Te fundit
Patozi në “Top Talk”: Vettingu politik nuk do të bëhet! S’kam asnjë lidhje me PD-në e Bashës. Edhe Berisha përgjegjës
13 Shtator 2018, 19:31Politika
TEMA
Zhvillimet e fundit politike, veçanërisht ato të opozitës, kanë qenë në fokusin e emisionit të kësaj të enjteje “Top Talk” të gazetarit Denis Dyrnjaja, ku i ftuari i radhës ka qenë njëri prej personazheve më të shquar brenda Partisë Demokratike, me role të rëndësishme drejtuese, dikur drejtues i “Rilindjes Demokratike”, organit zyrtar të PD-së, Astrit Patozi.
Ditët e fundit ka pasur një nismë të Partisë Demokratike për vettingun në politikë, i përshëndetur përmes një qëndrimi në rrjetet sociale para disa ditësh nga ana e ish-deputetit demokrat, por që dje në një tjetër reagim të tij kishte theksuar se PD-ja është në ditët e saj më të këqija të 20 viteve të fundit. Kësaj dileme qëndrimesh, Patozi i është përgjigjur pikërisht në intervistën e dhënë në studion e “Top Talk”.
“Të dyja qëndrimet janë të vërteta, teksa provojnë se unë nuk paragjykoj. Kur flas përpiqem të jem i ftohtë dhe i barazlarguar nga emicionet. Vijoj t’i mbetem pikëpamjes sime që vettingu është një gjë e dobishme për politikën, madje jam ndër ata që mendoj se vettingu mund të ishte bërë më herët, apo i njëkohshëm me vettingun në drejtësi. Ndërkohë, unë i qëndroj plotësisht pikëpamjes që Partia Demokratike sot është në kohën e vet më të keqe në të gjithë historinë e saj, kryesisht për shkak të lidershipit të gabuar të Lulzim Bashës. Nuk më pengon asgjë të them se, në rast se Basha e ka seriozisht sfidën apo projektin e vettingut, unë do ta mbështes në të gjitha rastet. Por dyshoj te ky seriozitet, sepse kam parë zhvillimet pas lançimit të idesë, që më lënë një shije të keqe. Mënyra sesi janë sjellë palët që nga dita e anonçimit nga Basha, është e tillë që të krijon idenë e një teatri, ku të dyja palët nuk duan që të bëhet, por që po përpiqen me shumë sforco që t’ia lënë dopio gjashtën në dorë palës tjetër”, deklaroi Astrit Patozi.
Ai vijoi më tej madje, kur shprehu bindjen dhe jo vetëm, se vettingu politik nuk do të bëhet.
“Është një ngjarje e sigurtë. Është një truk i të dyja palëve, por në këtë rast opozita ka më shumë përgjegjësi për dy arsye: së pari, sepse ishte ajo që e lançoi dhe mund ta evitonte nëse nuk e kishte seriozisht; dhe së dyti, sepse opozita është ajo që duhet ta shkundë pushtetin që të shkojë në moralin e saj”, shpjegoi Patozi.
Megjithatë, nëse dy njerëz bëjnë bashkë një truk politik, kjo nënkupton se ata duhet të jenë aleatë politikë. A janë aleatë fluidë Lulzim Basha dhe Edi Rama, në këndvështrimin e Patozit?
“Këtë nuk mund ta them, por them se ata kanë ngjashmëri dhe shumë pika takimi, ndërsa janë të ndryshëm në shumë gjëra të tjera. Ajo që mund të them me siguri është që mes tyre ka pasur një marrëveshje shumë të qartë dhe evidente vitin e shkuar, para zgjedhjeve parlamentare, që e di kushdo. Kjo marrëveshja që pati rezultatin e saj mund të mos jetë në fuqi, për shkak se Basha nuk mori atë që pretendonte apo priste prej saj, ndërkohë që Rama mori atë që shpresonte”, shprehet Patozi.
Sipas tij, herë pas herë Basha përdoret nga Rama, për të mos thënë në të gjitha rastet. Patozi aludon më tej se, edhe nëse nuk ka një marrëveshje të shkruar mes palëve, ka një marrëveshje në heshtje që ekziston në shumë detaje të jetës politike në Shqipëri.
“Marrëveshja e heshtur nënkupton se të dyja palët janë njësoj të interesuara që Reformë Zgjedhore të mos ketë, ndërkohë që Basha duhej të ishte njeriu më i interesuar në Shqipëri që kjo reformë të bëhej. Fakti që Basha mbetet gjithnjë në opozitë, do të thotë se nuk i intereson dhe ky është problemi më i madh që shqiptarët nuk e kuptojnë, edhe demokratët gjithashtu. Lulzim Basha do që të jetë i dyti gjithmonë, sepse e ka të pamundur ta mendojë veten se mund të jetë fitues, ndoshta sepse i mungojnë shumë cilësi të nevojshme për të qenë një udhëheqës. Në rast se Basha do ta pretendonte pushtetin, do të ishte njeriu i parë që nuk do të linte asgjë mbi tokë pa bërë që të kishte Reformë Zgjedhore, e cila do të shkundte sistemin dhe të kishte ndryshime Kushtetuese. Ky sistem, të paktën në 3 zgjedhjet e fundit ka sjellë një rezultat dramatik për PD-në apo partinë që drejton Basha. Ai nuk e bën këtë dhe po tregohet i pandershëm me aleatët e tij, por edhe me publikun”, tha Astrit Patozi.
