Te fundit
INVESTIGIMI: Kompania “fantazmë” e italianëve hetohet për pastrim parash në Shqipëri, transferoi miliona euro drejt Italisë, Hong Kongut dhe Kinës
4 Korrik 2018, 16:58Kronika
TEMA
E themeluar në prill 2017, Sunflower Company dyshohet se ka transferuar miliona euro drejt Italisë, Hong Kongut dhe Kinës, ndërkohë që në Shqipëri nuk kryente asnjë aktivitet. Sekuestrohen llogaritë me 1.5 milionë euro.
Nga Lindita Çela
Një kompani fantazmë dhe pa aktivitet real në Shqipëri dyshohet se ka shërbyer për transferta miliona euroshe drejt Italisë, Hong Kongut dhe Kinës dhe sipas Policisë së Shtetit kishte si qëllim pastrimin e parave. Përmes një njoftimi për shtyp të mërkurën, policia deklaroi se kishte sekuestruar 1.5 milionë euro në llogaritë bankare të kompanisë së quajtur “Sunflower Company”, e themeluar në Shqipëri nga shtetas italianë.
“Kjo shoqëri e krijuar në vendin tonë nga shtetasi i huaj italian S. L., [me precedentë të ndryshëm penalë në Itali për deklarata mashtruese dhe krime në fushën e tatimeve] ka përfituar për një periudhë të shkurtër kohore sasi të konsiderueshme në valutë euro nga shoqëri të huaja,” thuhet në njoftimin për shtyp të policisë.
“Sunflower Company” është themeluar në prill 2017 me objekt që nis nga tregtimi i produkteve të naftës dhe përfundon tek tregtia e diamanteve dhe gurëve të çmuar. Sipas hetimeve, kompania është kredituar nga shoqëri të huaja dhe më pas paratë janë transferuar sërish jashtë vendit-skemë kjo e dyshuar për pastrim parash.
BIRN zbuloi përmes ekstrakteve në Qendrën Kombëtare të Biznesit se kompania “Sunfloëer Company” është themeluar nga shtetasi italian Armando Leonelli më 4 prill 2017 dhe mbante fillimisht emrin “Real Estate San Sebastiano”.
Tetë muaj më vonë, 70 vjeçari Leonelli ia shet kompaninë për 100 mijë lekë administratorit të tij, Marco Ciolini.
Dokumentet tregojnë se po në të njëjtën ditë, më 4 dhjetor 2017, Ciolini në cilësinë e pronarit të vetëm të kompanisë tashmë të quajtur “Sunflower” emëron si përfaqësues për të kryer çdo veprimtari në organet tatimore dhe administrative “Bear Consulting “ shpk, ndërsa si përfaqësues të posaçëm, Stefano Lorenzin.
BIRN kontaktoi me kompaninë “Bear Consulting” dhe përfaqësuesi i saj, Ergys Demneri tha përmes telefonit se asnjëri prej përfaqësuesve të kompanisë së dyshuar italiane nuk ndodhej në Shqipëri.
“Ne jemi një zyrë shërbimi kontabiliteti dhe konsulentësh fiskale dhe jemi të kontraktuar nga kjo kompani për të kryer aktivitetin kontabël të tyre, por asnjë prej përfaqësuesve italianë nuk ndodhen në Shqipëri, kanë ikur prej kohësh,” tha Demneri.
I pyetur për bilancet e kompanisë, Demneri sqaroi se kompania nuk ka asnjë aktivitet në Shqipëri ndaj dhe deri më tani nuk ka kryer ndonjë veprimtari kontabiliteti për llogari të tyre.
“Kompania është e re dhe nuk ka përfaqësues të tjerë përveç emrave të deklaruar në QKB. Nuk ka pasur aktivitet se sapo është krijuar, s’ka as punonjës, ndaj dhe ne nuk kemi kryer asnjë aktivitet kontabël për ta,” sqaroi eksperti kontabël.
“Tek ne ka ardhur njoftimi për hetimin e prokurorisë dhe ua kam përcjellë shtetasve italianë, por unë nuk di më shumë se sa nga ajo që është deklaruar në regjistrin e biznesit dhe sa ka deklaruar policia,” shtoi Demneri.
Të kontaktuar nga BIRN, përfaqësues të Prokurorisë u treguan të rezervuar për sqarimin e rrethanave të transferimit të shumave të konsiderueshme monetare nga një kompani thuajse inekzistente. Megjithatë, ata deklaruan se po punohet për dokumentimin e plotë të kësaj veprimtarie kriminale, e cila është regjistruar për veprën penale “Pastrimi i produkteve të veprës penale ose veprimtarisë kriminale”.
Hetimet e deritanishme të Prokurorisë dhe Policisë kanë gjetur miratimin e Gjykatës së Shkallës së Parë, e cila me vendimin nr. 3422 të datës 30 qershor 2018 ka urdhëruar sekuestrimin e llogarive bankare, gjendjeve monetare të gjetura në to si dhe asetet e kompanisë “Sunflower”.
6 komente në “INVESTIGIMI: Kompania “fantazmë” e italianëve hetohet për pastrim parash në Shqipëri, transferoi miliona euro drejt Italisë, Hong Kongut dhe Kinës”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Me kete mes ne fitojme apo humbasim?
Kompanite me te tmerrshme , per pastrim parash , ne Ballkan , I ka krijuarar Fazllic. Po nuk ishte keshtu , e vras veten .Zgalem
Kot e keni. Pastrimet e parave i bejne shtete si Zvicra, Hollanda e Luksemburgu. Vende si Shqiperia perdoren vetem si kavje. Pse budallenj jane Zvicerianet qe lejojne parat nga gjithe vendet e botes, me kusht qe te paguajne nje perqindje ne banke. Pse duhet te jemi ne me te drejte?
Kompanite italiane boll na kane mashtru, por fatkeqsia me e madhe eshte se shqiptaret vazhdojne dhe i besojne
Pa imzanë e Guvernatorit të bankës ( LIGJI ) nuk del ( bohet transaksion ) dot asnjë kacidhe .
Po pse , kot nuk e preku kush Fullanin . E nxorrën burrë të mirë dhe i dhanë edhe ca pare mbrapsht për dëmtim imazhi ( kishte ra ca kile ) .
Po pse këtë çomin kush e vuni GUVERNATOR . Vetë e hodhën atë tjetrin dhe po vetë zgjodhën këtë tjetrin . Të parët , USTALLARET . Edhe Prokurorët mbajnë radhë e servilosen tek shefat , kush të marri kësi hetmesh , me pare t’modhe e pa siklete .
E kanë gjet hajdutin . Si gjithmonë , POPULLI , Jazik i qoftë . Po na shet baston , pa kupon .
P’tu dreqi ta hajë , se kjo punë po na ndodhka veç n’Kavajë .
Jo tasheshte edhe banka e lindes,per cka shkoj i gjati atje sipas jush,a sjelli ndonje investim ne shqiperi kryem8nistri nga hongkongu? Jo pos per pastrim paresh me linden qe ia siguron transaktionet.halla s’keni mesuar gje…