Te fundit
PD ndërpret bojkotin ndaj Kuvendit/Ligjet diskutojnë p/ligjin për Avokatin e Popullit
1 Korrik 2014, 11:17Politika
TEMA
Partia Demokratike është rikthyer në Kuvend pas bojkotit 10 ditor nga të gjitha veprimtaritë parlamentare. Deputetët demokratë kanë marrë pjesënë mbledhjet e Komisioneve Parlamentare, ndërsa një ditë më parë ishin të pranishëm në seancën e posaccme të mbledhur në nder të Presidentit të Komisionit Europian Hose Manuel Barroso. Ndërprerja e bojkotit ka të bëjë me përfundimin e dënimit 10 ditor për deputetin Sali Berisha, i cili në bazë të vendimit të Byrosë Parlamentare për shkak të fjalorit të përdorur në seancë plenare, nuk u lejua të ishte pjesëmarrës në veprimtaritë e Kuvendit të Shqipërisë.
Deputetët e PD ishin të pranishëm në mbledhjen e Komisionit të Ligjeve, ku u diskutua p/ligji për Avokatin e Popullit, paraqitur nga zv.ministri i Drejtësisë Arben Isaraj. Avokati i Popullit Igli Totozani, i pranishëm në mbledhjen e Komisionit, tha se mbështet ndryshimet e propozuara, ndërsa Isaraj garantoi deputetët se drafti mbron pavarësinë e funksionimit të Institucionit.
“Mënyra e përzgjedhjes së Avokatit të Popullit, i vetmi ndryshim është afati që i vihet Kuvendit për zgjedhjen e Avokatin e Popullit pra vetëm 1 muaj, kjo është e pamjaftueshme. Sugjeroj që për të bërë transparencë duhet parë mënyra e përzgjedhjes së Avokatit të Popullit”, tha Vasilika Hysi.
Zv/ministri i Drejtësisë Arben Isaraj, gjatë prezantimit të ndryshimeve theksoi se ndryshimet në këtë ligj, të hartuara në bashkëpunim me misionin EURALIUS, konsistojnë tek pavarësia e Avokatit të Popullit, struktura e institucionit dhe promovimi i fizibilitetit të veprimeve proaktive të këtij institucioni.
Në nenet e propozuara ndër të tjera është përfshirë dhe parashikimi që Avokati i Popullit është nxitës i standardeve më të larta të të drejtave dhe lirive të njeriut në vend. Një tjetër ndryshim në ligj përcakton, se në rastet e mbarimit të funksionit të Avokatit të Popullit terminologjia e përdorur do të jetë ‘shkarkim’ dhe jo ‘heqja’ e tij. Po ashtu, riformulohet neni 9 që lidhet me zgjedhjen e Avokatit të Popullit.
“Kuvendi zgjedh Avokatin e Popullit brenda një muaji nga mbarimi i funksionit. Avokati i Popullit qëndron në detyrë deri në zgjedhjen e Avokatit të ri të Popullit, në rastin e parashikuar në shkronjën “b”, të nenit 7, të ligjit. Kur Avokati i Popullit jep dorëheqjen, vdes, shkarkohet apo është në pamundësi të kryejë detyrat, komisionari më i vjetër në detyrë kryen funksionin e tij deri në zgjedhjen e Avokatit të ri të Popullit”, citohet neni 3 i draftit.
Ky riformulim është bërë që në rastet e mbarimit të afatit 5-vjeçar të qëndrimit në funksion të Avokatit të Popullit, deri në zgjedhjen e Avokatit të ri të Popullit, të qëndrojë në detyrë avokati i zgjedhur nga Kuvendi me shumicë të cilësuar, dhe jo komisionari më i vjetër, si ka qënë deri më sot.
Komisionari më i vjetër në detyrë do të ushtrojë funksionet e Avokatit të Popullit për raste të tjera, kur ai është në pamundësi të ushtrimit të funksionit. Një tjetër ndërhyrje në ligj që lidhet me funksionin e këtij institucioni është mbrojtja e të drejtave të të miturve. Për këtë qëllim është propozuar të krijohet posti i Komisionarit në mbrojtje të këtij grupi.
Ndryshime në ligj parashikohen dhe per zgjedhjen e komisionarëve, që do të bëhet nga Kuvendi me propozim të Avokatit të Popullit. “Kuvendi voton kandidaturat jo më vonë se 30 ditë nga propozimi. Komisionari duhet të plotësojë të njëjtat kushte të parashikuara në nenin 3, të ligjit”, thuhet në draftin e propozuar nga Ministria e Drejtësisë.
Lini një Përgjigje
Më të lexuarat
24 oret e fundit
Javen e fundit
Blog Tema
