Astrit Patozi: Shqipëria nuk mund të rrijë peng i tekave të politikanëve

Koordinatori i Partisë Bindja Demokratike, Astrit Patozi, ishte i ftuar në “Ditarin” e orës 13:00, nga ku foli për zhvillimet e fundit politike në vend dhe veçanërisht për anulimin nga presidenti të 30 qershorit si datë për mbajtjen e zgjedhjeve.

Patozi u shpreh se Shqipëria nuk mund të rrijë peng i tekave të politikanëve.

Ai theksoi se akti i Metës nuk ka referenca kushtetuese, por politike.

Intervista e plotë

Gazetarja: E nisa në fakt nga zhvillimet e fundit por do të doja ta nisja me qëndrimin tuaj nga data 8 qershor, ditën kur presidenti njoftoi anullimin e zgjedhjeve të 30 qershorit. Edhe ju njëlloj si rivali juaj në zgjedhje, si Z. Rama, e keni cilësuar vendimin e 8 qershorit si antikushtetues. Megjithatë edhe pse Presidentin e keni quajtur të papërgjegjshëm, si i keni parë argumentat kushtetues të dhëna nga Presidenti përgjatë këtyre 48 orëve në dy dalje publike.

Astrit Patozi: Ajo që kam thënë unë për të qenë korrekt, nuk kam thënë që është i papërgjegjshëm. Unë kam thënë që Presidenti nuk ka referenca kushtetuese por ka referenca politike. Pra, ka bërë një analizë të situatës dhe pas kësaj analize ka krijuar një opinion. Kjo sipas nesh është e pamjaftueshme sepse Presidenti është i detyruar të jetë strikt neneve të Kushtetutës dhe jo të ketë një analizë dhe të ketë një opinion për gjendjen dhe të marrë vendimin pastaj. Kjo është ajo që ne e quajmë të papranueshme dhe sigurisht që kemi qasjen tonë dhe mendojmë që nuk është kushtetuese çdekretimi i datës së zgjedhjeve, por tek e fundit nuk jemi ne që e vendosim por ne jemi njëra nga partitë garuese në zgjedhjet e 30 qershorit. Ata që do ta vendosin se cila do të jetë data e mbajtjes së zgjedhjeve, sipas nesh janë institucionet shqiptare në kushtet që Presidenti ka një qëndrim tjetër. Janë institucionet shqiptare dhe faktori ndërkombëtar i cili është shtuar të monitorojë zgjedhjet por tek e fundit është edhe arbitri i të gjitha sherreve, i gjithë progresit apo regresit që bën Shqipëria, në këto vite. Ne e kemi zgjedhur vetë që të marshojmë drejt Bashkimit Europian dhe sigurisht që do të presim edhe qëndrimin e partnerëve tanë strategjikë që janë Bashkimi Europian dhe Shtetet e Bashkuara të Amerikës. Qëndrimi i tyre për këto besojmë që do të jetë sinjifikativ.

Gazetarja: Unë e përmenda, sot pasdite Presidenti do të nisë konsultimet me partitë politike, për ta nisur me partitë e grupimit të Qendrës së Djathtë. Pra, nëse do të kemi një ftesë zyrtare, publike për tu konsultuar me Presidentin për një tjetër datë zgjedhjesh, a do të pranoni, në cilësinë e një subjekti që merr pjesë në zgjedhje?

