Te fundit
Firma e Bitcoin-it e promovuar nga Nigel Farage humb 15% të vlerës së aseteve
2 Korrik 2026, 17:00Bota
TEMA
Një kompani e lidhur me Bitcoin, e promovuar nga Nigel Farage, ka humbur më shumë se 15% të vlerës së aseteve të saj, duke bërë që ekspertët e financave të paralajmërojnë investitorët të tregohen të kujdesshëm ndaj këtyre lloj kompanish.
Lideri i Reform UK ka investuar 215 mijë paund në një kompani “bitcoin treasury” të quajtur Stack BTC. Një kompani e tillë blen kriptomonedhën në emër të aksionarëve të saj, ndërsa Stack synon të blejë kompani të tjera duke u mbështetur në rritjen e vlerës që siguron nga mbajtja e Bitcoin-it.
Megjithatë, investimet e kompanisë kanë rënë me 15.48% që nga nisja e saj në mars të këtij viti, duke sjellë një humbje prej rreth 565 mijë paund.
Liberal Demokratët kanë kërkuar që deputetëve t’u ndalohet “të shesin” produkte apo shërbime financiare specifike, duke shtuar: “Njerëzit duhet të tregohen të kujdesshëm kur blejnë aksione të Farage. Aksioni i tij po shkon vetëm në një drejtim.”
Një zëdhënës i Reform UK tha për The Guardian se Farage nuk ka rol si ambasador i markës në Stack BTC, por thjesht ka blerë aksione.
Megjithatë, lideri i Reform UK është shfaqur në një video promocionale më herët këtë vit, ku tregohej duke shpenzuar 2 milionë paund nga paratë e kompanisë për të blerë Bitcoin.
Aksionari më i madh i Stack BTC është Paul Withers, i cili zotëron edhe kompaninë e tregtimit të arit Direct Bullion. Së fundmi është zbuluar se kompania e tij i ka paguar Farage 270 mijë paund për 12 orë punë promocionale.
Withers zotëron 20.72% të aksioneve të kompanisë, ndërsa Farage 5.61%. Të dy janë të vetmit me mjaftueshëm aksione (mbi 5%) për të pasur të drejtë vote. Ish-ministri konservator Kwasi Kwarteng, ish-kancelar i shkurtër në qeverinë e Liz Truss, është kryetar ekzekutiv i kompanisë dhe zotëron 3.55% të aksioneve.
Farage dhe partia e tij kanë kërkuar më parë lehtësim të rregullave për kriptomonedhat dhe kanë propozuar krijimin e një “fondi rezervë Bitcoin”, si dhe lejimin e HMRC (autoriteti tatimor britanik) për të pranuar kriptomonedha si pagesë taksash.
Interesi i Farage për kriptot ka qenë nën hetim, me disa kritikë që thonë se ai u shtua pasi mori një dhuratë të padeklaruar prej 5 milionë paund nga miliarderi i kriptove Christopher Harborne. Farage po përballet gjithashtu me një hetim etik për mosdeklarim të kësaj shume.
Susannah Streeter, kryestrategjiste investimesh në Wealth Club, tha: “Një rënie kaq e fortë në vlerë tregon sa jashtëzakonisht të paqëndrueshme mbeten këto asete dhe kompanitë që thjesht grumbullojnë Bitcoin nuk kanë diversifikim për të zbutur goditjet kur çmimet bien.”
Ajo paralajmëroi gjithashtu kundër investimit në kompani të mbështetura nga figura publike, duke shtuar: “Kjo mund t’i japë një investimi një fasadë legjitimiteti që në realitet nuk e ka. Njerëzit shohin një emër të njohur që investon dhe mendojnë se rreziku është më i ulët, por shpesh ndodh e kundërta.”
Peter Schiff, broker amerikan i njohur si “Dr Doom” për parashikimin e krizës financiare të vitit 2008, tha: “Më pëlqen Nigel Farage, por nuk do të këshilloja investimin në asnjë kompani të këtij lloji.” Ai shtoi se politikanët po i promovojnë këto kompani për të tërhequr votues që zotërojnë Bitcoin.
Dan Coatsworth, drejtues i tregjeve në AJ Bell, tha se historia e kompanisë Stack BTC mund të jetë “një sinjal alarmi”, pasi ajo ka ndryshuar emrin disa herë. Ai shtoi se premtimet për krijimin e një portofoli biznesesh cilësore nuk janë reflektuar ende në rezultate konkrete.
Deputetja e Liberal Demokratëve, Lisa Smart, tha: “Është e turpshme që ndërsa vendi përballet me krizën e kostos së jetesës, Nigel Farage po inkurajon njerëzit të investojnë në kripto që mund të jenë shumë të rrezikshme.” Ajo shtoi se Liberal Demokratët do të ndalonin deputetët të promovojnë produkte financiare specifike.
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Kjo ashte bitlesh ,me pasuru mafjen politike.