Te fundit
Ç’paska qenë, shtiu në dorë dhe OSBE
14 Janar 2020, 20:02Blog
TEMA
Nga Skënder Minxhozi
Po të dëgjosh një figurë të lartë të të djathtës historike, tryeza e djeshme e partive që shënoi startin e reformës zgjedhore, ishte edhe ajo fryt i një vendimi të dyshimtë gjykatash. Jozefina Topalli e drejtoi gishtin tek mbyllja e dosjes të lobimeve me prapavijë ruse ndaj kreut të opozitës Lulzim Basha, si parakushti i uljes së opozitës në tryezën e bisedimeve për zgjedhjet. Gjithçka mund të ndodhë, “jetojmë në Tironë”, siç thotë kënga e njohur. Ajo që e tejkalon këtë batutë të Topallit, është ndërkaq axhenda e komplikuar e vitit politik ku sapo jemi futur. Një kalendar ku spikat në sfond kriza e tërmetit, presidenca e OSBE, shpresat e ringjallura për një hapje negociatash gjatë Samitit të Zagrebit, kërcënimi i papritur iranian, reforma e sipërcituar elektorale dhe e lidhur me të, shpata hipotetike e Demokleut – zgjedhjet e parakohshme.
Shumë mish në zgarë, do të thoshte dikush, për stomakun e lodhur të shqiptarëve. Ashtu duket, por a nuk kanë qenë të tilla të gjitha vitet politike ë këtë vend prej kohësh që s’mbahen mend? Ose zgjedhje, ose kriza, ose të dyja bashkë! Kjo ka qenë menuja shqiptare.
Në këtë amulli datash, ngjarjesh dhe faktorësh me ose pa peshë, ftesa që morëm në fillim të janarit në “ballon” vjeneze të OSBE, është pa asnjë dyshim rrethana më e habitshme dhe e pazakontë ku një qeveri shqiptare e ka parë veten ndonjëherë. Pa mësuar tangon e maturës, na ftojnë të japim mësime valsi! Vendi që pyeste ambasadorin e OSBE edhe për sherret mes banorëve të Cërrikut dhe administratës lokale për tubacionin e ujit, apo që ankohet në Vjenë edhe për votat e vjedhura në Malësinë e Madhe, tani e sheh veten në pultin e komandimit të krizës së Krimesë!
Ja që loja e rotacionit në organizmat ndërkombëtare i njeh edhe këto kapërcime surreale. Që në janar na është vënë përpara një detyrë e vështirë diplomatike, një ekuacion me shumë të panjohura në fushën e bashkëpunimit, paqes dhe sigurisë, pa i pasur asnjërën nga të treja në shtëpinë tonë.
Takimi i parë i palëve për reformën zgjedhore është një gjest i ndrojtur që mund të prishet edhe nga puhiza më e lehtë e erës dimërore. Megjithatë është një hap i parë në drejtimin e duhur. Për zgjedhjet duhej folur prej kohësh, pasi si sistemi zgjedhor, ashtu edhe kodi zgjedhor, si dy kolonat e mëdha mbi të cilat ngrihet menaxhimi i votës së shqiptarëve, kanë nevoja urgjente për rishikim.
Është ende herët të parashihet se cilat do të jenë preferencat e partive të mëdha. Megjithatë po duket qysh tani së largu se nuk i kanë me qejf listat e hapura të kandidatëve. Japin shumë pushtet listat e paravendosura të deputetëve dhe pushteti është një mall i çmuar në zyrat e kryetarëve. Megjithatë në parim ka pak rëndësi se me cilin sistem votojmë. Rëndësi ka të mos shkelen rregullat, sistemet nuk janë të këqia në vetvete. Të këqia i bëjnë hiletë gjatë rrugës.
