INTERVISTA E PLOTE/ Rama: Jemi të angazhuar tërësisht për të qeverisur Shqipërinë pas 200 ditësh

Në një moment vendimtar për fatet e vendit, “Top Story” i Sokol Ballës i dha zë liderit të opozitës, Edi Ramës, në një intervistë ekskluzive, që përfshiu të gjithë çështjet e aktualitetit të momentit. Në një intervistë që vjen disa muaj përpara zgjedhjeve të përgjithshme të vitit 2013, Rama u përqendrua në kohën që po skadon për përmbushjen e reformave që do të bëjnë të mundur marrjen e pakushtëzuar të statusit të vendit kandidat, afrimin e datës për zgjedhjen e Prokurorit të ri të Përgjithshëm, rolin e Presidentit të Republikës në politikën aktuale, bllokimin e Qarkut të Fierit, 100-vjetorin e pavarësisë në prag dhe shumë çështje të tjera.

Mirëseerdhët zoti Rama. Pyetja e Parë ju drejtohet si kryetar i Partisë Socialiste. 71 vjet më parë, u krijua Partia Komuniste ose origjina e partisë që ju drejtoni sot. Prej asaj kohe, në votë popullore thuhet se e majta përbën forcë madhore në vend, por a është reformuar mjaftueshëm kjo e majtë?

Kjo pyetje i takon më shumë Saliut, pasi atëherë lindi partia e tij e parë, e cila e farkëtoi në udhën e tij. Parti prej të cilës ai është ndarë formalisht, por jo në formë të vërtetë.

Një ditë më parë, ju ishit i pranishëm në funeralin e Lirak Bejkos. Ndërkohë, nga Partia Demokratike ju kujtojnë përditë se ju ende nuk i keni kërkuar ndjesë viktimave të regjimit komunist.

Është për të ardhur keq që Partia Demokratike, partia që lindi si zëdhënëse e një lëvizje të madhe, njëkohësisht atyre që nuk patën zë në komunizëm, vazhdon të akuzojë me të njëjtën gjuhë kundërshtarët e saj, pikërisht në ditën kur duhet të reflektojë lidhur me faktin se një i burgosur politik, që doli gjallë nga ferri i diktaturës komuniste u vetëdogj për shkak të zhgënjimeve të ferrit të ri zhgënjyes të PD-së.

Por, a duhet që Partia Socialiste të kërkojë me të vërtetë një ndjesë zyrtare për të kaluarën e saj?

Partia Socialiste ka bërë dhe këtë e provon historia, gjithçka për t’u shkëputur nga e shkuara si një forcë, e lindur në kohën e re dhe për kohën e re, në raport me të burgosurit politikë. Ne sot kemi një angazhim të qartë, të shkruar në programin tonë të Rilindjes Shqiptare ndaj tyre, në funksion të dhënies fund të abuzimit dhe talljes civile me ta.

Duke qenë se keni qenë disi më evaziv mbi këtë çështje, unë përsëri këmbëngul duke pyetur tek mungesa e një ndjese publike.

Jam shumë i keqardhur, por në arkivat tuaj duhet të keni qëndrimin tim shumë të qartë në raport me të shkuarën dhe ndjesën time shumë të qartë, në raport jo me çka i takon thjesht Partisë Socialiste, por me atë që i takon të gjitha forcave politike shqiptare dhe patjetër dhe të gjithë atyre që ishin të përfshirë në Partinë e Punës dhe që në emrin e saj kanë bërë jo pak më mëkate në kurriz të atyre që u burgosën politikisht apo të tjerëve që nëse nuk u burgosën u internuan dhe sakatuan. Sigurisht, njëri prej tyre është protagonisti kryesor, ende kryeministër deri në qershor.

Gjatë grevës së urisë, ju kritikuat sjelljen e qeverisë ndaj tyre, ndonëse Nishani u mundua të ndërmjetësonte.

Presidenti luajti një skeç si aktor i dorës së dytë, në teatrin e hipokrizisë.

Presidenti Nishani tha që duhet të marrim shembull nga zgjedhjet në SHBA. Si e vlerësoni këtë deklaratë të tij?