Astrit Patozi: E para njëherë, unë nuk mund të flas për sa kohë nuk kam një ftesë. Nuk mund të flas më nëse, por nëqoftëse doni një koment timin për këtë gjë, por edhe çështja që presidenti nis konsultimet me disa parti të vogla të cilat në një farë mënyre ja kërkuan të shtyjë datën e zgjedhjeve, e nis me ata dhe nuk e nis me aktorët kryesorë, në rast se Presidenti do ishte serioz në ftesën e tij, duhet ta niste me aktorët kryesorë në Shqipëri të cilët janë Partia Socialiste dhe Partia Demokratike duam apo sduam ne. Ata janë dy forcat kryesore politike, mazhorancë dhe opozitë. Ai e nis me këta që i kërkuan shtyrje të zgjdhjeve dhe duket sikur meqë i ka më shumë shokë e nis ma ata. Më duket jo serioze edhe fakti që niset me disa parti që kanë predispozitë për ta mbrojtur vendimin e Presidentit, i cili sot është i debatueshëm. Sot shoqëria Shqiptare është e ndarë lidhur me dekretin e Presidentit, me çdekretimin e Presidentit, ndaj kjo më duket jo serioze megjithatë kjo është një çështje që besoj do të kristalizohet në ditët në vijim dhe unë besoj që Shqipëria nuk mund të rrijë peng i tekave të politikanëve. Ne sot nuk mund të kemi dy të vërteta, nuk mund të ketë dy të vërteta për të njëjtën çështje. Se jemi mësuar që njëra palë thotë kështu dhe pala tjetër thotë ashtu. Në fakt e vërteta është vetëm një, dhe kush e ndan këtë gjë? Nuk e ndajnë partitë, partitë janë palë. Pra edhe Partia Socialiste edhe Partia Demokratike por edhe parti më të vogla duke përfshirë edhe BINDJEN DEMOKRATIKE e cila është edhe partia më e re, nuk e ndajnë të vërtetën. Të vërtetën duhet ta ndajnë institucionet, këto që janë, me gjithë rezervat që ne mund të kemi, dhe kemi plot. Pa diskutim, por me këto institucione kështu ka ndodhur gjithë kohën në Shqipëri. Edhe në momente krizash më të mëdha se kjo e sotmja, institucionet kanë qënë ato që kanë folur fjalën e fundit ky është sistemi, kjo është demokracia.

Gazetarja: Në mungesë të institucioneve siç është rasti i Gjykatës Kushtetuese?

Astrit Patozi: Po pra, në mungesë të Gjykatës Kushtetuese janë institucionet e tjera sepse mungesa e Gjykatës Kushtetuese, e kam thënë disa herë këtë gjë edhe dëshiroj që ta nënvizoj prapë, mungesa e Gjykatës Kushtetuese nuk mund të shërbejë si argument që ti ta teprosh apo që ti ta çosh deri në fund zullumin. Është e kundërta, pra institucionet shqiptare në mungesë të Gjykatës Kushtetuese, pra këtu kam parasysh Presidentin, qeverinë, parlamentin, institucionet më të rëndësishme të shtetit, nuk mund ta konsiderojnë këtë si një mënyrë për ta çuar deri në fund dëshirën e tyre. Duhet të ishte e kundërta, pra mungesa e Gjykatës Kushtetuese, e para njëherë është e përkohshme pra fakti që nuk ka Gjykatë kushtetuese sot nuk do të thotë që nuk do të ketë nesër. Një shtetar i përgjegjshëm duhet të thotë se çfarë do bëjë Gjykata Kushtetuese nesër kur të formohet, mbi këtë vendim? Sepse ne nuk jetojmë sot për sot, jetojmë sot për nesër, për të ardhmen. Institucionet këtë përgjegjshmëri duhet ta kenë apo jo? Por në kushtet e datës së zgjedhjeve, Gjykata Kushtetuese për fat është shprehur disa vite përpara dhe ka thënë që nuk është tagër i saj që të vendosë për çështjen e zgjedhjeve. Pra, është Kolegji Zgjedhor ai që i jep drejtim dhe formë të plotë kësaj situate.

Gazetarja: Z. Patozi ndalemi pak tek ajo çka pritet të ndodhë nesër në parlament. PS, maxhoranca ka nisur proçedurat për shkarkimin e Presidentit. Dua t´ju citoj korrekt “LSI votoi me shpirt ndër dhëmbë, Partia Socialiste votoi me inat sikur po firmoste, jo për zgjedhjen, por për internimin e Ilir Metës”, e keni rikujtuar edhe sot një status tuajin të prillit 2017 kur Z. Meta u zgjodh President. Mendoni se këtë po bën maxhoranca sot pas dy vitesh nga zgjedhja e tij, po mundëson atë që nisi në prill të vitit 2017?

