Te fundit
Presidencialet 2024: Kush fiton e kush humb!
27 Prill 2024, 14:40Rajoni
TEMA
Nga Seladin XHEZAIRI
I. Gara ishte e ashpër, por e ndershme. Përballjet programore, ndërkaq lënë shumë për të dëshiruar. Dallimet u artikuluan përmes paraqitjeve të kandidatëve të katër blloqeve politike, etnikisht të ndara në dy taborre: VMRO-DPMNE&LSDM dhe VLEN&Fronti Europian. U përvijuan divergjenca serioze për përcaktimet strategjike të vendit – integrimin në BE dhe shtetin e së drejtës me të gjitha vlerat që ngërthen në vete. U panë, për pasojë, edhe koalicionet joparimore që qysh tash po duken në horizontin e parlamentareve të tetë majit 2024.
II. Bërja e detyrave të shtëpisë, kur është fjala për zhbllokimin e procesit të negociatave me BE-në, në fakt, është prerja kryesore që vulos heterogjenitetin mes skuadrave garuese, për shkak se Evropa nuk kërkon premtime e zotime boshe: Ndryshimi i Kushtetutës dhe futja e bullgarëve në të vazhdon të mbetet parakusht. Këtë nuk është se nuk e dinë edhe Davkova, edhe Taravari, ndaj pohimet e tyre, dhe të koalicioneve të veta mbështetëse për rinegociime e riformulime të dokumenteve me vulë evropiane, nuk mund të merren ndryshe përveçse si një thirravajë, për paqëndrueshmërinë e së cilës janë të vetëdijshëm edhe vet!
III. Rezultatin e raundit të parë të Presidencialeve duhet analizuar veç e veç në të dyja kampet politike me ngjyrim të theksuar, për të mos thënë mbizotërues, etnik, në atë maqedonas dhe shqiptar. Në të dyja rastet opozitarët e sotëm bënë çmos që me fantazinë e zhvilluar politike të imponojnë debatin se këto zgjedhje (edhe balotazhi, edhe parlamentaret) janë në fakt, një betejë kundër “elitave të korruptuara” e “popullit homogjen, moralisht të pastër, i cili s’mund të bëjë asnjë gabim”(Jan- Werner Myller)! Ishte lideri i VMRO-DPMNE-së, Hristian Mickoski, ai që disa muaj para zgjedhjeve risolli në publik kërkesën e pararendësit të tij Nikola Gruevski, për mandate të mjaftueshme që do të zhbënin kushtëzimet e BDI-së dhe Ali Ahmetit. Ndërkaq, është për t’u habitur se si formacioni garues VLEN po e kapërdinë ofertën bujare të së mërkurës mbrëma të, me shumë gjasë, kryeministrit të ardhshëm, për bashkëpunim paszgjedhor. Kjo për shkak se zgjedhjet ende nuk kanë përfunduar dhe, pas “humbjes” së Taravarit e “fitores” së Osmanit, një grishje e këtillë, në realitet e rikthen në fjalorin politik togfjalëshin për “shqiptarët e ndershëm” që deri tani askush nuk ia ka pa hairin. Përkundrazi: ka prodhuar vetëm kriza e kriza…
IV. Janë për analizë më të thellë rezultatet e arritura nga të dyja kampet shqiptare. Përtej entuziazmit, si tek humbësit, ashtu edhe tek fituesit, shikuar nga jashtë, duket se ka munguar mobilizimi më i thellë i anëtarësisë dhe simpatizantëve për të kapitalizuar votën. Tek VLEN-i nuk është se s’u vërejt edhe një garë për lidership, kurse tek Fronti – një ngathje e stilit “hyxhim do t’i japim në parlamentare”!
V. Patjetër: Kryeministri i Kosovës dhe partia e tij në garën e së mërkurës dolën humbësit më të mëdhenj! Agresiviteti i manifestuar, duke mbështetur vetëm njërën palë, doli i paefektshëm. Deri tani, shqiptarët për fragmentarizimin e skenës politike-partiake e kanë pas drejtuar gishtin nga maqedonasit (institucionet, shërbimet). Uroj që ky të ishte vetëm një incident. Sepse, mirë e ka thënë populli: Nëse nuk mund të bësh mirë, mos bëj keq! Arkëtimi i kaq shumë votave nga Osmani e Taravari do të mund të maksimalizohej edhe më, sikur Prishtina zyrtare të ishte angazhuar që shqiptarët të dilnin me vetëm një kandidat, ndërsa në parlamentare të fitonte – më i miri. Mjerisht, sikur…
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Ata qe ne Kosove jane me vetedije me VV e Vucicit jane shume, plus edhe trushplare te tjere te genjyer, te gjithe bashke behen gjysa e Kosoves. Nga ana tjeter, ne veri te Kosoves kane met fare pak shqiptare dardane. Kosova duhet te mendohet mire se po shkon me kambt e veta nen Serbi siq ka qene deri ne 1999. Ne nderkohe, Rama e Begaj duhet te pergatitin nje platforme mbare-shqiptare negociuese, se bashku me partite opozitare ne Kosove, me synim bashkimin ne nje shtet (federativ mbase) shqiptar te vetem ne Ballkan. Nese do duhet te shkembehen territore (Veriun per Presheven et.) me Serbine, pse te mos pergatitemi...?! Me keqardhje por udheheqesia e VV ka treguar se eshte pjelle serbe, ata po e kthejne Kosoven ne shekullin e 20. Temos biem pre e sovranisteve te Putinit (berllogjet e llojit Bushati, Berisha, Shkullaku, etj si keta) qe ulerijne kunder rishikimit te kufijve.