Te fundit
Zgjedhjet në Serbi/ OSBE hap 10 qendra për grumbullimin e votave në Kosovë
16 Mars 2014, 09:23Rajoni
TEMA
Misioni i OSBE-së në Kosovë ka hapur dhjetë qendra për grumbullimin e votave, për zgjedhjet parlamentare të Serbisë. Këto qendra, me 15 degë, janë hapur në enklavat serbe në jug të Lumit Ibër, si dhe në komunat veriore.
“Të gjitha qendrat dhe degët e tyre kanë nisur punën në orën 7”, ka konfirmuar për Radion Evropa e Lirë zëdhënësi i misionit të OSBE-së, Nikola Gaon.
Mediat kanë raportuar se para qendrës në veri të Mitrovicës, përkatësisht para shkollës teknike Mihajllo Petroviç – Allas, është ngritur flamuri i Serbisë, por Gaon ka thënë se “në hyrje të qendrës nuk ka flamur”.
OSBE-ja, me përcjellje të policisë, ka sjellë materialin zgjedhor nga Serbia në Kosovë dhe, me përfundimin e votimeve, do ta kthejë atë në Vranjë dhe Rashkë (qytete në Serbi) për numërim. Në këtë proces janë të angazhuar rreth 400 pjesëtarë të këtij misioni.
Mediat në Prishtinë citojnë zv/kryeministren kosovare, Edita Tahiri, të ketë deklaruar se që nga nënshkrimi i marrëveshjes së 19 prillit, Serbia nuk mund të ndërhyjë në punët e brendshme të Kosovës dhe se ajo nuk mund të organizojë zgjedhje në Kosovë.
Ndërsa mbajtjen e zgjedhjeve parlamentare serbe sot edhe brenda territorit të Kosovës, Tahiri nuk e konsideron organizim të zgjedhjeve, por, siç thotë ajo, shteti fqinj po bën vetëm grumbullim të votave nga qytetarët që kanë dyshtetësi.
Lini një Përgjigje
Më të lexuarat
24 oret e fundit
Javen e fundit
Blog Tema