Mendoj se i ka takuar përpara se të tregojë që nga se të frymëzohemi, në raport me ngjarjen e rëndë që ndodhi, si President i të gjithë shqiptarëve, që të nderonte shqiptarin që u vetëdogj dhe la pas dy vajzat e tij nga trishtimi dhe zhgënjimi i thellë që ka prodhuar kjo klasë politike për këtë shtresë të popullsisë.

Ju kanë akuzuar nga mazhoranca si bashkësponsor të kësaj greve urie, pas aktivitetit që keni bërë dhe mbështetjes që treguat për ish-të përndjekurit, vërtet mendoni se ata do ta mendojnë këtë dhe të votojnë për Partinë Socialiste?

Në asnjë takim nuk i kemi kërkuar votë, as në nderimin e të ndjerit Bejko dhe nuk përbën kërkimi i votës arsyen e interesit tonë dhe as motivimin për të cilën duam të ndihmojnë dy njerëz për plagët e djegies së tyre, që të marrin kurim në shtete fqinje. Por, e bëj këtë i shtyrë vetëm nga ndjenja e përgjegjësisë si një njeri që ka mundësi të ngrejë telefonin dhe të kërkojë ndihmë e nga ana tjetër si një njeri i këtij vendi që nuk mbetet indiferent ndaj kësaj çështje. Ajo që më çon mua në çadrën e tyre, pa kamera, ishte nevoja për të komunikuar me ta dhe nga ana tjetër, respekti ndaj tyre për të mos e përdorur si sfond të asnjë lloj qëndrimi politik, atë që në fakt ishte një grevë urie për bukën e gojës.

Ndërrojmë temë. Si e pritët ju shkarkimin e “bashkëpuçistit”, ish-kryetarit të Shërbimit Informativ Shtetëror, Bahri Shaqirit.

Si një vijim të natyrshëm të zgjedhjes së gabuar dhe arrogante të Presidentit të sotëm të Republikës, për të cilin e ka thënë dhe vazhdoj të jem i bindur, është thjesht një ministër më shumë në qeverinë e Partisë Demokratike. Do të kisha dashur shumë që presidenti të jepte një provë që unë të isha i gabuar, por fatkeqësisht po jep vetëm prova se jo vetëm nuk kemi gabuar kur nuk i dhamë votën, por edhe kemi qenë thellësisht në shërbim të interesit të vendit, duke kërkuar një president që të mos jetë noter i Berishës në zyrën më të lartë të shtetit.

Presidenti dhe maxhoranca bënë të qartë përpara vizitës së Klinton, se fundi i nëntorit duhet të na gjejë me një Prokuror të ri të Përgjithshëm. Partia Socialiste, nga ana e saj nuk duket se po bën ndonjë rezistencë serioze ndaj kësaj lëvizje politike.

Partia Socialiste është e angazhuar tërësisht për të qeverisur Shqipërinë pas 200 e ca ditësh dhe tërësisht e vetëdijshme se në ditët e mbetura, PD do të bëjë vetëm atë që ka bërë deri më sot, drejtimin e vendit në rrugën e rrënimit, duke rrënuar institucionet, siç bëri me Presidencën, ekonominë, siç po rrënon familjet e zakonshme shqiptare dhe të gjithë sipërmarrësit që nuk janë pjesë e oborrit. Në këto muaj të mbetur deri në zgjedhje, Berisha do të vazhdojë të rrënojë shoqërinë.

U dukët shumë entuziast për rizgjedhjet e Presidentit Obama në krye të SHBA-ve. Përse?

Besoj se nuk përbën asnjë rast të veçantë, entuziazmi për fitoren e Presidentit Obama është i natyrshëm i shumicës dërmuese të njerëzve, kudo në botën e lirë, kudo ku njerëzit aspirojnë për një shoqëri të drejtë, kudo që njerëzit aspirojnë për ndarje të drejtë të përgjegjësive dhe të barrës së kontributeve. Njerëzit aspirojnë për gjithçka, që Presidenti Obama përfaqëson si mishërimi i një politike që në thelbin e saj mbron shtresën e mesme dhe të varfrit, duke i kërkuar më të pasurve që të kontribuojnë më shumë.

