Beogradi thotë se avionët luftarakë serbë sulmuan disa dronë në kufirin Serbi-Kosovë

Dronë pa shenjë u shfaqën në kufirin Kosovë-Serbi “duke vëzhguar kazermat dhe pozicionet” e ushtrisë serbe, pohuan autoritetet e Beogradit, duke bërë që presidenti serb Aleksandar Vuçiç të urdhërojë avionët luftarakë të vendit t’i rrëzojnë ata.

Dronët u larguan nga hapësira ajrore serbe përpara se avionët luftarakë të arrinin objektivat e tyre, njoftoi transmetuesi publik RTS.

Kryeministrja Ana Brnabiç tha në një intervistë për RTS të martën në mbrëmje se dronët u pikasën teksa vëzhgonin një pozicion ushtarak në anën serbe të kufirit dhe dy kazerma, duke shtuar se ajo nuk donte të spekulonte për origjinën e pajisjeve pa pilot.

Ajo theksoi se urdhri ishte që të rrëzoheshin dronët në hapësirën serbe dhe autoritetet do të monitoronin më tej zonën. 

“Nëse këto gjëra vazhdojnë të ndodhin, ne do të rrëzojmë çdo dron të tillë, ashtu si çdo vend tjetër”, shtoi Brnabiç.

Ministri i Mbrojtjes i Kosovës, Armend Mehaj, i mohoi raportet e disa mediave serbe, më 1 nëntor, se “dronët që janë vërejtur mbi Serbi”, kanë hyrë nga territori i Kosovës.

“Çfarëdo diskursi i tillë është vetëm pretekst për rritjen e numrit të trupave të ushtrisë serbe përreth kufirit me Republikën e Kosovës, si mjet për përhapjen e një gjendjeje paniku mbi qytetarët e të dyja shteteve”, shkroi Mehaj në Facebook.

Ministri i Mbrojtjes i Serbisë, Millosh Vuçeviç, tha të mërkurën se presidenti i Serbisë, Aleksandar Vuçiç, ka dhënë urdhrin për rritjen e gatishmërisë luftarake, pasi disa dronë “kanë hyrë nga Kosova në territorin e Serbisë qendrore”.

Vuçeviç tha për RTS-në se Vuçiç ka ngritur gatishmërinë luftarake të Forcave të Armatosura të Serbisë për shkak të dronëve dhe “duke marrë parasysh përvojën në frontin ukrainas”, në mënyrë që të mos kishte, pastaj, “vonesa administrative në zinxhirin komandues”.

Disa media në Serbi transmetuan informacione jozyrtare më 1 nëntor, se dronët pa pilotë “po filmonin aktivitete në zonën e sigurisë tokësore dhe në dy kazerma” – domethënë, sipas raportimeve, fluturuan mbi Merdare dhe rrethinat e Rashkës, në kufirin me Kosovën dhe në jug të Serbisë.

Vuçeviç tha për RTS-në se, pas shfaqjes së dronëve, Vuçiç ka dhënë urdhrin që “çdo objekt i tillë të eliminohej ose të vihej nën kontrollin tonë”.

Ai shtoi se avionët luftarakë, MIG 29, të cilët u aktivizuan nga Serbia, nuk u ngritën për shkak të dronëve, por se “ata patrullojnë në qiellin tonë”.

Vuçeviç, krahas pretendimeve se dronët kanë hyrë nga territori i Kosovës, nuk dha më shumë detaje as për ta, as për arsyet e ngritjes së avionëve luftarakë dhe as për lidhjet që mund t’i kenë ata me Kosovën, për sigurinë e së cilës kujdeset edhe misioni i NATO-s, KFOR.

Ai tha se ushtria mund t’u përgjigjet “këtyre sfidave” edhe “me topa” dhe në mënyra të tjera.

Sipas tij, ushtria serbe “ka informacione” se dronët janë vërejtur jo vetëm në rrethin e Rashkës, por edhe në atë Toplicës dhe Nishavës.

Megjithatë, ai nuk shpalosi më shumë detaje në lidhje me këto informacione të pretenduara.

Radio Evropa e Lirë iu drejtua më 1 nëntor Ministrisë së Mbrojtjes në Beograd për çështjen e gatishmërisë luftarake, por nuk mori përgjigje.

Këto zhvillime vijnë në kohën kur në Kosovë po zbatohet plani i Qeverisë së vendit për riregjistrimin e makinave me targa të paligjshme serbe në targa RKS, apo Republika e Kosovës.

Ky plan – në tre faza – filloi të zbatohet nga 1 nëntori dhe do të përfundojë deri më 21 prill, 2023.

Dita e parë e qortimit: Dilema dhe kundërshtime për targat

Shumica e serbëve në veri të Kosovës, që kontrollohen në masë të madhe nga Beogradi zyrtar, i kundërshtojnë targat që i lëshon shteti i Kosovës.

Serbët në pjesë të tjera të Kosovës ka kohë që i kanë regjistruar makinat e tyre me targa RKS.

Çështja e targave të paligjshme shkaktoi tensione në veri, verën e kaluar, kur disa serbë lokalë u rebeluan dhe ngritën barrikada.

Për të qetësuar situatën, Kosova shtyu vendimin për riregjistrimin e makinave deri më 1 nëntor.

Ministri turk kërcënon Greqinë: Athina e di mirë se çfarë do të thotë të mos pajtohesh me Ankaranë

10:43 Rajoni 6 komente

Tri marrëveshje në Berlin për liderët e Ballkanit Perëndimor

09:32 Rajoni 4 komente

Gjermania: Statusi i Kosovës të mos jetë më “mollë sherri” në rajon

09:01 Rajoni

Ndryshimi i klimës rrezikon ullinjtë në Greqi

21:40 Rajoni 1 koment

Censusi i shqiptarëve në Serbi, Arifi: Tirana dhe Prishtina nuk na mbështetën. Po të mos ishte BE, do të plotësohej dëshira e Vuçiçit

21:30 Rajoni 4 komente

Ukraina s’do ta njohë Kosovën, thotë ambasadori i saj në Beograd

20:40 Rajoni 11 komente

SHBA: I kërkuam Kosovës shtyrjen e plotë e jo të pjesshme të vendimit për targat

20:20 Rajoni 7 komente

Marrëveshja Turqi-Libi acaron tensionet turko-greke

20:10 Rajoni

Greqia publikon pamjet e incidentit me anijen turke: Nxorën armët

16:40 Rajoni 3 komente

BE dhe SHBA rithekson zhgënjimin e saj për vendimin e Kurtit për targa

16:32 Rajoni 3 komente