Te fundit
Veliaj: Treg i ri ushqimor publik për fermerët e Tiranës; Qendra tregtare agroushqimore në Lundër do thyejë monopolin e privatit
31 Maj 2022, 15:07Sociale
TEMA
Fermerët e Tiranës do të lehtësohen nga barrierat e vendosura për shitjen e prodhimeve të tyre nga privatët. Kryetari i Bashkisë së Tiranës, Erion Veliaj, i pranishëm në konferencën “Gratë në zhvillimin rural”, ka deklaruar se monopoli i tregut ushqimor do të marrë fund me qendrën më të madhe tregtare publike, që do krijohet në zonën e Lundrës, ku të gjithë fermerët mund t’i shesin produktet e tyre.
“Me Ministrinë e Bujqësisë dhe AZHBR-në kemi kohë që planifikojmë një treg ushqimor pa barriera. Sot jemi në një situatë monopoliste në Tiranë, pasi në Kashar ekziston një treg privat, i cili ka vendosur një barrierë, ku nuk ka rëndësi nëse sjell lakër, apo luleshtrydhe, por paguan për arkë një taksë që përkthehet në kosto për fermerët, por edhe për përdoruesin fundor në tavolinën e bukës. Ky monopol duhet të marrë fund. Kjo është arsyeja pse ngjitur me qendrën tregtare në zonën e Lundrës jemi duke ndërtuar tregun më të madh ushqimor publik, për t’u siguruar që fermerët e kurorës së Tiranës të kenë një treg pa barriera”, u shpreh Veliaj.
Për këtë, ai tha se bashkia ka marrë modelet e qendrave të mëdha agroushqimore italiane, të cilat shërbejnë edhe për promovimin e prodhimeve të fermerëve, si ata që kultivojnë pak, ashtu edhe ata që prodhojnë me shumicë.
“Dua ta mbyllim këtë vit duke thyer monopolin. Së pari, do duhet të vendosim rregulla në treg. Të thyejmë këto barriera për prodhuesit dhe pastaj të fillojmë inkurajimin e tyre që të prodhojnë shumë dhe të afirmohen edhe më shumë”, tha Veliaj. Ai tha po ashtu se prodhimi dhe siguria ushqimore janë kthyer sot në sfida globale.
“Shumë prej dhimbjeve të kokës që i kanë filluar tani lidershipit evropian: nga do vijë gruri, nga do vijë misri, nga do vijnë drithërat, nuk ekzistonin përpara tre muajsh. Sot, krejt papritur, shumë prej gjërave që i merrnim të mirëqena, po kthehen në temë diskutimi. Sot që Shqipëria merr edhe drejtimin e Këshillit të Sigurimit në OKB, Kryeministri është në Nju Jork për këtë punë, krejt papritur një nga temat në agjendë, përveç luftës dhe ndalimit të saj, është edhe ajo e sigurisë ushqimore. Po bëhen seanca si do ushqehet bota në këtë realitet të ri”, tha ai.
Duke veçuar investimet në agroturizëm, Veliaj tha se ky është momenti më i mirë për Tiranën. “Mjafton të bëni një rrugëtim vetëm në Luginën e Erzenit, duke filluar nga Krraba, Iba, duke vazhduar poshtë në Mullet, në Petrelë, duke ndjekur pastaj gjithë lumin në Baldushk, në Vaqarr, në Ndroq, derisa largohet nga territori i Tiranës, për të parë sa toka pjellore dhe sa shumë investim është bërë në sera. Sot kemi një incentivë të jashtëzakonshme, sidomos për agroturizmin dhe bujtinat. Më në fund, kemi përpjekjen më serioze në gjithë qarkun tonë për të thyer monopolin e një tregu privat, që kthehet nga inkurajues në frenues të sipërmarrjes, ndaj ky është një moment i mirë për Tiranën”.
Veliaj e mbylli fjalën e tij duke thënë se kryeqyteti prodhon sot afro gjysmën e GDP kombëtare. “Sot jemi në një situatë ku, sipas statistikave të fundit të INSTAT dhe të Bankës së Shqipërisë, ekonomia e Tiranës është sa e gjithë Shqipërisë në vitin 2006. Pra, vetëm një qytet në 61 bashki prodhon gjithë atë ekonomi që prodhonte vendi ynë në 2006. Sot jemi mbi 48% të GDP-së së vendit. Kjo do të thotë se, nëse funksionon kjo mirë në Tiranë, praktikisht ka funksionuar mirë për gjysmën e vendit, ose për gjysmën e ekonomisë së vendit,” përfundoi Veliaj.
2 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Nuk e di se ça perqindje te PBB te Republikes prodhon Tirana por....ESHTE E SIGURT SE PO HARXHON 100% Ne te tjeret skemi uje drita kanalizim shkolla polici spitale....ushqimet tona tregtohen ne te njejtat tezga me minjte E vërtetë që njëkryeqytet kemi por e kemi që të na lehtësojë punë ne të tjerëve ...JO TË NA SKLLAVËROJE Rilindja duhet ti thërrasë mendjes: BOLL ME TRAJTIMIN CA SI TË NËNËS DHE CA SI TË NJERKËS Përveç turpit(si me Fan Zone për tironcit kurse ne bujkrobërit spam ndeshje as ne TV) ky lloj trajtimi është edhe i rrezikshëm AS PANEM AS CIRCENSIS Më zi se skllevërit Epo sna ka pjell lopa...kemi shpirt e sy ne ballë edhe ne të gjorët Boll na u testua durimi
Nje treg i ashtuquajtur fruta perimesh te Barri i Bamit mori flake duke rrezikuar seriozisht jeten e banoreve, te cilet megjithese ju jane ankuar me dhjetera here nuk i degjuat, por i injoruat. I njejti subjekt ka nje treg pas kopshtit nr.39, prane shkolles Ramazan Jarani dhe perballe ish Shkolles se Bashkuar te Oficereve. Edhe ky treg qe ka bllokuar rrugen e hyrjes per ne pallatin qe ka prane, perben rrezik per kopshtin dhe ndertesat e tjera te banuara. pasi aty jane grumbulluar nje sasi e madhe arkash, te cilat nuk hiqen. Problem jane minjte dhe mizat/mushkonjat. Edhe per kete treg ju jane ankuar, por perseri shurdheri, banoret nuk i pyet njeri. Ne asnje qytet evropian nuk ka tregje te instaluar te perhershem, qe ndertohen per interesat e disa personave qe fitojne dhe disa pronareve tokash cuditerisht te kompensuar ne mes te Tiranes. SPAK duhet te hetoje se si jane marre keto prona dhe tja ktheje shtetit shqiptar.