Në komentet tuaja në rrjetin shoqëror “Twitter”, ju e komentuat këtë sukses edhe si një fitore të taksës progresive. Vazhdoni të këmbëngulni në këtë taksë në programin tuaj?

Nuk e quajta fitore të taksës progresive, por fitore të një ideje ndaj një tjetre, të një vizioni të shoqërisë ndaj një tjetri, të një projekti që nënkupton një shoqëri të drejtë, ku përgjegjësitë dhe barra ndahen në mënyrë të drejtë dhe ku shërbimet për të gjithë pjesëtarët e shoqërisë nuk jepen sipas xhepit apo nevojës. Një fitore e një vizioni që bie në kundërshtim me atë që kush fiton më pak paguan më shumë dhe sa më shumë të fitosh aq më shumë paguan. Bie në kundërshtim me një vizion kur predikohet se shteti duhet të shërbejë më pak dhe se dora e fshehtë e tregut i rregullon gjërat pa fuqinë rregullatore të shtetit.

T’i rikthehemi raporteve të partisë suaj dhe tuajat personale me amerikanët. Dikush mund të thotë se vjet, kur kryetari i mazhorancës ishte mbi vështirësi të mëdha, atë e quajtën një burrë shteti. Më pas, kur ju patët problemet tuaja në zgjedhjet e korrikut, qëndruan indiferentë. Mbi zgjedhjet, mendoni se administrata amerikane ka krijuar një ide të qartë?

Mendoj se ndalimi i Klinton në Tiranë, ishte pasqyrë e një kthjelltësie të plotë lidhur me vetëdijen e aleatit tonë të madh strategjik për domosdoshmërinë e zgjedhjeve të lira dhe të ndershme. Ajo iu drejtua parlamentit me shprehjen ju lutem bëni zgjedhje serioze, d.m.th se ka një shqetësim shumë serioz dhe adreson edhe një apel për këtë.

Pas ikjes së saj, më shumë dukej sikur ishit entuziast për takimin, se sa vizitën. Çfarë ju tha duke iu bërë kaq entuziast?

Nuk e fsheh që ishte takimi më i bukur i jetës sime politike. Takimi më i bukur, sigurisht ishte po aq i bukur takimi me Presidentin Obama, por ky ishte një takim i gjatë, në të cilin pata kënaqësinë e jashtëzakonshme të diskutoja me Sekretaren për ato çështje që kam shprehur edhe publikisht disa herë më parë.

Pra takimi me Klinton ishte edhe më i bukur se ai me Presidentin Obama?

Nuk thashë ekzaktësisht këtë, por ndryshimi është që ishte një takim i gjatë, ndërsa me zonjën Klinton shtjellova në mënyrë shpjeguese problematikën me të cilën përballemi sot. Takimi me Obamën ishte një eveniment, për mua si politikan dhe qytetar, e admirues i tij, nga pozitat e një njeriu që beson shumë në atë që ai përfaqëson dhe përpiqet të bëjë

Ju nuk keni folur shumë për këtë takim me Presidentin e SHBA-ve.

Nuk ka qenë një takim zyrtar dhe duke qenë kështu, as nuk kam pasur dhe as nuk kam dëshirë që të bëj gjëra publike, duke respektuar faktin që takimi nuk ka qenë zyrtar.

A mendoni se amerikanët janë “OK” me rotacionin politik në Shqipëri. Ju nuk mund të thoni që nuk keni pasur probleme në komunikimin me ta në të shkuarën.

Unë besoj në marrëdhëniet e sinqerta me amerikanët dhe sinqeriteti nuk nënkupton marrëdhënie që janë të karakterizuara edhe nga komunikime, por nënkupton marrëdhënie solide që forcohen me komunikim të hapur për çështje të caktuara. Nga ana tjetër, nuk ka pikë dyshimi dhe kjo është pjesë e AND-së së PS, qysh në krye të herës, ne kemi qenë, jemi dhe do të mbetemi të gatshëm për ta mishëruar këtë partneritet në shkallën e më të lartë.

Zonja Klinton i kërkoi publikisht palëve të bashkëpunojnë dhe ju la të kuptoni që jeni bashkëpërgjegjës për fatet e vendit.

