Humbja në bashkinë e Dibrës ka rikthyer në PD kritikat e “vjetra” për mënyrën e drejtimit të lidershipit të ri të partisë. Një pjesë e deputetëve në mbledhjet e grupit parlamentar të PDsë, kanë kërkuar që të rishihet pozicioni i kreut të PD-së dhe bashkëpunëtorëve të tij para zgjedhjeve parlamentare të 2017 ës.

Deputeti i qarkut të Dibrës, Roland Keta, i cili është një prej protagonistëve në mbledhjen e grupit parlamentar, në një intervistë për “Shekulli”n, sqaron se ka rezerva për organizimin, por ai beson se humbja nuk erdhi për shkak të keqorganizimit.

Ndërsa duke folur për “kritikët”, Keta shprehet se asnjë prej tyre nuk rrezikon përjashtimin nga lista e deputetëve në zgjedhjet e ardhshme, pavarësisht kundërshtimeve që kanë bërë ndaj kreut demokrat.

Zoti Keta, çfarë ka ndikuar në humbjen aq të thellë të opozitës në Dibër?

Siç edhe jeni informuar prej ditësh, një nga arsyet për humbjen e thellë në Dibër është blerja e votës atje. Sikur të mos e kisha parë nga afër situatën atje dhe mund të isha skeptik, por nga ajo që pamë në terren shanset që ne të fitonim ishin minimale.

Pse nuk i keni denoncuar më përpara?

Informacione ka pasur edhe më përpara. Janë denoncuar edhe më parë nga qytetarët. Personalisht sipas informacioneve që na kanë ardhur nga zonat e thella, Partia Demokratike nuk i denoncoi vetëm ditët e fundit, por gjatë gjithë fushatës.

Kur e patë që fushatën e kishte gllabëruar “hashashi”, përse në fund nuk u tërhoq nga zgjedhjet PDja? Ose më saktë si duhet të ishte sjellë Partia Demokratike?

Për këtë pyetje nuk mund të them dot gjë, pasi merren vendime Grupi. Nuk mund të komentoj unë, por gjithsesi një deputet në Grup është shprehur se në këtë gjendje duhet të bojkotojmë zgjedhjet, ose nuk duhet të futemi në zgjedhje.

Unë personalisht mendoj se kandidati ynë ishte shumë i mirë. Figurë kombëtare, bir i Dibrës. Edhe kandidati i PSsë ishte djalë Dibre, por në fund ai zgjodhi që të merrte votat nga presioni i administratës, nga presionet e ndryshme. Të gjitha këto janë të faktuara dhe të konfirmuara nga njerëz. Infermierë, ata me ndihmë ekonomike, me aftësi të kufizuar.

Ç’duhet të bënte ndryshe Partia Demokratike në zgjedhjet e Dibrës?

Kryetari i Partisë zoti Basha dhe i gjithë grupi parlamentar ishin në Dibër. Të gjithë u angazhuan. Kjo nuk ndikoi negativisht në kampin demokrat. Nga eksperienca e viteve të mëparshme, kur ka zgjedhje në një njësi vendore dhe pushteti është qendror, fiton ai që ka qeverisjen.

Cili është leksioni që morët nga Dibra dhe që duhet ta korrigjoni në zgjedhjet e 2017ës?

Nëse nuk bashkohemi të gjithë bashkë, të majtë e të djathtë për shitblerjen e votës, si në 2013, 2015, atëherë e ardhmja e votës dhe e zgjedhjeve është e mbyllur. Nuk do të ketë zgjedhje të lira. Ky është mesazhi që personalisht jap. Partitë politike duhet të shpëtojnë reformën zgjedhore.

Zgjedhjet e 2017ës erdhën. Ajo që ndodhi në Dibër të mos ndodhë në 2017ën. Vjedhja e votes është kthyer në një sistem, sëmundje që rrezikon të ardhmen e Shqipërisë sepse nuk ka liri.

Në analizën e zgjedhjeve të PDsë për zgjedhjet ka pasur përplasje në mbledhjen e grupit parlamentar. Ju keni qenë kritik për disa individë. Pse?

Nga ana e kryetarit Lulzim Basha do të ketë një analizë të plotë. Unë po ashtu kam kërkuar që të jetë një analizë e hollësishme dhe e thellë për këto zgjedhje. Kam rezervat e mia për organizimin.

Por, unë besoj se humbja nuk erdhi nga organizimi, por nuk duhen nënvlerësuar degët lokale, struktura e partisë në bazë. PDja në shumë degë është në riorganizim dhe kjo është lidhur edhe me Dibrën. Për ne ishte e papritur, sepse u largua zoti Xhelili, kryetari i Bashkisë.

