Te fundit
Zyrtare: Gjimshiti kalon në Serie A
18 Janar 2016, 15:00Sport
TEMA
Berat Gjimshiti është zyrtarisht lojtar i Atalantës. Klubi nga Bergamo firmosi kontratën deri në vitin 2019 me mbrojtësin e Kombëtares shqiptare.
Marrëveshja e lidh kuqeziun për tre vjet e gjysmë me zikaltërit e drejtuar nga Edy Reja, ndërsa është përfshirë edhe një opsion për rinovimin e kontratës edhe për një sezon.
Njoftimi u dha në faqen zyrtare të klubit, ku i jepet mirë se ardhja 22-vjeçari, ndërsa lojtari u shfaq duke shtrënguar duart me administratorin e klubit, Luca Percassi, pas hedhjes së firmës.
Gjimshiti kaloi me sukses testet mjekësore të zhvilluara pas mesditës së të hënës. Firma në kontratë ishte formalizimi i akordit me ish-lojtarin e Zyrihut, që ishte arritur disa ditë më parë.
Atalanta njoftoi se mbrojtësi do të mbajë numrin 55 në fanellë. Djaloshi i lindur në Zvicër, në një familje shqiptare nga Bujanovci u largua me parametër zero nga Zyrihu, ndërsa vlera e tij në merkato përllogaritet në rreth një milion euro.
Te Atalanta talenti i Shqipërisë do të përfitojë rrogë 250 mijë euro në sezon, ndërsa në kontratë u përfshi edhe edhe një tjetër klauzolë, sipas të cilës paga e tij gjatë qëndrimit në Bergamo do të vijë në rritje.
Berat Gjimshiti bëhet lojtari i pestë i Kombëtares që do të luajë në këtë sezon të Serisë A italiane, pas Elseid Hysajt te Napoli, Etrit Berishës te Lazio, Rey Manajt te Interi dhe Arlind Ajetit, që gjatë Nëntorit të vitit 2015 iu bashkua Frosinones./SS
Lini një Përgjigje
Më të lexuarat
24 oret e fundit
Javen e fundit
Blog Tema