Astrit Patozi: Po të ishte thjesht për mazhorancën, maxhoranca e meriton këtë që po ndodh. E meriton plotësisht sepse maxhoranca para dy vitesh e trajtoi institucionin e Presidentit sikur të ishte internim. Pra, deshi që një aktor të rëndësishëm të politikës brenda së majtës, ta izolonte duke e bërë president. Ky është një keqkuptim shumë i madh dhe një abuzim shumë i madh me politikëbërjen dhe me pushtetin në Shqipëri. E në njëfarë mënyre sot mazhorancës po i kthehet në të kundërt, pra po i kthehet në boomerang një gjë e tepruar që e bëri para dy vitesh. Unë nuk i heq asnjë presje asaj që kam thënë në atë kohë e cila është shumë aktuale sot. Mirëpo, tek e fundi ne nuk mund të gëzohemi me këtë fakt, nuk mund të gëzohemi që mazhorancës po i del nga hundët një gafë shumë e rëndë dhe një gbim që bëri para 2 viteve. Pse? Sepse këtë po e vuajnë të gjithë shqiptarët. Nëse do ishte vetëmpër mazhorancën, do ishte shumë mirë që po i ndodh, bile dhe më shumë sikur ti ndodhi, prap nuk do ishte e tepruar, por këtë po e vuajnë të gjithë shqiptarët të cilët sot janë të ndarë, të polarizuar, pa asnjë kuptim, sepse njëra palë mendon që zgjedhjet duhen bërë në 30 qershor dhe pala tjetër thotë që nuk duhen bërë, duhen shtyrë dhe madje s´duhet të ketë datë zgjedhjesh fare. Kjo nuk mund të ndodhi, Shqipëria nuk mund të ketë dy data zgjedhjesh, nuk mund të ketë një datë zgjedhjesh për mazhorancën apo disa parti dhe një datë tjetër për disa parti të tjera, sepse ky është teprim i madh dhe ne jemi bërë edhe qesharakë edhe në sytë e botës kam përshtypjen.

Gazetarja: Megjithatë ju Z. Patozi jeni faktor le të themi. Jeni shprehur duke sjellë në kujtesë një reagim tuajin pas anullimit të 30 qershorit se për BINDJEN DEMOKRATIKE data e zgjedhjeve nuk ka rëndësi. A do të jeni ju i gatshëm për të ndihmuar ndoshta si i vetmi faktor në mes të të gjithë kësaj situate për t´u tërhequr, për të lënë mazhorancën të vetme në garë? Ndoshta për të garuar në një datë të re?

Astrtit Patozi: Po pse kjo është rruga? Rruga që të tërhiqesh nga zgjedhjet është rruga që mund ta zgjidhim?

Gazetarja: Ndoshta për të krijuar zgjedhje edhe më me standard apo me gjithëpërfshirje.

Astrit Patozi: Nëqoftë se kjo do të ishte zgjidhje ne sigurisht që do jepnim kontributin tonë, por ne mendojmë se nuk është kjo zgjidhje. Pse? Sepse mazhoranca do të bënte të njejtën gjë, do të shkonte në zgjedhjet e 30 qershorit edhe nëse partia jonë nuk do të krijohej fare, pra nuk është krijimi i partisë tonë që e çuar mazhorancën në zgjedhjet e 30 qershorit, absolutisht jo. Por, sigurisht që ne jemi futur në këtë mes, në këtë marrëzi politike do thoja për t´i dhënë shqiptarëve një opsion më të mirë dhe e vetmja gjë, i vetmi kontribut që ne mund të japim në këtë çmenduri politike është që t´i ftojmë palët që t´i thërrasin arsyes dhe të gjejnë një zgjidhje nëse është e mundur dhe ne këtë e kemi bërë që ditën e parë të krijimit, pra i kemi ftuar palët. Ne kemi dashur që në këto zgjedhje të mos kishte mungesa, asnjë mungesë mundësisht, asnjë parti 1 përqindëshe të mos mungonte, jo më parti relevante. Por, ajo që ne kemi thënë ka rënë në vesh të shurdhër, se nuk është përgjegjësi e jona tani që njëra palë thotë që nuk do hyjmë në zgjdhje dhe pala tjetër thotë që do ketë zgjedhje patjtër. Ne, sigurisht, nuk kemi qenë refrektarë për datën e zgjedhjeve, ne kemi thënë që ne do të hyjmë në zgjedhje kurdo që ato të mbahen dhe i qëndrojmë Bindjes sonë, por ditën e zgjedhjeve, ne nuk mendojmë që e vendos njëra palë, absolutisht, e vendosin institucionet dhe faktori ndërkombëtar, i cili është ftuar për të qenë arbitri i këtyre zgjedhjeve. Kështu e mendojmë ne, kështu e lexojmë ne.

Gazetarja: Ju e vijoni fushatën zoti Patozi, BINDJA DEMOKRATIKE? Z. Rama pas dy ditësh ndërprerje u rikthye.

