Te fundit
A do të heqë dorë Austria nga neutraliteti për t’u bashkuar me NATO-n?
21 Maj 2022, 16:19Bota
TEMA
Duke deklaruar synimin e tyre për t’u bashkuar me aleancën e mbrojtjes së NATO-s, Finlanda dhe Suedia po braktisin përkatësisht neutralitetin e ruajtur prej dekadave dhe shekujve.
Megjithatë, kancelari austriak, Karl Nehammer, ka thënë se Austria nuk ka ndërmend të ndjekë shembullin.
Ai e përsëriti këtë në prill, pak para se të udhëtonte në Moskë për t’i thënë presidentit rus, Vladimir Putin që t’i jepte fund pushtimit të tij në Ukrainën fqinje.
“Austria ishte neutrale, Austria është neutrale dhe Austria do të mbetet neutrale”, tha asokohe ai.
Por më pas, 50 austriakë të shquar – nga biznesi, politika, akademia dhe shoqëria civile – e ngritën këtë çështje publikisht.
Në një letër të hapur, ata i bënë thirrje presidentit federal, Alexander van der Bellen, që të shqyrtojë në mënyrë të pavarur nëse politika e neutralitetit të vendit ishte e përshtatshme për kohën.
“Historikisht, palë të ndryshme kanë bërë një sërë shtytjesh për të hequr neutralitetin, por ato gjithmonë kanë dështuar”, thotë shkencëtari politik vjenez, Heinz Gärtner.
Sondazhet tregojnë rregullisht se rreth 75% e austriakëve dëshirojnë të ruajnë neutralitetin.
Dikush do të mendonte se kjo do të sinjalizonte fundin e diskutimit.
Megjithatë, lind pyetja se pse neutraliteti i Austrisë duket kaq i panegociueshëm, veçanërisht pasi vendi ndjek një rrugë shumë më aktive të politikës së jashtme se Suedia, Finlanda apo Zvicra fqinje.
Pse Austria është neutrale?
Austria ishte dikur një nga fuqitë e mëdha të botës dhe pjesa më e madhe e historisë së saj ka qenë asgjë tjetër veçse neutrale.
Qoftë kur sundonte Perandorinë e Shenjtë Romake, apo më vonë, në shekullin e XIX-të, si Perandoria Austriake dhe përfundimisht, pas vitit 1867, si Perandoria Austro-Hungareze – kur ajo zotëronte zona të mëdha të Ballkanit dhe shtrihej në Ukrainën e sotme.
Zotërimet territoriale të Austrisë u zvogëluan përsëri në kufijtë e saj aktualë si rezultat i disfatës së saj në Luftën e Parë Botërore dhe kushteve të Traktatit të “Saint Germain” të vitit 1919.
Megjithatë, vendi nuk do të bëhej zyrtarisht neutral deri më 26 tetor 1955 – 10 vjet pasi pësoi një tjetër humbje ushtarake në Luftën e Dytë Botërore – me nënshkrimin e Traktatit të Shtetit Austriak, i cili rivendosi Austrinë si një shtet sovran./ Marrë nga Deutsche Welle, përshtatur për Albanian Post
Më të lexuarat
24 oret e fundit
Javen e fundit
Blog Tema
Lini një Përgjigje