë në gjithë Kosovën. As Komisioni komunal sipas tij, nuk ka të drejtë të bëjë fushatë e të shpërndajë pllakata ngase përgjegjësinë për sensibilizim e ka Komisioni qendror.

“Në ditën e parë dhe të dytë kemi qenë shumë të angazhuar për procesin e regjistrimit dhe në ditën e tretë jemi informuar nga qytetarët që janë hapur tri zyra. Ata na kanë informuar se zyrat që janë hapur kanë logon “Regjistrimi i popullsisë 2011”. Me të marrë vesh kemi alarmuar te Komisioni Qendror dhe ata na kanë sugjeruar që të punojmë konform ligjit”, ka sqaruar Çoçaj.

Por ai nuk komenton se cili ka qenë qëllimi i këtyre zyrave e madje as kush i ka hapur. Ndonëse në Prizren të gjithë e dinë se ato janë hapur në bashkëpunim me degën e partisë turke KDTP, Çoçaj e mohon një gjë të tillë.

“Sikur ta dimë se kush i ka hapur ato zyre, i kishim burgosur. Ata nuk janë nga KDTP ngase ato zyre nuk kanë pasur logon e partisë”, ka thënë më tej ai.

Por, zyrtarë brenda Komisionit komunal për regjistrim të cilët nuk pranojnë të flasin me emra e dinë qëllimin e hapjes së këtyre zyrave.

“Qëllimi ka qenë që të regjistrohen sa më shumë turq”, thotë një zyrtar komunal.

“Kemi bërë keq që i kemi mbyllë. Sikur t’i linim të hapura do ta dinim se kush po hyn e kush po del në ato zyra. Tash janë mbyllë dhe ne nuk mund t’i përcjellim shtëpi për shtëpi për të parë nëse po vazhdojnë ato fushata”, thotë një zyrtar tjetër brenda komisionit komunal.

Komunarët të përfshirë

Orhan Lopar, që është nënkryetar i Komunës së Prizrenit për çështje të komuniteteve, i angazhuar edhe në komisionin komunal për regjistrim, thotë se ai nuk ka të bëjë me këtë punë.

“Unë nuk kam të bëjë me këtë punë. Unë merrem vetëm me regjistrimin përkatësisht me regjistruesit dhe kontrollorët”, thotë Lopar teksa reagon kur i bëhet pyetja për lidhjen e tij me ata që kanë hapur zyrat në Prizren për të informuar komunitetin turk për regjistrimin.

“Unë e kam ditë që po hapen këto zyra dhe jam informuar nga dega e partisë në Prizren. Këto zyra janë hapur me qëllim që të mësohen njerëzit se si të regjistrohen”, thotë më tej Lopar. Ai pranon se këtë çështje e ka biseduar me kryetarin e degës së KDTP-së në Prizren, Xhemil Luma.

“Unë kam biseduar me Xhemil Lumën për këtë, mirëpo kanë qenë biseda jozyrtare”, sqaron më tej ai. Xhemil Luma në anën tjetër, në një bisedë për gazetën fillimisht mohon se KDTP-ja ka të bëjë me hapjen e këtyre zyrave për të cilat është folur se edhe kanë shpërndarë para tek individë vetëm të regjistrohen si turq.

“Nuk është e vërtet që na kemi shpërnda para. Është bërë propagandë këtyre ditëve në Prizren saqë edhe një qytetar që e takova më tha ‘pse i keni mbyllë zyrat se dëgjova që keni dhënë para”, bën me dije Luma, i cili më pas vërteton se ka qenë pjesë e planit për hapjen e zyrave. Por sipas tij, ato zyre nuk janë hapur për qëllime të manipulimit apo qëllime të këqija.

Derisa kërkon që të mos shkruhet në media për këtë çështje, ai bën me dije se zyrët kanë qenë të hapura në bashkëpunim me disa shoqata joqeveritare turke.

“Këto zyra nuk kanë pasur lidhje me regjistrimin, se regjistrimin e bën Qeveria e Kosovës dhe ne i besojmë këtij regjistrimi. Ajo ka qenë një tendencë për të ndihmuar në sensibilizimin e popullatës. Nëse dikush që dëshiron të regjistrohet nuk ka mjaft informata, ato zyre kanë qenë për t’iu ndihmuar”, ka bërë me dije Luma.

“Unë kam qenë i kyçur, por ju lutna që të bëni sa më pak zhurmë për këtë çështje

Këto zyra kanë qenë në bashkëpunim me shoqatat joqeveritare. Ju lutem që të keni mirëkuptim dhe kjo çështje të merr fund. Dijeni që ka qenë qëllim i mirë e jo siç po flitet”, përfundon Luma.

Fushatë edhe në Prishtinë

Thirrje për regjistrim të komunitetit turk në Procesin e Regjistrimit në Kosovë që ka nisur me 1 prill e që do të zgjasë deri më 15 prill, pjesëtarëve të komunitetit turk, i është bërë edhe në kryeqytet. Një javë para nisjes së procesit, nën organizimin e shoqatave turke është mbajtur një mbrëmje në njërin nga restorantet e kryeqytetit.

“Në atë mbrëmje fjalim ka mbajtur një turk i ardhur nga Turqia. Ai në fjalimin e tij ka kërkuar që regjistrimi të jetë sa më masiv me qëllim që numri i turqve në Kosovë të rritet”, ka sqaruar një pjesëtare e komunitetit turk, pjesëmarrëse në ahengun e organizuar në Prishtinë.

Komisioni i informuar

Për fushatën joligjore të turqve në Prizren është informuar edhe Komisioni Qendror për Regjistrimin e Popullsisë më në krye Rifat Blajan. Ky i fundit, sipas zyrtarëve në Prizren ka qenë në takim në këtë qytet dhe pas vizitave që ka bërë ai, është bërë edhe mbyllja e zyrave. “Një gjë e tillë ka qenë kundërligjore, ngase në bazë të ligjit sensibilizimin e bën Enti Statistikor i Kosovës”, sqaron një zyrtar brenda Komisionit Qendror.

Pa rast në polici

Me gjithë se veprimtaria e zyrave të hapura në Prizren cilësohet të ketë qenë joligjore, për një çështje të tillë nuk janë lajmëruar organet e rendit. “Nuk kemi të iniciuar asnjë rast të kësaj natyre”, ka sqaruar togeri nga policia rajonale e Prizrenit, Vesel Gashi./zëri/

Pilotët serbë - shtyllë e trupave të Gadafit

09:42 Rajoni

Plagoset truproja i Hajredin Kuçit

11:29 Rajoni

Pacolli: Dell e nxori emrin nga zarfi

11:02 Rajoni

Kosovë, Jahjaga- presidente me 80 vota

17:41 Rajoni

Krasniqi: Marrëveshja, jokushtetuese

16:35 Rajoni

Policja presidente; Ja kush është Atifete Jahjaga.

05:43 Rajoni

Ikën Pacolli, një femër bëhet presidente e Kosovës

19:54 Rajoni

Kouchner: Shtëpia e verdhë iu doli e kaltër

10:15 Rajoni

Drejt zgjedhjeve të parakohshme

13:57 Rajoni

EULEX-i merr në pyetje Blerim Kuçin, refuzoi të dëshmonte

10:17 Rajoni