Pilotët ukrainas të dronëve po shfrytëzojnë sistemet e asistuara nga inteligjenca artificiale për të rritur efikasitetin e sulmeve në front. Një pilot i njohur me thirrjen ushtarake Mex tregoi se një goditje 20 kilometra larg ndaj një tanku rus do të kishte qenë e pamundur pa këtë teknologji.

“Pa udhëzimin shtesë, thjesht nuk mund ta godisnim,” tha 31-vjeçari nga Brigada e 58-të e Pushkatarëve të Veçantë të Ukrainës, duke përdorur pseudonimin e tij ushtarak. “Absolutisht asnjë mundësi.”, citohet të ketë shtuar ai më tej, nga Reuters.

Teknologjia e dronëve ka evoluar me shpejtësi gjatë pothuajse katër viteve që kur Rusia pushtoi Ukrainën.

Ndërsa të dyja vendet prodhojnë disa miliona dronë në vit, përdorimi i pajisjeve që bllokojnë sinjalin për të ndërprerë lidhjen mes dronëve dhe pilotëve është bërë i zakonshëm në vijën e frontit.

Mjegulla e dendur

Dronët si ai që përdori Mex për të goditur tankun po përdoren gjithnjë e më shumë për të depërtuar në mjegullën e dendur, e cila ka bërë që dronë të panumërt ukrainas dhe rusë të bien nga qielli para se të arrijnë objektivat.

Këta dronë fiksojnë shënjestrën bazuar në imazhin që shfaqet përmes kamerës së tyre të integruar dhe mund të vazhdojnë të fluturojnë në mënyrë autonome drejt objektivit edhe pasi piloti humbet kontaktin me dronin.

Teknologjia, e cila është përdorur gjithashtu nga Rusia, ka ngritur shqetësime etike, por standarde ndërkombëtare të detyrueshme për përdorimin e armëve të përforcuara me IA mbeten thuajse të papërcaktuara.

Ukraina, e cila ka vendosur dhjetëra sisteme të tilla, disa prej tyre të instaluara në mijëra dronë, ka deklaruar se çdo vendim për të goditur duhet të merret nga një njeri dhe jo nga IA.

Figurat e industrisë thonë se softueri shpesh ka ende nevojë për përmirësim dhe performanca e tij varet nga kushtet e fushëbetejës.

“Ky sistem udhëzimi, përveç ndjekjes së (objektivit), ka bankën e vet të kujtesës, mbi të cilën është trajnuar, me motorë, makina, e kështu me radhë,” tha Mex. “Prandaj, nëse, për shembull, vendos një pikë të saktë 2-3 kilometra larg makinës gjatë afrimit, ai tashmë do të përshtatet me të”.

1 Komente

K
Klimax

30 Nëntor 2025, 11:07

Problemi është se në ajër aviacioni luftarak rus ka qenë superior dhe e ka bërë të pamundur për aviacionin ukrainas të ngrihet në vijën e frontit dhe të përballet me aeroplanët rus Sukhoi Su-35S. Me raketat robotike që ata disponojnë Vympel R-37M kanë arritur që të rrëzojnë aeroplanët ukrainas në largësi deri në 177 km. Shumica e vendeve të NATO-s nuk disponojnë një armatim të tillë të mbrojtjes ajrore të kësaj distance kështu që i bënë ato inferiore ndaj kapacitetit dhe epërsisë së forcës goditëse ruse nga ajri. Në këtë situatë vendet e NATO-s kanë vendosur të importojnë një arsenal të madh të dronëve që prodhon Ukraina për të përballur epërsinë ruse nga ajri në një luftë partizane të ngjashme me atë ukrainase, ndaj një agresioni të mundshëm rus.

Përgjigjjuni