Patozi shpjegoi gjithashtu se një opozitë që pretendon se qeveria vjedh zgjedhjet, minimumi duhet të kërkojë të ndryshohet ligji, pastaj të përpiqet që t’i bëjë presion qeverisë të mos ia vjedhë votat.
Por pavarësisht shportës plot me kritika për Lulzim Bashën, teksa ka denoncuar si të manipuluara zgjedhjet në PD, e për më tepër premtimit të një fushate agresive politike brenda partisë për ta ndryshuar atë, duket se gjithçka ka rënë në heshtje, e tek-tuk ka ndonjë reagim të mefshtë të ndonjë nga personazhet e PD-së, prej të cilave Basha duket se nuk shqetësohet.
A mos vallë Patozi është një lloj aktori i veçuar politik, madje si komentator politik dhe jo më si aktor protagonist i Partisë Demokratike? Kësaj pyetjeje dhe të tjerave, Astrit Patozi iu është përgjigjur në emisionin “Top Talk” të gazetarit Denis Dyrnjaja, në Top Channel, gjatë kësaj të enjteje.
“Unë nuk vij të përfaqësoj qindra mijëra njerëz, megjithëse mund t’i përfaqësoj ata. Nuk i njoh vetes ndonjë mision që duhet të shpëtoj kombin apo PD-në nga kthetrat e Lulzim Bashës apo nga korrupsioni. Unë nuk kam përgjegjës që të udhëheq një lëvizje qoftë brenda partisë, qoftë jashtë PD-së. Por, unë ndiej detyrimin që në radhë të parë brenda partisë time të thoja disa të vërteta dhe nuk kam rreshtur për këtë”, u përgjigj Patozi.
Një deklaratë që mund të interpretohet edhe si vetëpërjashtim, si një kundërshtar i Lulzim Bashës në një garë të ardhshme politike.
“Jo, unë nuk mund të garoj kurrë në një parti, me të cilën nuk kam më asnjë lidhje. E kam deklaruar para disa muajsh se nuk më lidh asgjë me Partinë personale të Lulzim Bashës, ndërkohë që për mua Partia Demokratike nuk ekziston më. Megjithatë, aktiviteti im politik nuk ka marrë fund, edhe pse nuk jam këtu sot për të shpjeguar se cili do të jetë fati im politik. Unë mbetem qytetar i angazhuar dhe njeri me vëmendje absolute për zhvillimet politike të vendit, sepse ndiej detyrimin që disa të vërteta duhet t’i them. Koncepti im për politikën është i tillë, që jo thjesht PD-ja, por Shqipëria ka nevojë për një lëvizje që duhet të vijë nga e djathta, sepse Shqipëria ndodhet në një kënetë depresive nga e cila nuk mund të dalë me opozitën me paterica të Lulzim Bashës, i cili sot ka marrë peng PD-në dhe opozitën në përgjithësi”, deklaroi Patozi.
Por, a mundet Astrit Patozi të japë një opinion si qytetar i angazhuar dhe njohës i mirë i PD-së, se çfarë është Sali Berisha për Partinë Demokratike sot?
“Sali Berisha është një figurë e rëndësishme për PD-në, roli i të cilit sigurisht që vjen duke u zbehur me kalimin e viteve dhe nuk kemi përse çuditemi për këtë, sepse është ligj i natyrës. Sali Berisha ka përgjegjësitë e tij për kohën që ka udhëhequr Partinë Demokratike, por ndoshta edhe për epokën pasi dorëzoi stafetën. Por pas vitit 2013 nuk është vetëm përgjegjësia e tij. Edhe unë që po flas tani kam përgjegjësitë e mia, sikurse shumë të tjerë. Unë i mbaj turpin çdo njeriu që ka pasur mundësi ta ndalojë këtë erozion të frikshëm të Partisë Demokratike dhe nuk ka bërë detyrën e tij. Njeri që me veprimin ose mosveprimin, heshtjen apo fjalën e tij ka ndihmuar Lulzim Bashën që ta çojë PD-në në këtë gjendje”, deklaroi Patozi.
1 komente në “Patozi në “Top Talk”: Vettingu politik nuk do të bëhet! S’kam asnjë lidhje me PD-në e Bashës. Edhe Berisha përgjegjës”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Vetingun ne politke dhe kudo ne jeten shoqerore e ben vetem dhe vetem drejtesia. Po u vendos ajo ne binare, vetingu eshte i bere. Te tjerat jane pallavra. Do beje veting deputet Saliu per vete?! Kjo eshte nje çudi qe nuk e pranojne as te vdekurit qe i ka derguar Saliu ne ate bote e jo me te gjallet qe ulurijne per Saliun e atij me shume i rriten parate dhe llafet çdo dite! Talluni se demokracia qe pretendohet paska qene per maskarenjte, intrigantet, antikombtaret, tradhetaret, hajdute e kriminelet. Rrofte demokracia jone qe na e vuri para e mbrapa.