Te fundit
Vdes fotografi i luftës Paul Conroy
2 Mars 2026, 09:08Kulturë
TEMA
Paul Conroy, fotografi i njohur britanik i luftës, ka ndërruar jetë nga një atak në zemër në Devon, ku jetonte prej vitesh. Ai ishte 61 vjeç.
Conroy u bë i njohur për raportimet e tij nga zonat e konfliktit në mbarë botën. Në vitin 2012, ai u plagos rëndë gjatë bombardimit të ushtrisë siriane në Homs, ku humbi jetën kolegia e tij në Sunday Times, Marie Colvin. Ngjarja u paraqit edhe në filmin A Private War (2018), ku aktori Jamie Dornan luajti rolin e Conroy.
BBC shkruan se fotografi i lindur në Liverpool vdiq nga një atak në zemër të shtunën në Devon, ku jetonte.
“Ai bëri gjithë jetën atë që donte për të sjellë ndryshim dhe gëzonte duke ekspozuar padrejtësitë,” u shpreh vëllai i tij, Alan.
Prezantuesi i lajmeve në BBC, Clive Myrie, shkroi se ishte “thellësisht i tronditur” nga lajmi, duke e përshkruar Conroy-n si “një fotoreporter të mrekullueshëm dhe një njeri të mrekullueshëm”.
Lindsey Hilsum nga Channel 4 shtoi: “Të gjithë ne që e njihnim dhe e donim jemi të shkatërruar.”
Conroy kaloi shtatë vite si ushtar në Artilerinë Mbretërore përpara se të bëhej fotograf profesionist dhe ishte gjithashtu anëtar i Frontline Club.
Dokumentari Under the Wire i vitit 2018 tregoi arratisjen e tij nga bombardimi i vitit 2012 në Homs, ku u vranë kolegët e tij Marie Colvin dhe Remi Ochlik. Ai vetë pësoi plagë të rënda dhe iu nënshtrua 23 operacioneve në këmbë dhe disa të tjera në bark e shpinë.
Ai punoi gjithashtu në Libi, Ukrainë dhe së fundmi ishte kthyer nga një mision në Kubë. Përveç punës si fotoreporter, ai bashkëpunoi me këngëtaren britanike Joss Stone, duke bërë fotografi dhe duke shkruar muzikë me të.
Stone tha: “Jam shumë mirënjohëse që e kam njohur dhe e konsideroj nder ta quaj mik. Paul Conroy ishte një legjendë. Gjithmonë ngrihej për atë që ishte e drejtë dhe ishte aty për ata që kishin nevojë.”
Paul Conroy la pas gruan, tre djem dhe nipër e mbesa. A.K./TemA
Më të lexuarat
24 oret e fundit
Javen e fundit
Blog Tema
Lini një Përgjigje