INTERVISTA/ Ivica Daçiç: Vuçiç vjen me mesazhe paqeje në Shqipëri

Në prag të vizitës së kryeministrit serb në Tiranë, ministri i Jashtëm Ivica Daçiç, në një intervistë për Top Channel, deklaron se vizita nuk ka pse të përfshihet nga provokime pasi të gjithe e dimë qëndrimin e secilës pale për Kosovën, ndaj dhe ne duhet të flasim për pikat që na bashkojnë.

Është konfirmuar tashmë vizita e kryeministrit serb në Tiranë, Aleksander Vuçiç. Cilët janë mesazhet që pritet të përcjellë ky takim në Tiranë, pas atij jo pak të tensionuar të kryeministrit Rama në Beograd?

Mesazhet që kryeministri do të përcjellë janë mesazhet e paqes, të vullnetit për bashkëpunim dhe të shtrirjes së dorës së sinqertë jo vetëm për Shqipërinë, por për të gjithë rajonin, sepse mendoj që na duhet më shumë bashkëpunim në rajon, dhe gjithë rajonit e më gjerë me Europën për një të ardhme më të mirë për të gjithë ne.

Nëse kryeministri Rama do të bëjë të njëjtën deklaratë për Kosovën, a do të cilësohet kjo sërish ‘provokacija’-provokim?

Janë të njohura tashmë se qëndrimet e Serbisë dhe Shqipërisë janë të ndryshme sa i takon çështjes së Kosoves dhe ne e dimë me saktësi se cilët janë pikat tona të dallimit në këtë çështje, cili është ndryshimi dhe diferenca jonë në këtë pikë. Dhe unë mendoj ne duhet t’i lëmë mënjanë ato, duke u përqendruar tek gjërat që na bashkojnë, duhet të insistojme në këto çështje për të cilët mund të arrijmë marrëveshje. Këto çështje nuk janë për deklarata apo diskutime publike. Unë mendoj se vizita e kryeministrit tonë, Vuçiç, duhet të shfrytëzohet për të rritur bashkëpunimin rajonal dhe për thellimin e stabilitetit rajonal. Më duhet të nënvizoj se këto janë vizita të nivelit të lartë pas shumë dekadash, prandaj nuk duhet të nënvlerësojmë rëndësinë e të tilla vizitave për të diskutuar disa çështje që ne nuk ndajmë të njëjtat pikëpamje.

Gjatë vizitës së kryeministrit shqiptar në Serbi u fol për njohje reciproke të diplomave. Kur do të ndodhë kjo?

Ne po punojmë për këtë çështje. Kohët e fundit unë pata takim me ministrin tonë të Arsimit, gjithashtu e kam diskutuar këtë pikë me kryeministrin tonë. Ne tashmë po punojmë për harmonizimin e teksteve nga të dyja palët, shqiptare dhe serbe, pra po punohet me tekstet e të dyja palëve.

Kanë ndodhur disa ngjarje tragjike në Maqedoni. Si i lexon Serbia këto zhvillime atje?

Këto zhvillime sigurisht që kanë efekt në rajon, efekte negative në të gjithë rajonin. Eshtë detyra e politikanëve të marrin përgjegjësite e tyre për t’u investuar në angazhimin e ndërtimit të paqes dhe stabilitetit në Ballkan. Pa patur këtë, ne nuk mund të kemi rritje të ekonomisë, prosperitetit, përfshirë qëllimin tonë drejt BE-së. Besoj se arsyeja do të prevalojë, sikurse dialogu, duke punuar së bashku në arritjen e stabilitetit rajonal.

A mban përgjegjësi qeveria e Maqedonisë për këtë situatë?

Hetimi për këtë ngjarje duhet të jetë vendimtar për të zbuluar se çfarë ishte e gjithë kjo; nëse kemi të bëjmë me një grup të organizuar, i cili mund të ketë patur karakteristikat e një grupi terrorist apo kriminal. Unë jamë bashkëkryetar i OSBE-së dhe kemi patur bisedime me qeverinë dhe lidershipin politik të Maqedonisë. Kemi rënë dakord se një dialog konstruktiv duhet të nisë dhe të gjithë të punojnë në realizimin e stabilitetit në këtë vend dhe për rajonin.

A ndani ju të njëjtin qëndrim me ministrin e Jashtëm rus se, Shqipëria dhe Bullgaria janë duke u përpjekur për ndarjen e Maqedonisë?

Mendoj se fuqitë e mëdha kanë të drejtë të bëjnë të tilla deklarata. Ne jemi të vegjël dhe nuk e kemi privilegjin të komentojmë. Vetëm dua të them se në rajon duhet të bëjmë kujdes në ato që bëjmë dhe duhet të kontribuojmë në stabilizimin e situatës.

A ndan Serbia të njëjtat politika të jashtme dhe të sigurisë së BE-së në Ballkan, apo ato janë më të ngjashme me politikat e Rusisë?

Politika e jashtme e Serbisë nuk është as ajo e BE-së dhe as ajo e Rusisë. Politika jonë e jashtme është politika e jashtme e Serbisë. Më duhet të rikujtoj se Serbia nuk është ende anëtar me të drejta të plota në BE. Gjatë kësaj kohe që ne po punojmë për t’u bërë anëtar me të drejta të plota në BE, po punojmë për harmonizimin e politikave tona të jashtme me ato të BE-së. Më duhet gjithashtu të them se ne kemi marrëdhënie të mira tradicionale me Rusinë, sikundër edhe me vende të tjera e nuk duam t’i neglizhojmë ato për asnjë arsye. Në këtë kuptim nuk kemi ndonjë dilemë hamletiane, të jesh a të mos jesh, apo të zgjedhësh këtë apo atë. Ne dëshirojmë t’i kemi të dy si aleatë në pasjen e marrëdhënieve të mira. Ka edhe çështje të tilla, për të cilat nuk mund të dakordësohemi me vendimet politike apo orientime të Shqipërisë. Por arrijmë të kuptojme se në vende të ndryshme politikat e tyre të jashtme ndjekin linjat e interesave që kanë shtetet e tyre.

Revista greke: Sa herë Shqipëria ka marrë hapa agresivë ndaj nesh, ka humbur gjithmonë

15:35 Rajoni

Rama dhe Shpend Ahmeti përurojnë shtatoren e Ismail Qemalit

14:09 Rajoni

Tre nga nëntë të vrarët në Kumanovë janë masakruar deri në shpërfytyrim

20:28 Rajoni

Doris Pack: Kosova është Shqipëri, kurrë s’do jetë Serbi

17:30 Rajoni

Autostradat kroate falimentojnë, qeveria merr përsipër kreditë

17:05 Rajoni

Përurimi i shtatores së Ismail Qemalit, Rama viziton Prishtinën

13:24 Rajoni

Vuçiç optimist për vizitën në Tiranë, pritje tek Pallati i Brigadave

12:22 Rajoni

Shkupi iu përgjigjet "kërcënimeve" të Ramës

10:07 Rajoni

Nga Vuçiçi në Tiranë nuk priten provokime

18:17 Rajoni

Defekt në avionin e Gruevskit, bën ulje të detyruar në Zvicër

17:58 Rajoni