Ndërmjetësimi dhe arbitrazhi, si dy metoda efikase që sigurojnë një zgjidhje miqësore të mosmarrëveshjeve, ishin në qendër të bisedës mes ministrit të Drejtësisë Nasip Naço dhe Aleksandër Belohlavek, President i Organizatës Botërore të Juristëve.

Referuar rëndësisë së aplikimit të këtyre metodave edhe ne vendin tonë, Naço kërkoi ndihmën e Organizatës Botërore të Juristëve, e cila përmes eksperiencës së saj të gjatë, mund të asistojë Ministrinë e Drejtësisë dhe ekspertët e fushës, që ta shndërrojnë në një instrument më funksional dhe efektiv ligjin “Për ndërmjetësimin në zgjidhjen e mosmarrëveshjeve”.

Naço është shprehur optimist për mirë-zbatimin e këtij ligji, i cili përbën një risi në kulturën legjislative shqiptare, në rast se do të ishte i mundur shkëmbimi i eksperiencave dhe mundësia e trajnimeve nga ekspertë të kësaj organizate. Bashkëbiseduesit kanë rënë parimisht dakord për një takim të mundshëm konsultativ rreth projektligjit për arbitrazhin, i cili pritet të propozohet së shpejti në parlamentin shqiptar.

Belohlavek është shprehur optimisht lidhur me nisjen e një bashkëpunimi intensiv në të ardhmen e afërt, ndërsa i ka gjetur me mjaft interes fushat e propozuara për nisjen e këtij bashkëpunimi.

Ndërkohë një tjetër takim, ministri i Drejtësisë Nasip Naço ka zhvilluar një takim me Spyridonas Flogaitis, Drejtorin e Organizatës Europiane per Legjislacionin Publik (EPLO).

Gjatë takimit është diskutuar në lidhje me hapësirat institucionale në fushën e së drejtës publike, zhvillimin e programeve të trajnimit, hartimin e studimeve dhe bashkëpunimin me institucione të tjera ndërkombëtare në fushën e të drejtës publike.

Naço ka shprehur interesin e tij për t’u njohur me modalitetet e Marrëveshjes për Themelimin dhe Statutin e Organizatës Evropiane të Legjislacionit Publik, ndërsa u shpreh i sigurt për nisjen e një angazhimi konkret pranë kësaj organizate.

Gjithashtu gjatë bisedës, palët vlerësuan edhe krijimin e një komuniteti shkencor, ku Shqipëria të sjellë kontributet e saj, dhe nëse kjo gjë do të mundësohej, atëherë do të realizohej ngritja e një instituti të rëndësishëm për të mbështetur nismat ligjore të vendit tonë.

Ministri Naço e informoi Flogaitis se në datën 4 Nëntor 2013, filloi punën Gjykata Administrative, përzgjedhja e gjyqtarëve të së cilës është bërë me një procedurë të hapur dhe me prezencën e përfaqësuesve të Delegacionit Europian.

Në këtë kuadër, u ofrua si një mundësi bashkëpunimi edhe nënshkrimi i një marrëveshje ndërmjet Ministrisë së Drejtësisë dhe EPLO-s, për dhënie asistence në ofrimin e trajnimeve për stafin e Ministrisë së Drejtësisë, gjyqtarëve të Gjykatave Administrative dhe stafin mbështetës të tyre.

1 komente në “Naço: Ndërmjetësimi dhe arbitrazhi, metoda efikase”

Analisti Politolog Opinionist Cim Nurellaari says:

11 Shkurt, 2014 19:22 te 7:22 pm

Bravo Naqo!!!
Edhe Krylopa Like keshtu i zgjidh konfliktet – me arbitrazh tek Ngjala.

Përgjigjjuni