Te fundit
KVV: Ridimensionimi i KQZ dhe kryetarit, vetëm si konkluzion i reformës zgjedhore
15 Nëntor 2017, 19:00Politika
TEMA
Koalicioni i Vëzhguesve Vendorë është shprehur kundër shkarkimit të kreut të KQZ në mënyrë ekstraligjore. “Ndër arritjet kryesore që u shënuan gjatë Reformës Zgjedhore të 2012, ishte ridimensionimi i figurës dhe i mënyrës së përzgjedhjes së Kryetarit të Komisionit Qendror të Zgjedhjeve (KQZ), çka ishte asokohe edhe një prej çështjeve më të ngulmuara nga opozita e atëhershme.
Mekanizmi procedurial parlamentar i miratuar për përzgjedhjen e kreut të KQZ-së, i cili është ende në fuqi, pavarësisht dobësive, synon të sigurojë pranimin e gjerë politik, në frymën e garantimit të aspiratës së herëshme për një trupë KQZ-je të pavarur dhe larg ngërçeve institucionale me direktivë politike. Përvoja e parë katër vjeçare e Kryetarit të KQZ-së së përzgjedhur sipas këtij mekanizmi mbarti precedentë pozitivë dhe negativë në kontekstin e zhvillimeve.
Zbatimi i këtij mekanizmi për përzgjedhjen e mandatit të dytë të Kreut të kësaj trupe, në tetorin e vitit 2016 nisi një seri precedentësh që po rezultojnë gjithnjë e më shumë të kenë zhbërë tërësisht aspiratën e Reformës Zgjedhore të vitit 2012. Precendetë këto, që pasurojnë traditën e thelluar prej establishmentit politik, në përpjekje për të atakuar politikisht institucionet e veçanërisht ato të pavaruara.
Ky hap i parë dekonstruktues i aspiratës së Reformës Zgjedhore të 2012-ës, u ndoq më pas nga përmbajtja e Marrëveshjes Politike të 18 Majit 2017, e liderëve të dy partive më të mëdha parlamentare. Dakortësi, e cila ndër të tjera e vendosi emërimin e Kryetarit të KQZ-së në diskrecionin e opozitës. Ky element i marrëveshjes, dorëheqjet e dy anëtarëve të trupës së KQZ-së, procedura tërësisht jo ligjore e ndjekur nga Kuvendi i Shqipërisë për përzgjedhjen e Kryetarit të ri brenda 24 orëve, e të tjerë fakte kontekstualë, provuan botërisht jo vetëm se sa ishte arritur në të vërtetë të ngrihej një institucion i pavarur, por edhe sesa e pamundur u bë në vijimësi kjo aspiratë për shkak të diktatit të lidershipit politik.
Koalicioni i Vëzhguesve Vendorë (KVV) asokohe e kritikoi procesin dhe procedurën e përzgjedhjes së Kryetarit të KQZ-së në tetorin e vitit 2016 dhe më pas edhe përfshirjen e tij si pjesë e marrëveshjes politike të 18 majit 2017, si edhe mënyrën e ndjekur për ndërrimin e tij, pavarësisht legjitimimit nga prag-kriza e rëndë institucionalo-kushtetuese një muaj përpara zgjedhjeve parlamentare të qershorit 2017.
Me konstituimin e Komisionit të Posaçëm Parlamentar për Reformën Zgjedhore më dt. 10 nëntor 2017, ka nisur një proces me pritshmëri të shumta për çështjet që meritojnë të adresohen.
Një prej çështjeve që meriton medoemos të merret në konsideratë është edhe trajtimi i komisioneve zgjedhore të të tre niveleve, ku një vëmendje të veçantë meriton t’i kushtohet konstituimit të trupës së KQZ-së, si dhe funksionimit të administratës së këtij institucioni.
Të gjendur në këto rrethana, Koalicioni i Vëzhguesve Vendorë e konsideron prekjen e përbërjes aktuale të KQZ-së në mënyrë ekstraligjore, me direktivë politike dhe në mënyrë të njëanshme, si të gabuar dhe me rrezik të thellimit akoma më shumë të precedentëve negativë zgjedhorë.
Për më tepër moslegjitimimi i një akti të tillë prej situatës politike apo kontekstit institucional, do ta shndërrojë ndërrimin e Kreut të KQZ-së në një çështje të pakorrektueshme nga çdo rregullim ligjor në të ardhmen. Një precedent i tillë nuk do të sigurojë tjetër veçse paqëndrueshmëri institucionale dhe ndikim të hapur politik të mazhorancës së rradhës në orientimin e këtij institucioni të pavarur.
Koalicioni nxit klasën politike që të gjejë maturinë e duhur dhe të nisë një proces serioz, real, transparent dhe gjithëpërfshirës të Reformës Zgjedhore. Institucionalizimi i debatit politik për kuadrin ligjor zgjedhor është hapi i parë dhe i vetmi drejtim i duhur për një shëndoshje të proceseve zgjedhore në vend dhe të demokracisë shqiptare”, shprehet në emër të KVV, përfaqësuesi Premto Gogo në një konferencë për mediat, bashkë me bashkëdrejtuesit e tjerë.
Lini një Përgjigje
Më të lexuarat
24 oret e fundit
Javen e fundit
Blog Tema