Që ne jemi bashkëpërgjegjës kjo është e padyshimtë dhe është themeli i bashkëjetesës demokratike mes qeverisë dhe opozitës. Megjithatë, tjetër është bashkëpërgjegjësia dhe tjetër është fajësia për keqtrajtimin e fateve të vendit dhe në këtë pikëpamje, nuk ka asnjë ekuivok se fajësia për keqtrajtimin e tyre i takon atyre që qeverisin.

A kërkoi Clinton miratimin e ligjeve të mbetura për fitimin e statusit të vendit kandidat?

Jo, ajo nuk e bëri këtë as zyrtarisht dhe as personalisht.

Atëherë, çfarë do të bëni me këto ligje?

Nuk kam ndërkohë asnjë ekuivok, pa asnjë dyshim, ne jemi tërësisht të gatshëm që të tre këto projekte, sepse në fakt nuk janë ligje, por një projekt, të japim kontributin siç e kemi thënë për të gjithë paketën e ligjeve që çuan tek statusi i kushtëzuar. Për këtë, ne jemi pa asnjë kompleks, të presidozuar për marrjen e të gjithë meritës sepse nëse ka pasur progres Shqipëria gjatë këtij viti, ky ka qenë progresi në legjislacion. Nuk ka pasur progres as në luftën ndaj korrupsionit, as në cështjen e pronave apo krimit të organizuar dhe as me drejtësinë apo administratën publike. Kush kujton se do i hedhë hi syve duke thënë se po e bllokon opozita, do të ballafaqohet me popullin shqiptar nesër si çështje që e pengojnë progresin e mëtejshëm në raportin me BE-në. Ajo që mbetet e qartë dhe e rëndësishme është që një nga këto çështje që ka të bëjë me thelbin është sundimi i ligjit, jepet drejtpërdrejtë me zbatimin e vendimit të Gjykatës së Lartë për Fierin. Vullneti i 300 mijë qytetarëve nuk mund të shkelet arbitrarisht dhe kjo është ajo që ne kërkojmë.

Berisha ofroi opsionin e ri për zgjidhjen e ngërçit në Fier, mocionin për anëtarët dhe kryetarët e Qarkut.

Kjo është antiligjore dhe antikushtetuese. Saliu nuk është mbi ligjin, pavarësisht se ai ka vendosur ndryshe. Ligji dhe vendimi i gjykatës është i qartë, ndaj nuk ka nevojë për mocion, gjykata e nënvizon gjithashtu këtë.

Për Fierin, nisi si sherr pas sherrit tjetër, videos Meta-Prifti. Sot Meta është pranë Berishës, Prifti është pranë PS?

Jo! Prifti është në opozitë, por jo pranë Partisë Socialiste.

Jeni penduar për darkën me Metën, apo mendoni që ai ju ka një borxh?

S’kam arsye të pendohem. Takimi është bërë nisur nga vullneti i mirë dhe interesi publik.

Keni humbur aleancën me Nard Ndokën dhe nuk po shohim aleanca të reja…

Ne jemi të fokusuar për të zgjeruar aleancën tonë ndërpartiake, por edhe me publikun duke zgjeruar bazën e mbështetjes për Partinë Socialiste që po ndodh dita–ditës.

A nuk ju duket arrogante refreni “kush të dojë le të na bashkohet”? LSI dhe Idrizi janë larg jush, kryetarja e KQZ-së nisi punën pa votën tuaj,. Çfarë mendoni se keni më mirë se 2009?

Është Shqipëria shumë më gri se sa në 2009. Por besoj se është ende herët për të folur për materializimin e aleancave dhe jam i bindur që koalicioni ynë do të jetë më i madhi opozitar që ka patur njëherë vendi që do të përballet me qeverinë.

Ju iku edhe Harasani. Thonë se jeni shokuar nga ikja e tij?

Më ka ardhur e papritur, por më ka lënë një shijë pozitive mënyra se si Andisi u tërhoq nga jeta politike dhe dinjiteti me të cilën komunikoi tërheqjen e tij, tërësisht për shkaqe familjare.

