Te fundit
Kolegji konfirmon shkarkimin e prokurorit Elsion Sadiku
5 Prill 2019, 18:52Kronika
TEMA
Trupi gjykues i Kolegjit të Posaçëm të Apelimit kryesuar nga Ardian Hajdari, Ina Rama relatore dhe anëtarë Albana Shtylla, Luan Daci, Sokol Çomo, hodhi poshtë të mërkurën ankimin e prokurorit Elsion Sadiku, duke lënë në fuqi vendimit nr. 50, të datës 27 korrik 2018 të Komisionit të Pavarur të Kualifikimit.
Sadiku, prokuror në Prokurorinë e Korçës ishte përfshirë në listën prioritare të vetingut për shkak të kandidimit për Këshillin e Lartë të Prokurorisë.
Sipas vendimit të zbardhur, KPK vedosi shkarkimin e tij nga detyra pasi hetimi administrativ gjeti pasaktësi në deklarimin e pasurisë dhe mangësi në hetimin e dy çështjeve.
Në vendimin e zbardhur rezulton se treshja e KPK e kryesuar Brunilda Bekteshi, me relator Olsi Komici dhe anëtar Lulzim Hamitaj, gjeti që Sadiku nuk mund të justifikonte ‘në mënyrë të ligjshme’ kursimet e bashkëshortes para korrikut 2009 dhe për rrjedhojë një sërë transaksionesh që ishin bazuar mbi këto kursime, përfshi blerjen e disa pajisjeve për një klinikë dentare private.
“Ka pasaktësi në deklarimin e burimeve financiare, deklarim të pamjaftueshëm të të ardhurave, si dhe ka burime financiare të paligjshme e, për rrjedhojë, ka burime financiare të ligjshme të pamjaftueshme për kryerjen e investimeve përkatëse”, thuhet në vendimin e KPK-së.
KPK gjeti po ashtu mangësi në hetimet e kryera nga prokurori. Në një hetim ndaj një dekani të Universitetit të Korçës, KPK shprehet se Sadiku nuk kishte kryer hetim të thelluar sa i përket një denoncimi që pretendonte se dy diploma të lëshuara në Bullgari ishin false. Po ashtu sipas KPK-së, pushimi pa hetuar i një kallëzimi për ekspertizë të falsifikuar në një gjyq civil, tregonte mangësi profesionale.
Sa i përket pasurisë, Sadiku u mbrojt duke pranuar se nuk mund të sillte dokumente provuese për të ardhurat e bashkëshortes para se ata të lidheshin në martesë, megjithëse paraqiti deklarata noteriale të punëdhënësit të saj. Ndërkohë, sa i përket dyshimeve mbi profesionalizmin, ai i mbrojti vendimet që kishte marrë duke i thënë Komisionit se në të dy rastet, hetimet përtej asaj që ai kishte bërë nuk kishin qenë të nevojshme.
Lini një Përgjigje
Më të lexuarat
24 oret e fundit
Javen e fundit
Blog Tema
