Në analizat e muajve të fundit jam shprehur haptazi se vota e shqiptarëve duhej të ishte referendare (deri më tash procesi i numërimit këtë po dëshmon). Një pjesë, që mbetën në banalitetin e mendjes në rënie të lirë dhe ngushtësisë militanteske, nuk e kuptuan se vota referendare nuk është për të përkrahur të majtën, por për zbythjen e regjimit dhe në shërbim të rotacionit, si domosdoshmëri e funksionimit normal të demokracisë.

Çdo demokrat i përkorë nuk ka përse të ndihet humbës, përkundrazi, kjo është fitorja e tij. Kur një subjekt politik kap pushtetin dhe s’e lëshon nga dora, atëherë mekanizmi shtetëror fillon e zë myk dhe dita-ditës vëmë re shfaqjen e formave më të rënda të autokratizmit. Ndaj, pse jemi demokratë duhet të pranojmë disfatën, madje të përfitojmë nga ajo. Unë e di se ka prej atyre që i pikon zemra, por nuk duhet të ishte kështu. Sot nuk është festë për ata që në 23 vite kanë qenë të majtë; është festë për gjithë demokratët, që karakterin dhe dinjitetin e tyre e kanë ngritur mbi vlerat më të arrira të demokracisë moderne. Nga humbja (pësimi) njeriu mëson. Ky është mësimi i secilit prej atyre që e ndiejnë veten demokratë europianë.

Po ç’është pushteti shtetëror? Sundimi politik i një klase a grupimi, që shprehet me të drejtën dhe mundësinë për të qeverisur shtetin nëpërmjet organeve të zgjedhura. Demokracia është sundimi i popullit. Çdo popull normalisht mëton të ecë përpara. Këtë ecje e pamundëson ekzistenca e një subjekti të vetëm politik apo një klase politike të njollosur. Dhe rotacioni, qoftë dhe vetëm për të ndërruar një formacion me një tjetër, i ndih së tepërmi ecjes përpara. Pushteti nuk duhet të jetë mjet jetese, përndryshe nuk kemi as më të voglën vlerë të demokracisë.

Për asnjë çast askush s’duhet të mendojë se opozita si shkak i opozitarizmit të saj mbresëlënës i fitoi zgjedhjet. Nëse do të ishte kështu, do të kishim të bënim me një elektorat të telendisur si mos më keq. Sepse opozitë i thënçin kur pjesë të saj ka levën e pushtetit të mëparshëm, e cila është kthyer në opozitë nga bindja se pushteti do të jetë i këtyre të fundit. Pra, kalkulim interesash. Natyrisht, opozita ka rolin e vet, por pjesa më e rëndësishme konstruktive ishin intelektualët, analistët e pavarur të mediave, një seri gazetash e televizionesh, artistësh dhe largpamësish, që për ardhmërinë e Shqipërisë ndikuan në mundësimin e rotacionit. Kësisoj, opozita erdhi në pushtet dhe pozita kaloi në opozitë. Ku është e keqja?!

Për demokratët duhet të fillojë një epokë e re – epoka e dëbimit të figurave të rraskapitura, të korruptuara, të lidhura me krimin dhe enverizmin. Partia Demokratike ka nevojë për katarsis. Ndonëse tashmë demokratët kanë edhe një tjetër strehë (FRD), ata kanë nevojë për reformimin e partisë tradicionale, asaj që u ngrit me kauzën e shembjes së komunizmit dhe ku mbeturinat e kësaj të fundit gjenden mu brenda trupit të PD-së: më i mbrami Kastriot Islami, apo i ashtuquajturi “Kaçi i zi”. Mazhoranca e re pak gjasa ka të jetë rilindje prej vërteti, kurse PD mund të rilind, nëse forcat brenda spektrit të djathtë arrijnë të mëkëmben dhe të flakin tutje mbeturinat e hoxhizmit.

Nëse PD arrin të ristrukturohet që nga baza, nën shëmbëlltyrën e meritokracisë, atëherë pas katër vitesh, me siguri, do të jetë rotacioni i radhës. Një opozitë efikase nuk bëhet me numra, por me ide, projekte dhe karaktere individësh potencialë, që mund ta ngjallin PD-në. Rilindja mund të bëhet djathtas, majtas pak shanse ka (çifti PS-LSI që në ngjizje mbart procese të hapura). Prandaj, mos u pikëlloni nëse jeni demokratë, humbja është pjesë e pandashme e demokracisë. U uroj: fitoren PS-së dhe liderit të saj Edi Rama, kurajë dhe pastrim bëzhdilash PD-së!

3 komente në “E majta në pushtet vs të djathtës së reformuar?”

lili says:

24 Qershor, 2013 19:10 te 7:10 pm

Ishallah pdja ka vdekur nje here e per gjithmone:berisha vodhi shpirtin e demokracise edhe vonoj demokratisimin e vendit,shkateroj edhe ato pa institutions qe kishin mbetne kemb,shiti gjithe pas urine kombtare..etj etj ishallah ku nuk rimekembet,edhe te kujtohet vetem per pafytyresine e berishes.

Përgjigjjuni
arbana says:

25 Qershor, 2013 04:08 te 4:08 am

Ky po qe ashte artikull ma me kuptim dhe i qarte se artikulli i fundit botuar nga autori. Ndaj te njejtin opinion por me nje pikepyetje ma te madhe se si do te behet reformimi dhe kush perfaqeson ke ne opoziten e ardhshme?

Përgjigjjuni
Afrim says:

25 Qershor, 2013 17:01 te 5:01 pm

A do e lexojne shume nga “demokratet” e PD-se keshtu situaten? Kjo eshte e rendesishme qe te mund te shpresoj qe te ndricohet shoqeria jone ne pergjithesi.

Përgjigjjuni