Te fundit
Agjenda, Kombëtarja udhëton të premten drejt aeroportit të Nishit, masa të forta sigurie në Serbi! Sylvinho flet nga stadiumi
7 Tetor 2025, 15:45Sport
TEMA
Të shtunën në orën 20:45 kombëtarja shqiptare e futbollit luan kundër Serbisë në Leskovac, sfidë kjo që vlen për Grupin K kualifikues të Kupës së Botës 2026. Dueli nga dy kampet shihet si një finale, pasi rezultati është shumë i rëndësishëm për të përcaktuar ekipin e vendit të dytë në grup.
Shqipëria mban vendin e dytë momental, por tanët kanë një ndeshje më shumë se Serbia dhe pikët janë jetike për ëndrrën amerikane. Nga ana tjetër, veç fushës, në Serbi po mendojnë të bëjnë një organizim sa më të mirë, duke harruar mbrëmjen e 14 tetorit 2014, kur huliganët serbë thyen sigurinë në stadiumin e Beogradit, u futën në fushë dhe dhunuan futbollistët e Shqipërisë.
Kombëtarja kuqezi me Sylvinhon në krye është grumbulluar të hënën në Tiranë, ndërsa një ditë para ndeshjes, të premte, pritet që ekipi të udhëtojë me një linjë direkte nga Tirana për në aeroportin 'Kostandini i Madh' në Nish.
Pas mbërritjes, ekipi kuqezi dhe stafi do shoqerohen me masa të forta sigurie nga policia serbe, për t'u vendosur në një hotel mes Nishit dhe Leskovacit, qytetit ku do luhet ndeshja.
Po të premte, skuadra ka stërvitjen gjenerale në 'Duboçica'. Në orën 16:30 të së premtes, Sylvinho dhe me gjasë kapiteni Gjimshiti (ose Hysaj, i vetmi që vijon të jetë në ekip që nga mbrëmja e Beogradit në vitin 2014), do dalin para mediave.
Pas orës 17:00 ekipi do zbresë në fushën e stadiumit 'Duboçica' në Leskovac për të zhvilluar stërvitjen gjenerale. Gjatë gjithë itinerarit ekipi do jetë i shoqëruar nga policia serbe, si edhe gjatë gjithë kohës së qëndrimit në hotel.
Edhe të shtunën paradite nuk është programuar asnjë dalje nga hoteli për ekipin tonë. Në orët e pasdites skuadra do i drejtohet sërish Leskovacit për ndeshjen që merr jetë më 11 tetor në orën 20:45.
Ndeshja është vlerësuar si e një rrezikshmërie të madhe nga FIFA, duke dërguar dy oficerë sigurie. Veç zhvendosjes së sfidës nga Beogradi në Leskovac për shkak të frikës nga huliganët dhe klimës së tensionuar politike, Federata Serbe e Futbollit nuk nxorri në shitje asnjë biletë.
6500 tifozët serbë në Leskovac do jenë me ftesa dhe të përzgjedhur, përfshi futbollistë nga akademitë e futbollit. Serbia është e dënuar që këtë duel ta zhvillojë me reduktim të 20 përqind të kapacitetit të stadiumit.
Pas pesë sfidave të luajtura në Grupin K kualifikues të Kupës së Botës 2026, Anglia me 15 pikë mban kreun duke lënë pas Shqipërinë me tetë pikë. Serbia me shtatë pikë ndodhet në pozitën e tretë, por ka një ndeshje më pak. Më pas vijnë Letonia (4 pikë) dhe Andorra me zero pikë.
1 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Serbet do lozin loje fizike te forte. Sylvinjo duhet te oregatitet per kete. Jo vetem kaq por serbet do lozin per topin e pare qe ne sekonden e pare. 20 minutat e para do vendosin fatin e ndeshjes. Serbet do kene minimum 3 sulmues me cdo kohe. Shqipot duhet te prishin aksionet e srbis dhe ky duhet te jete fokusi i pare te mundohen te ngadalsojne lojen dhe te luajne ne ansore dhe jo qender. Mesfushotet kane peshen kryesore dhe duhen nderuar ne pjesen e dyte. Ne sulm Broja eshte I padiakutushem por duhet ruajtur dhe ndoshta te hyje nga fundi I pjeses pare. Skema duhet te ndrohet dhe ti pershtatet Brojes ne cdo moment Nqs shqipot lozin per topin e pare qe ne fillim loja eshte per ne. Por sic ka ndodhur gjithmone kjo nuk do te ndodhi dhe loja ansore eshte ngushellimi I vetem per 1:66 cm lojtare qe kemi