Te fundit
Dy mbretër të zhveshur që partia refuzon t’i shohë
18 Qershor 2021, 10:34Blog
TEMA
Nga Skënder Minxhozi
Rizgjedhja e Lulzim Bashës në krye të Partisë Demokratike mes polemikash e dyshimesh, përkoi fatalisht me shpalljen e Sali Berishës non grata nga qeveria amerikane. Edhe kjo e dyta la pas një vazhdë mëdyshjesh serioze mbi pasojat dhe impaktin që do të ketë në anën e djathtë të spektrit politik. Dy kryetarët e fundit të PD, ai i dorëhequri dhe ky i rizgjedhuri, kanë që të dy hallet e tyre të mëdha për të zgjidhur, por që të dy duket se kanë vendosur t’i zgjidhin ato në kurrizin dhe me shpezimet e Partisë Demokratike.
Lulzim Basha u rikonfirmua siç pritej, edhe për një mandat tjetër në krye të partisë së tij. Fitoi mbyllja e syve dhe “uniteti mbi të gjitha”, ndaj nevojës urgjente për një kurs të ri politik në pultin e komandës. Lojtari plak Berisha, i vendosur formalisht në anë të fronit, preferoi edhe ai të strehohet brenda çatisë së SHQUP-it, me shumë sesa të rrijë e të presë rrufenë e radhës nga amerikanët në zyrën e tij private.
Në të hyrë të verës dhe pas një humbjeje të rëndë, PD e gjen veten kështu me dy hallexhinj që s’duan të dalin nga shtëpia e tyre politike. Dy politikanë që sot ofrojnë shumë më tepër probleme se zgjidhje. Dy mbretër lakuriqë, si në përrallën e famshme të Andersenit, që thuajse askush nga oborrtarët nuk preferon t’i shohë siç janë, të zhveshur, por vijon t’i duartrokasë për kostumet transparente që gjoja kanë veshur! Alegoria e përrallës së famshme skandinave duket e shpikur enkas për PD e sotme!
Në një deklaratë kurajoze por vetmitare, Fatbardh Kadilli shprehej dje se tashmë as Basha dhe as Berisha nuk kanë ç’ti ofrojnë më Partisë Demokratike. Ky konstatim, realisht i vetmi që mund të bëhet përballë një situate si kjo e opozitës sot, tingëllon edhe sot në vitin 2021 si një gjysëm herezie dhe guxim i çartur, në një forcë politike ku Lulzim Basha dhe Sali Berisha janë ideatorët dhe përgjegjësit e vetëm të rrokopujës ku PD është futur prej vitesh. Gara në PD dhe qëndrimi ndaj Berishës konfirmuan se edhe 29 vjet pasi nga kjo parti u përzunë disidentët e parë, aty është thuajse e pamundur të kritikosh liderin historik. Ndërkohë që kryetari tjetër bllokoi listat e anëtarëve dhe u mbyll në zyrën e tij pas 25 prillit.
Mbrojtja thuajse unanime që figurat më të spikatura të partisë i bënë Sali Berishës përballë dënimit amerikan, shënon provën më të prekshme materiale se rotacioni i vitit 2013 mes tij dhe Lulzim Bashës ka qenë një ngjizje përgjysëm, një akt i paplotë dhe i papërfunduar. Përkrahja që ish-kryeministri arriti të marrë pas shpalljes non grata nga SHBA është një dëshmi se mbreti i vjetër vijon të adhurohet në oborrin e tij. Ashtu siç vijon të votohet edhe princi i ri, megjithëse humb sa herë që zbret në një fushëbeteje. Dy shembuj konkretë dhe dëshpërues se procesi i emancipimit dhe i ndarjes së PD nga e shkuara, është larg realizimit.
Kjo parti po vijon të zgjedhë me kokëfortësi nostalgjinë për mitingjet e zhurmshme të Berishës dhe të votojë imazhin prej djali të mirë të Lulzim Bashës. Megjithëse gjithkush ka sy të shohë e të kuptojë se të dyja këto zgjedhje çojnë qartazi drejt humbjes dhe zgjatjes së agonisë në opozitë. Tamam ashtu si në përrallën e Andersenit ku të gjithë, duke nisur nga vetë mbreti, përkunden në iluzionin se janë të veshur, madje bukur e me shije, ndërkohë që s’kanë asgjë në trup.
3 komente në “Dy mbretër të zhveshur që partia refuzon t’i shohë”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
O Skender, si nuk arin te kuptosh se antaresia e PD shikon tek prijesi veten e vet si ne pasqyre. Eshte ne ADN e antaresise korupsioni, vjedhja, ndertimi pa leje. Si mund ti largohen Berishes kur jane vete si ai.
A ju kujtohet kur Edi Rama filloji reformen per faturat e papaguara te energjise elektrike, apo prishjen e ndertimeve pa leje dhe mendonte se do kishte nje kosto politike. Por ne votimet qe pasuan jo vetem qe nuk humbi vota, por i shtoji ato. Medoj se tani e ka kuptuar ADN e antaresise dhe militanteve te PD qe eshte e njellojte me ate te kryetarit de facto.
Bukur dhe Sakte, Z. Minxhozi!
Goni
I dashur Skender! Shume sakte! Por desha te shtoja se ,dihet se kush jane dy iru dhe i vjetri ne PD,por fatkeqesia eshte qe ka akoma dhe nuk jane pak qe mbrojne keta te dy! Mentaliteti dhe provincializmi i antareve te PD eshte shume egzotik! Ata akoma besojne qe Saliu do te rikthehet! Shqiptare te jene thua! PD u kthye ne kult nga Saliu,ne organizate terroriste! Dhe kete e dine te gjithe se cfare ka bere Saliu! Apo hidh nje sy ne Median tone! Del Zheji “sofisti i fundit” i socializmit shqiptar dhe mbron Saliun dhe Bashen duke shkelur te gjitha normt e dinjitetit shqiptar! Genjeshtar i shitur i paturpshem ,me karakter te dobet dhe langaraq dhe nuk eshte vetem! Vertet kemi arritur deri ne kete pike qe kemi mbaruar se qeni njerez?!