Nuk e dimë nëse do të kemi ose jo zgjedhje të parakohshme këtë vit. U duk sikur vitin që shkoi zgjedhjet mund të ndodhnin nga njëra protestë e opozitës tek tjetra, e megjithatë ajo që ndodhi ishte vetëm largimi vullnetar dhe absurd i opozitës nga gjithçka që zotëronte. Le të urojmë që këtë vit të fitojë mb të gjitha arsyeja dhe logjika e urtë, që thotë se me tërmetin e 16 nëntorit dhe presidencën e OSBE nëpër këmbë, mirë do të ishte që vendimet të ishin sa më kolegjiale dhe të dakordësuara. Jo në formën që Lulzim Basha nënkupton dakordësimin, pra me qeveri ekspertësh pa kokë dhe këmbë, por në formën e vendimmarrjeve që të kenë parasysh pozitën delikate ku ndodhet Shqipëria e vitit 2020.
Jo për gjë, por nëse do plasin rrëmujat e sherret, ka të ngjarë që gjatë rrugës të dalë Petrit Vasili dhe të bëjë një nga fletrrufetë e veta klasike, duke u ankuar se Edi Rama, pasi vodhi gjykatën kushtetuese, gjykatën e lartë, prokurorinë e përgjithshme, të gjitha gjykatat e imagjinueshme të shkallëve të ulëta, Teatrin e Operas, kombëtaren e futbollit dhe skuadrën e zjarrfikësve, që nga janari ja doli të shtjerë në dorë edhe…OSBE! Një situatë e tillë tragjikomike do të ishte e tepërt. Mos u grindni, se nuk keni ku të ankoheni! Pas ambasadorit Borshard në Tiranë, edhe presidenca e OSBE ra në duart e “shtetit të narko-trafikut”!
15 komente në “Ç’paska qenë, shtiu në dorë dhe OSBE”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Foli ky konja e Rames?
Mbaje ke “syri” ti vllai hajdarit, meru me buletinin e PD-LSI, lere Temen se nuk e kap dot….
Cfare narko trafiku, teze e perhapur nga ata, emri i te cileve eshte i lidhur me narkomanine, ata qe nuk shqetesonin Lazaratin, sepse nuk kishin fuqi sipas tyre ta godisnin, prandaj e linin te kapte pak veten, ndersa merreshin me vjedhjet e rrugeve te kombit e sa tendera rrugesh, te cileve u pritej shiriti i inagurimit dhe shiriti i perurimit ne kalendat greke.
Autori e ka vene ne thonjza pecaktimin ”narko-trafik”.
O Skender Minxhozi, korigjo daten e termetit.
Nuk eshte 16 nentor.
Eshte 26 nentor 2019.
Artkulli eshte ekselent.
Për ata që dinë të lexojnë, shkrimi është vërtet domethënës, ndërsa 16 nëntori një gabim shtypy , sepse në tastierë 1 është afër 2. Gjë shumë e parëndësishne për t’u vënë në dukje, e njëjtë sikur unë të të thoshja ti që korigjoj shkruhet me dy ‘rr’ dhe jo me një. A ia vken?! Gjithsesi ani Lomo!
Ore Minxhozi, askush nuk te pengon te jesh admirues i Rames, por mos e quaj veten gazetar.
kot
????
Ner Minxhozi korigjo diten e tryezes per reformen zgjedhore. U be sot , jo dje.
O gazetar, me te vertete kujton se i di keto pune ma mire se Jozefina Topalli? Ti me te vertete kujton se e njeh politiken ma mire se ajo ?
Te dyja partite ne qeveri, kane ba te njejtat manovra.
Troppa carne al fuoco…
Se te thuash sot shume kunguj nen sqetull tingellon allasoj. Ehhh!!!
PSE ASD PO QE ME EDIN NUK JE GAZETAR. PO TI BOLJA E SALES NUK KE PSE JE KOMENTUS.
O Minxhozi, si perhere edhe kesaj radhe pikes i ke rene. Te lumte pena.
Minxhoz je gazetari me i mire .jo se je me ramen po qe i shkateron kta kazanet dhe berishistat.