Te fundit
Ish-terroristi i ETA-s që po dëmton fushatën e Pedro Sanchez-it në Spanjë
14 Korrik 2023, 12:13Bota
TEMA
Fushata e Pedro Sanchez-it për të fituar një mandat tjetër si kryeministër spanjoll po cenohet nga një person më shumë se çdo gjë tjetër: Arnaldo Otegi, një anëtar i dënuar i grupit terrorist të shpërbërë “ETA”.
Otegi, i cili ka kryer 14 vjet burg, është kreu i “EH Bildu”, një parti separatiste baske e majtë me një rol kyç në politikën kombëtare.
Votat e tij parlamentare e kanë ndihmuar Sanchez-in të kalojë reformat e tij në ligjin e punës, pensionet dhe strehimin.
Por jashtë vendit bask, Otegi, i dënuar për krime, duke përfshirë rrëmbimin dhe përkatësinë në një grup të armatosur, është cilësuar si njeri i dhunës.
Ai kurrë nuk e ka dënuar gjakderdhjen e “ETA-s” dhe njolla e terrorit e ka bërë partinë e tij të neveritshme për shumë njerëz.
Shoqërimi i Sanchez me të është bërë i pafalshëm jo vetëm për votuesit në të djathtë, por për disa anëtarë të partisë së tij socialiste.
Alberto Nunez Feijoo, lideri konservator i opozitës që po mposht Sanchezin në sondazhe, e ka sulmuar atë për krijimin e një pakti “të pahijshëm” me Bildu, duke thënë se i lejon “terroristët” të kushtëzojnë të ardhmen e Spanjës.
Në një debat provë mes dy kandidatëve të hënën, ai e pyeti Sanchez, nëse mund të flejë natën.
Për t’u bërë kryeministër Feijoo, president i Partisë Popullore, duhet të fitojë mbi 700 mijë deri në 800 mijë votues të lëkundur që vitet e fundit janë zhvendosur midis PP-së dhe Partisë Socialiste.
“Kryesisht mbi moshën 50 vjeç, ata janë “njerëz të rendit” të cilët janë të shqetësuar nga erozioni i parimeve dhe standardeve të vjetra, të cilat ata mendojnë se Sanchez i ka braktisur”, thotë Jose Pablo Ferrandiz, një drejtor në sondazhin Ipsos.
“ETA”, e cila luftoi për pavarësinë e një rajoni më të madh bask që përfshin Francën dhe Spanjën, shënoi viktimën e saj të parë në 1968.
Ajo vazhdoi të traumatizojë këtë cep të Evropës me një mbretërim rrëmbimesh, bombash makinash dhe plumbash, duke vrarë gjithsej 853 njerëz.
“ETA” njoftoi në 2011 se do të dorëzonte armët, një vendim për të cilin Otegi fitoi disa merita.
Në vitin 2018 ajo tha se zyrtarisht po shpërndante të gjitha strukturat e saj.
Euskal Herria Bildu, emri i plotë i të cilit do të thotë “ribashkim i vendit bask”, u rrit në vitet që kaluan, duke mbushur hapësirën e lënë nga ndalimet në krahët politikë të “ETA-s”.
Bildu shkaktoi zemërim në maj duke përfshirë ish-anëtarë të “ETA-s” të dënuar për vrasje në listën e saj të kandidatëve për zgjedhje.
Në vitin 2021, Otegi bëri një deklaratë historike drejtuar viktimave të “ETA-s dhe familjeve të tyre.
“Dëshirojmë t’ju përcjellim pikëllimin dhe dhimbjen tonë për vuajtjet që keni kaluar. Ne e ndiejmë dhimbjen tuaj dhe nga ajo ndjenjë e sinqertë pohojmë se nuk duhet të kishte ndodhur kurrë”, tha ai.
Por për Maite Araluce, presidente e Shoqatës Spanjolle të Viktimave të Terrorizmit, fjalët e tij nuk përbënin pendim të vërtetë.
“Është një fyerje për inteligjencën tonë”, tha ajo.
Rëndësia e Bildu për Sanchez-in rrjedh nga fakti se koalicioni i tij me dy parti, i formuar me të majtët e Podemos, nuk ka një shumicë parlamentare.
Pra, e vetmja mënyrë që ai mund të miratojë ligje është të korrigjojë votat e partive më të vogla, përfshirë Bildu.
“Financial Times”
Më të lexuarat
24 oret e fundit
Javen e fundit
Blog Tema
Lini një Përgjigje