Debate në Partinë Socialiste nuk është shuar. Blushi është më afër, por në asamblenë e fundit u përplasët me Gjonin që e cilësoi partinë kooperativë. Pse nuk po gëzon Partia Socialiste një institucion të debatit publik?

Kjo është një pamje pak folklorike e asaj që duket nga larg, por nuk është ajo që përbën atë cka është sot Partia Socialiste dhe cka ndodh në PS për PS. Besoj shumë që s’ka asnjë shqiptar që mund ta besojë se PS është një institucion i bunkerizuar, megjithë përpjekjet e Saliut për ta përshkruar si të tillë, ashtu sikundër unë në atë mozaik emrash që ju përmendet ju them se pjesa më e madhe janë në shërbim të qëllimit të përbashkët.

Akuzat e tjera janë ato që thonë se grupi i Mjaftit po merr PS.

Edhe këtë e thotë Berisha.

Megjithatë në forumet e në poste janë persona që kanë ardhur nga Mjafti.

Ata njerëz po bëjnë rrugëtimin e tyre brenda PS, njerëz që kanë vizion dhe ndajnë të njëjtat vlera.

A jeni sot me larg apo më afër me FRD, sepse tashmë nuk keni më monopolin e opozitës, ka edhe parti të tjera opozitare?

Që ka opozitë, ka parti që vijnë nga e djathta dhe që kërkojnë largimin e kësaj qeverie dhe të kryeministrit është pozitive dhe lajm i mirë për skenën politike shqiptare, por edhe për publikun që meriton të përfaqësohet më mirë në anën e djathtë, si ish të përndjekurit politikë psh, që vendosin të vetësakrifikohen sepse u mashtruan për 22 vjet me radhë. Sot nuk jemi në kushtet e një normaliteti politik. Sot jemi në kushtet e një qeverisje në formë regjimi, sot s’ka vend për të hedhur votën në rrugë të mesme, sepse s’mund të ketë rrugë të mesme për një qeveri që kërcënon votën e lirë, e cila tashmë është tërësisht e ravijëzuar si një forcë që çon vendin drejt rrënimit.

E shini si domosdoshmëri?

Është nevojë historike dhe jam i bindur që shqiptarët, shumica, duke e ndjerë këtë nevojë historike, do të bëjnë një zgjedhje të qartë dhe besoj se nuk do të tundohen për rrugën e mesme, si në 2009, që la shumë njerëz që votën e tyre e dhanë për tjetër gjë, ndërsa ajo përfundoi tërësisht në të kundërtën. Këtu i referohem plotësisht LSI-së.

Ia keni mbyllur derën?

Ka vetëm një rrugë për të bërë opozitë, braktisja e qeverisë.

A ka një komunikim me Aleancën Kuqezi?

AK është një nga 2 partitë që u krijuan si vokacion i djathtë për të riafirmuar një të djathtë të mbetur në mes të rrugës dhe si e tillë edhe për AK vlen ajo që thashë për FRD-në.

Po por AK ka një spektër më të gjerë dhe mund t’ju dëmtojë.

Ne nuk na dëmton dot asnjë forcë politike që nuk del qartësisht në dritën e opozitarizmit dhe nuk hap shtigje në rrugë të mesme që mund të kthehen në rrugë qorre për ata që e mbështesin.

Ndryshe, nga 2008-ta sot situata duket më e fjetur. Më mirë apo më keq?

Është një situata që ka ende mosbesim, cinizëm që buron nga një pesimizëm i natyrshëm shoqëror sepse njerëzit kanë të gjitha arsyet për t’u ndjerë të braktisur nga politika, pas kaq shumë premtimesh dhe zhgënjimesh dhe për të mos u ndjerë lehtësisht të gatshëm të besojnë. Unë i kuptoj njerëzit që sot ndjehen më të ndrojtur dhe qendrojnë larg. Do të kërkoj që ata të kuptojnë se qendrimi në qoshe duke thënë se të gjithë janë njësoj, vecse shton errësirën në atë qoshe. Është shërbimi më i mirë që mund t’u bëhet atyre që duhet të largohen.