Organizimi duhet të jetë efiçent, i shpejtë të japë informacionet e duhura. Një riorganizim kaq i gjatë nuk është i vlefshëm dhe duhet të shpejtohet, nuk duhet të zgjasë me muaj por në një kohë të shkurtër.

Zonja Bregu ka kërkuar mbledhjen e Këshillit Kombëtar për riorganizimin e strukturave. Cili është qëndrimi juaj për këtë çështje?

Nuk jap komente për kolegët e mi. Kryetari Basha ka qenë i hapur me të gjithë anëtarët e grupit parlamentar. Të gjithë deputetët janë të lirë të flasin dhe të japin mendimet e tyre. Nuk besoj se çalon problemi tek Këshilli Kombëtar.

A ka nevojë për ndryshim strukturash në qendër zoti Keta?

Edhe një familje ka probleme, jo më një parti, madje edhe në Dibër. Shumë degë të reja të partisë janë në fazën e përzgjedhjes. Partia ka nevojë të hapet dhe të ofrojë më shumë figura të rëndësishme në bazë, por dhe në qendër.

Në korridoret e PDsë flitet për një përjashtim të mundshëm të zonjës Bregu dhe zotit Selami. Si është e vërteta?

Absolutisht nuk ndodhin kështu gjërash në Partinë Demokratike. Nëse ka një njeri të hapur ai është zoti Basha. Kam eksperiencë edhe në vitet e mëparshme. Ai është i hapur për debat dhe nuk ka armiq. E përsëris organizimi duhet të jetë më i mirë.

Sa është e vërtetë zoti Keta, që tashmë në PD ka filluar një “luftë” të ftohtë mes deputetëve për të pasur emrin në listën e zgjedhjeve të ardhshme parlamentare?

Nuk mendoj se debatet po bëhen për listat, por për të mirën e Partisë. Debatet i bëjnë mirë PDsë dhe kështu mendojnë dhe drejtuesit, duke përfshirë dhe zotin Basha.

Ju thoni se deputetët që kanë dalë kundër zotit Basha, nuk rrezikojnë të mbesin jashtë listave?

Unë mendoj që jo. Zoti Basha është i hapur për sugjerime dhe që nga ardhja e tij në krye të PD-së ka mirëpritur çdo lloj kritike. Ai është treguar një lider model në këtë drejtim. Në mbledhjet e grupit të PDsë zoti Basha ka pranuar dhe e ka toleruar çdo lloj diskutimi.

2 komente në ““Edhe një familje ka probleme, jo më një parti. Bregu dhe Selami nuk përjashtohen””

Kola says:

22 Shtator, 2016 10:49 te 10:49 am

Plotesisht dakort, por e keqja e SHQUPIT eshte se i hap problemet atehere kur s’ka probleme, dhe hesht atehere kur duhet te ulurije. Vec kesaj, e verteta eshte se SHQUPI nuk ka asnje problem me vetveten, pasi kushdo e ka ngjyer aq sa ka mundur, ndaj dhe problemin me te madh e kane me shqiptaret te cilet po ja u japin shkelmat njerin pas tjetrit, per tua ruajtur shkelmin me te madh per zgjedhjet e ardheshme. Kete duhen ta kuptojne mire zuzaret qe deri tani bene vetem punen e UDB-se. Pa u ndeshkuar krimi qe vazhdon te mbaje majen e kupoles ne SHQUP, veshtire se mund te permiresohet imazhi i kesaj partie fashiste e cila ka guxuar te perdore dhunen edhe ndaj votuesve.

Përgjigjjuni
Fatosi-kosove says:

22 Shtator, 2016 11:53 te 11:53 am

E paskan gjetur keten tash te flas per Selamin e Bregun dhe sipas tij ata nuk do te prejashtohen,kurse e kaluara na tregon se Selami e ka provuar dhunen “demokratike” duke u terhequr zvarre para disa vitesh pasi kerkonte nje PD ndryshe,pa droge,pa Lazaratin,pa vrasje,pa krim e kriminel ne PD,u desht me shume se dhjet vite qe Selami ta provoje edhe nje ehre se PD eshte po ajo qe ishte ateher qe dhunoi ate dhe kercenoi me jete,qe detyroi te ik ne Amerike,PD eshte po ajo qe rrahu genc pollon,i mori familjen dhe e kercenoi me zhdukje,PD eshte po ajo qe vrau azemin,Gramoz Pashkon,Sokol Olldashin,eliminoj edhe shume figura patriotike dhe intelektuale per tu kapur nga vrases prandaj z.keta fjaleve tuja nuk do ju beson as ti kur del nga ky prezntim spektakel,uroi qe Selamit e Bregut te mos ju ndodhe kjo.

Përgjigjjuni