Serbia s’i njeh as diplomat e lëshuara nga Shqipëria

Serbia vazhdon të mos njohë diplomat e lëshuara nga universitetet në Shqipëri, ndërkohë që afro 200 studentë pranohen çdo vit nga Bujanovci, Presheva e Medvegja në universitetet e Shqipërisë, raporton korrespondenti i “Kohës Ditore” në Tiranë. Mosnjohja e diplomave për studentët e Luginës së Preshevës, që diplomohen në Shqipëri, përbën shqetësim të thellë jo vetëm për akademikët shqiptarë, por edhe për studentët që diplomohen. Ata hasin në vështirësi për të prezantuar diplomat e tyre në vendbanimin dhe për rrjedhojë janë të bllokuar në integrimin e tyre normal në jetën e vendit, edhe pse kanë përfunduar me rezultate të mira studimet e larta universitare në Shqipëri.

Fakti problematik që ka shkaktuar telashe te studentet e diplomuar nga Lugina e Preshevës, evidentohet nga rektori i Universitetit të Tiranës dhe nga kryetar i Konferencës së Rektorëve, prof.dr.Dhori Kule.

“Në Universitetin e Tiranës çdo vit vijnë një numër i madh studentësh nga Lugina e Preshevës. Kjo gjë me gëzon, sepse të gjithë janë studentë të mirë, të sjellshëm dhe me rezultate të mira”, thekson rektori i Universitetit të Tiranës, Dhori Kule.

Por, studentëve nga Lugina e Preshevës, që përfundojnë universitetin dhe pajisen me diplomë nga UT-ja apo universitete të tjera publike në Shqipëri, kur kthehen në vendlindje, nuk u njihet diploma.

“Serbia është faktikisht i vetmi shtet që nuk njeh diplomat e Universitetit të Tiranës dhe universiteteve të tjera publike në Shqipëri”, deklaron Kule.

Shqetësimi për mosnjohjen e diplomave i është bërë e ditur rektorit të Universitetit të Tiranës, Dhori Kule, javën e kaluar në Bujanovc, kur ai mori pjesë në çeljen e vitit të dytë akademik të Fakultetit Ekonomik të Suboticës – dega Bujanovc.

Disa të pranishëm pohuan faktin se çelja e këtij fakulteti është vetëm një përpjekje modeste e Beogradit zyrtar për të demonstruar punë nga qeveria për integrimin e shqiptarëve në Serbi. Në të vërtetë, vetëm një numër i vogël shqiptarësh nga Lugina e Preshevës preferojnë të regjistrohen në këtë fakultet. Të pranishmit në ceremoninë e Bujanovcit, pohuan se zgjedhin me dëshirë dhe të sigurt të kryejnë studimet në universitetet shqiptare, duke pohuar se zgjedhja e tyre e parë mbetet Universiteti i Tiranës. Por mosnjohja e diplomave nga Serbia, ka shkaktuar jo pak telashe te studentët e diplomuar. Në këto kushte ata i kërkuan rektorit te Universitetit Tiranës, Dhori Kule, që ai të ushtrojë ndikimin e tij si akademik dhe kryetar i Konferencës së Rektoreve që Qeveria serbe të përshpejtojë procesin e njohjes së diplomave të Shqipërisë. Në vijim të kësaj kërkese, Dhori Kule iu drejtua direkt, Zharko Obradoviqit, ministër i Arsimit, i Shkencës dhe i Zhvillimit Teknologjik, duke i kërkuar që të merren masa për të njohur diplomat shqiptare. Çështja e njohjes së diplomave, pritet të jetë pjesë edhe e agjendës së bisedimeve që ministri i Jashtëm i Serbisë pritet të zhvillojë pas disa ditësh në Tiranë.

“Me Serbinë, përveç bashkëpunimit bilateral, do të diskutohet edhe për marrëveshjen në fushën e arsimit për njohjen e diplomave të shqiptarëve në Luginë të Preshevës”, tha ministri i Jashtëm, Edmond Panariti, lidhur me vizitën e pritshme të ministrit serb të Punëve të Jashtme, Ivan Mërkiç në Tiranë.

Këshilli i Ministrave në Republikën e Shqipërisë ka vendosur të miratojë 700 kuota për studentët shqiptarë me banim në trojet jashtë kufijve të Shqipërisë. Bëhet fjalë për kandidatët nga Republika e Kosovës, si dhe kandidatët shqiptarë nga Lugina e Preshevës, Bujanovci dhe Medvegja, Maqedonia, si dhe Mali i Zi. Kështu, për studentët që vijnë nga Presheva, Bujanovci dhe Medvegja, janë miratuar 182 kuota, për studentet nga Kosova është miratuar kuota prej 139 studentësh, për shqiptarët nga Mali i Zi është vendosur pranimi i 235 studentëve dhe për Maqedoninë 144 kuota. Administrimi i aplikimeve dhe përzgjedhja e kandidatëve, do të bëhet publike nga institucionet e arsimit të lartë, mbështetur në kriteret e notës mesatare të shkollës së mesme dhe notave të lëndëve për të cilat IAL-të kanë vendosur koeficientet më të lartë për pranimet në këtë vit akademik. Në rastet kur numri i kandidatëve ka qenë më i lartë se kuotat, atëherë universitetet kanë përcaktuar kritere të tjera të veçanta pranimi, për të përzgjedhur më të mirët.

Shqiptari që ndihmon Serbinë në veriun e Kosovës

10:34 Rajoni

Karaxhiç: Meritoj shpërblim, jo gjykim

13:36 Rajoni

INTERVISTA/ Jakup Krasniqi kundër pushtetit me vota të vjedhura nga partia e tij

12:23 Rajoni

Sekiraça: Nuk e organizova vrasjen e Triumf Rizës

11:51 Rajoni

Agjentët e AKI, 2500 euro në muaj

11:34 Rajoni

Nikoliç: Nëse Kosova është kusht, heqim dorë nga BE-ja

10:45 Rajoni

Rrëfehet Enver Sakiraqa, njeriu që vrau Triumf Rizën, të fejuarin e Adelina Ismailit

15:10 Rajoni

Miliona euro pastrohen në Kosovë

10:46 Rajoni

Dy deputetë shqiptarë në Parlamentin e Malit të Zi

10:44 Rajoni

Dollia Thaçi-Haradinaj, për hatër të Berishës

14:15 Rajoni