Ju akuzojnë se nuk ngjallni entuziazmin e duhur elektoral, ndërsa Berisha e ka nisur fushatën.

Kryeministri gjithë jetën ka motorin për të propaganduar dhe asnjëherë për të qeverisur, motor për të rendur dhe përhapur gënjeshtra dhe asnjëherë nuk është përballur me realitetin. Sa më takon jam i bindur se kjo do të jetë një rrugë që do të përfshijë përditë e më shumë njerëz dhe se në zgjedhjet e ardhshme, shqiptarët do të fusin 2013 si vitin e ndryshimit të madh, ndalimit të rrënimit të mëtejshëm.

Ka ndryshuar qëndrimi juaj për 21 Janarin  dhe çështjet delikate?

21 Janari është një plagë e hapur e cila sigurisht, i rendon humbjes në çdo mbrëmje në familjen Nika, por dua që gjithë ta dëgjojnë dhe ta besojnë se kjo nuk është vetëm plaga e tyre. Askush nuk mundet të pretendojë se ka të njëjtën peshë, por kjo është një peshë e ndarë në shumë zemra dhe në shumë ndërgjegje dhe unë jam një nga shumë njerëzit që marrin pjesë në ndarjen e kësaj barre dhe si kryeministër i vendit do të bej gjithçka që kjo plagë të kurohet nga drejtësia.

Do të kërkoni rihetim për Gërdecin?

Ne jemi të vendosur që ta qeverisim Shqipërinë ndryshe dhe kjo do të thotë që të mos bëjmë me institucionet të njëjtën gjë që është bërë deri më tani, por t’u krijojmë kushte që ato të funksionojnë. Në këtë aspekt kemi mundësi që të ndërtojmë instrumente për të nxitur dhe mbështetur procese që ky vend duhet të bëjë të mundura për të qenë i lehtësuar, por nuk do vijmë në qeverisje për të bërë prokurorin dhe gjykatësin.

Një nga akuzat është se në bashki dhe tani në krye të PS, jeni vulnerabël ndaj klientelizmit. Për Albpetrol për shembull, PS është në heshtje.

Kjo është e pavërtetë, siç është e pavërtetë lidhja ime me klientelizmin. Për Albpetrol kam folur në fillim. Sa për klientelizimin jam i gatshëm të provoj me fakte të administrimit tim në 11 vjet në Tiranë, se nuk kam lidhje me këtë fenomen, nepotizmin apo shumëçka tjetër që në një teknike perverse mediatike është formuluar si akuzë dhe përsëritur në pafundësi, bazuar në atë “shpif shpif se dicka do të dalë”.

Si është komunikimi me Erjon Bracen? Thonë që ai është në listën e zezë të deputetëve.

Që Brace është në listën e zezë është, por të qeverisë dhe kjo i rrit vlerat dhe konfirmon kontributet e tij për Partinë Socialiste.

Ka listë të zezë me emrat e deputetëve që nuk do të jenë më kandidatë?

Ne kemi një grup parlamentar të gatshëm për të përballuar fushatën me sukses.

Elisa Spiropali do të jetë?

S’mund të vazhdojmë me emra konkretë.

Blushi foli për ushtria elektorale, mund të na flisni pak më shumë meqë përgjimi ishte i pamundshëm për shkak të zhurmuesit të celularëve dhe nuk pati rrjedhje informacioni.

Është normale që në një institucion serioz është të mos funksionojnë telefonat. Kjo është një praktikë që gjendet në shumë instanca dhe që është e nevojshme kur raporti mes një komuniteti dhe asaj instance nuk është aq i forcuar tradicionalisht. Ne bëmë një lexim të thellë të zgjedhjeve të 8 majit. Kemi të gjithë bazën e arsyetimit për të besuar se në rast se i referohemi shembujve pozitivë do të bëjmë një fitore spektakolare qershorin e ardhshëm dhe mbi shembujt pozitivë do të ndërtojmë strategjinë me sa më shumë njerëz dhe elementë të rinj në bërjen e fushatës elektorale, sic kemi bërë gjithnjë. Kemi qenë gjithmonë avangardë në modernizimin e fushatave elektorale dhe një skemë organizative që do të bëjë votën e shqiptarëve shumë më të sigurt.