Astrit Patozi: Ne vijojmë. Fushata jonë ka qenë fushatë modeste, për shumë arsye, por mbi të gjitha për qasjen tonë. Ne kemi thënë që ditën e parë, ne nuk do të bëjmë fushatë mitingjesh. Ne i refuzojmë mitingjet si një formë e shëmtuar e politikës së vjetër, ku njerëzit ftohen jo për të dëgjuar, jo për të bashkëbiseduar, por njerëzit ftohen vetëm si sfond i politikanëve të mëdhenj. Ne e refuzojmë këtë lloj mënyre. Ne duam që të shkojmë atje ku janë njerëzit dhe ne po vijojmë që të bëjmë fushatën tonë modeste duke shkuar atje ku janë qytetarët dhe duke biseduar me ta. Sigurisht që për ne nuk ka ndonjë vlerë të madhe ky debat që po bëhet sepse e ritheksojmë, ne do shkojmë në zgjedhje kurdo që ato të mbahen.

Gazetarja: Megjthatë, ju kanë akuzuar se po ndihmoni qeverinë, mazhorancën, për më tepër në mes të kësaj situate kur garoni vetëm në 25 bashki dhe pjesa tjetër le të themi është një fitore në tryezë për Partinë Socialiste?

Astrit Patozi: Po mirë, çfarë të bënim ne që kaq fuqi kishim?

Gazetarja: Ndoshta për të marrë më shumë kohë për të bërë zgjedhjet në një moment të dytë mund të plotësoni numrin e kandidatëve bashkë dhe me pjesën tjetër?

Astrit Patozi: Po nuk e kemi qëllim në vetvete, pse na e qajnë kaq shumë hallin ne? E para njëherë, të dy palët në këtë rast na kanë akuzuar, pra njëra palë thotë që jeni patericë e qeverisë ndërkohë që ne po përballemi me qeverinë, kurse ata kanë lënë fushën fare. Kurse, pala tjetër thotë që këta i ka futur Saliu. Dhe pse? Sepse këta të dy dinosaurët e politikës në Shqipëri që kanë çuar në këtë krizë, se këta të dy e kanë çuar në këtë krizë me pazarin e shpifur që bënë përpara dy vjetësh, por edhe me të gjithë historinë e këtyre viteve të fundit, janë mësuar që nuk mund të ketë gjë tjetër, përveçse atyre të dyve. Pra, në rast se s´je me njërin prej tyre, je me kundërshtarin, se nuk mund të jesh më vete ti, sepse këta mendojnë që Shqipëria është ose Rilindja, ose Republika e Re. Këta nuk pranojnë që ti të kesh një opsion krejt tëndin, të kesh një projekt krejt tëndin, që është absolutisht i kundërt me të dy forcat kryesore politike. Ne pikërisht për këtë punë nuk na bën asnjë përshtypje, nuk kemi asnjë impresion nga akuzat e ndërsjellta që janë nga të dy palët. Pse? Sepse thjesht i konsiderojmë si reklamë që ky projekt i ri politik, mesa duket ka ngjallur tronditje në të dy partitë e vjetra.

Gzaetarja: Mendoni se z.Rama në këtë rast po luan bllofin? Citoj në këtë rast z.Basha. Bashkë me këtë ka ardhur edhe një reagim për mosuljen në tryezë me z.Rama si kryeministër. E mendoni që mazhoranca do t’i shkojë deri në fund shkarkimit të Presidentit Meta për t´ju rikthyer edhe njëherë?

Astrit Patozi: Unë nuk dua të bëj fallxhorin këtu, aq më tepër kur edhe kjo fjala fallxhor është përmendur shumë këto kohët e fundit dhe nuk dua të jem fallxhor. Unë shikoj dhe vlerësoj politikën përmes akteve publike, pra nuk më intereson shumë kulisa, takimet e fshehta.

Gazetarja: Edhe pse ka patur takime të fshehta.

Astrit Patozi: Po pra po, ka patur edhe do të ketë pa diskutim. Edhe janë pjesë e politikës por në finale ato që mbeten janë aktet publike dhe aktet publike janë ato që e vendosin, e ndajnë gjënë që është pozitive apo negative. Pra, unë jam i detyruar që të gjykoj vetëm mbi faktet dhe mbi aktet publike dhe për sa kohë që unë nuk shikoj që të ketë ndonjë moment reflektimi apo ndonjë moment uljeje tonesh apo uljeje armësh, sigurisht që unë besoj që Shqipëria do të shkojë rrakapjekthi deri më 30 qershor edhe në rast se do të ketë zgjedhje. Ajo që unë lexoj dhe që dua ta theksoj është që mënyra se si palët i janë kundërvënë njëra tjetrës, duket sikur më datë 1 korrik nuk ka vend për të dy udhëheqësit kryesorë, pra edhe për Edi Ramën edhe për Lulzim Bashën sepse ka vënd vetëm për njërin prej tyre. Në rast se ai që do të bjerë do të jetë Edi Rama ne do të jemi shumë të lumtur por në rast se do të bjerë Lulzim Basha pastaj, ne nuk kemi asnjë përgjegjësi për këtë.