Strategjia juaj paraelektorale bazohet shumë tek rrjetet sociale dhe interneti. Duket se Shqipëria është në moshën e internetit dhe për këtë duhet të falenderoni qeverinë Berisha.

S’kam arsye të falenderoj qeverinë, por faleminderit që më thatë mundësinë të komunikoj këtu “Ngri Flamurin”, nisma jonë, një projekt që ka nisur para dy ditësh dhe me shpejtësi po mbledh ëndrra të rejash dhe të rinjsh për të nesërmen duke bërë një grup njerëzish që bashkohen përmes medias sociale drejt një qëllimi të përbashkët. Kjo do të jetë një nga risitë e kësaj fushate dhe jam i bindur që cdo skeptik, do të kuptojë se është koha që në Shqipëri, përmes rrjeteve sociale mund të bëhen transformime të rëndësishme, koha për të kuptuar se në këtë botë që ndryshon, politika duhe t’u drejtohet rrjeteve sociale me forma të reja dhe efektive, jo vetëm për të folur por edhe për të dëgjuar. I ftoj të gjithë të marrin pjesë në “Ngritjen e Flamurit” online dhe 100 njerëzit që do të përzgjidhen përmes pëlqimeve në Facebook do të jenë të ftuar në ceremoninë e 100 vjetorin në Vlorë.

Meqë jemi të 28 nëntori, përplasja është e fortë edhe për këtë.

Saliu 28 e bëri 27, 29 e bëri 28. Kudo që vendos dorë ai e prish. Dekori i 28 nëntorit në Tiranë është një përzierje spektakolare e vulgariteti me mungesën minimale të sensit estetik. Kanë veshur ato shtyllat dhe vini re që i kanë veshur deri në mes dhe duken shtyllat sikur janë me pantallona. Dekori i Pallatit të Kulturës duket si reklama e një shkume rroje. Ahmet Zogu kur festoi 25 vjetorin e Pavarësisë ftoi njerëzit kundërshtarë në komisionin e përgatitjes së festës së madhe. Sot jemi në 100 vjetor dhe vetë mënyra e kremtimit është shprehja me flagrante që ky vend s’ka shtet, s’ka protokoll, s’ka as shije sepse ata që qeverisin s’kanë vizion, s’kanë projekt, s’kanë shije. Shqipëria pasurinë më të madhe të saj ka bukurinë dhe po goditet duke u shëmtuar dita-ditës.

Do shkoni në ceremoninë e rivarrimit të Ahmet Zogut?

Jo. Besoj se nuk ka vend në planet ku Presidenti i Republikës të ketë këshilltar princin, ose gjithë forcat republikane bëjnë një ceremoni për një rivarrim që mund të kryhet normalisht në kushtet e një qasje humane të sensit të historisë, por pa e kthyer në një evenimet ku të përfshihet gjithë politika.

CEZ-i duket sikur do të largohet?

Është historia e një projekti të dështuar privatizimi dhe e një qeverie që nuk është në gjendje që të bëjë të respektohen kontratat.

Oketa: Një mocion do e rrëzonte Topallin, nuk e ka mbështetjen e gjithë mazhorancës

23:04 Politika

Gazetar...

21:45 Politika

Fondi për festimet e Pavarësisë po shkon për fushatën elektorale të PD. Bumçi nuk di gjë

21:35 Politika

CEZ: “Vetëm në Shqipëri nuk fituam dot”. Ndërkohë BB e quante privatizimin ... histori suksesi

21:17 Politika

Edi Rama: Vizioni ynë për arsimin garanton punësim. Ky sistem është më i keq se piramidat e ’97-ës

20:56 Politika

Volfarth: KQZ premtuese, partitë të zbatojnë kodin

20:27 Politika

Shërbimi diplomatik francez është më i miri në botë

20:19 Politika

Shtëpi e ëmbla shtëpi! Obama rikthehet në punë (FOTO)

20:01 Politika

Martin Schulz: Inkurajoj qeverinë që të vazhdojë procesin e integrimit

19:10 Politika

Një vogëlush humb jetën teksa operohej në sy

16:50 Politika