Gazetarja: “Është një realitet i krijuar artificialisht” e keni cilësuar këtë krizë politike. Përse artificialisht kur opozita nuk merr pjesë në zgjedhje, kur Komisioni Qëndror i Zgjedhjeve, institucioni i cili duhet të pregatisë të gjithë infrastrukturën zgjedhore, është i paplotësuar kur opozita parlamentare kushtëzon votën e saj me reformën zgjedhore për t´i mundësuar mazhorancës 94 vota për shkarkimin e Presidentit, për të nisur proçedurat.

Astrit Patozi: Po se ne mendojmë që zgjidhje nuk vjen përmes djegies së mandateve dhe mospjesëmarrjes në zgjedhje. Nëqoftëse do ishte kështu, do ishte shumë e lehtë. Çdo parti politike që është në opozitë e kishte shumë të thjeshtë për ta rrëzur qeverinë, mjafton të digjte mandatet dhe nuk merrte pjesë në zgjedhje dhe ja ku u zgjidh situata. Nuk është kjo. Kjo është një gjë e pandodhur, është një precedent që s´ka ndodhur askund tjetër, por po ndodh në Shqipëri. Pra, nuk është normalitet ky, prandaj themi që është artificiale. Ne i bie që duhet të bënim të njëjtën gjë si Partia Demokratike, prandaj akuzohemi ne që jemi qeveri dhe pse hymë në zgjedhje. Në fakt, në zgjedhje kanë hyrë edhe shumë parti të tjera, të cilat nuk citohen, por citohemi vetëm ne, se ne jemi problemi. Po ne kjo nuk na bën përshtypje. Pra, themi që eshtë artificiale sepse instrumenti që është gjetur, për ne është i stisur, nuk është instrument normal. Pra, jemi në një situatë anormaliteti politik për shkak të një qëndrimi që sipas nesh është gabim.

Gazetarja: Nëse ky anormalitet vijon, mendoni dhe i qëndroni bindjes se zgjedhjet do të zhvillohen në 30 qershor, apo mbetet për t´u parë në këto tre javë?

Astrit Patozi: Unë i qëndroj BINDJES DEMOKRATIKE që datën e zgjedhjeve e vendosin institucionet shqiptare dhe faktori ndërkombëtar, të cilin ne vetë e kemi ftuar dhe drejt të cilit ne duam, aspirojmë që të shkojmë. Dhe ne do t´i qëndrojmë çdo vendimi që këto dy faktorë do të ndërmarrin.

Myslim Murrizi: PS-ja nuk do ta shkarkojë Metën, një grusht militantësh po e quajnë shpëtues

16:44 Politika

Taulant Balla: 30 Qershorin s'e luan as topi, Meta bëri një vrimë në ujë dhe do i japim përgjigjen e merituar

16:37 Politika

“Zgjedhjet duhet të bëhen më 30 Qershor” PD sulmon anëtarin e Bundestagut

15:31 Politika

E PLOTË/ Delegacioni i deputetëve të Bundestagut "vulos" fatin e zgjedhjeve: Të bëhen më 30 qershor, opozita e ka kthyer në sport bojkotimin e institucioneve

15:21 Politika

DETAJET: PS feston themelimin, Rama dhe eksponentët më të lartë mblidhen bashku me mbështetësit në Tiranë

15:06 Politika

Çfarë po përgatit Meta dhe frika e Bashës

15:01 Politika

VIDEO/ Kujt i besoni, Metës apo Juncker?! Rama pyet shqiptarët

14:53 Politika

30 qershori, delegacioni gjerman: Partitë s'janë të detyruara të marrin pjesë në zgjedhje. Bojkoti i parlamentit do të thotë bojkot i demokracisë

14:31 Politika

VIDEO LAJM/ Kur Berisha akuzonte Metën për vjedhjen e floririt në Krrabë

14:05 Politika

Refuzuan dekretin e Metës, forcat e sigurisë marrin në mbrojtje 4 anëtarët e KQZ

14:02 Politika