Listat e kryesive të PS e PD, ja kush i ka rezistuar furtunës së tranzicionit

Në PS janë katër figura politike, që i kanë rezistuar kohës që nga viti 1991. Në PD ka rezistuar vetëm Berisha. Nga lista e kryesisë së PS është “zhdukur” ish- kryetari, Fatos Nano

Sali Berisha, Namik Dokle, Gramoz Ruci, Ermelinda Meksi, Ethem Ruka. Këta janë politikanët që i kanë rezistuar furtunave të 20 viteve të tranzicionit politik në Shqipëri. Ata nuk janë larguar kurrë nga pozicionet e tyre kyçe në partitë përkatëse.

Në krye të dy partive kryesore politike në vend, PS e PD, këta politikanë kanë ditur t’i rezistojnë betejave politike të zhvilluara më shumë ashpërsi përgjatë tranzicionit shqiptar. Më shumë se sa rivalitet ndërmjet forcave demokratike, politika e 20 viteve është karakterizuar nga konflikti politik, të cilit pak prej politikanëve të viteve ‘90 i kanë rezistuar, pa u përballur me largimin nga postet drejtuese në parti, deri edhe përjashtimet nga partia.

Dy forcat politike, PS dhe PD, kanë histori të ndryshme sa i përket ecurisë që kanë pasur figurat politike kryesore të tyre.

Dy partitë zhvilluan kongreset në verë dhe në vjeshtën e vitit 1991, prej nga ku u zgjodhën forumet drejtuese të dy partive, emrat e të cilëve vinin kryesisht nga PPSH, më pak kjo dukuri vihej re në PD, ku gjithsesi përfshiheshin disa individë me të shkuar jo shumë të afërt me PPSH.

Nga një vështrim i shpejtë i listave të forumeve drejtuese të dy partive në vitit 1991, krahasuar me forumet drejtuese aktuale të këtyre dy partive, vihet re se në PS ka ndryshime në forumet drejtuese kryesore të partisë. Në listën aktuale të forumeve drejtues të PS, mungon edhe kryetari i partisë, Fatos Nano.  Por janë disa protagonistë të tjerë të ngjarjeve të vitit 1991 që i kanë rezistuar të gjitha zhvillimeve të vrullshme në PS.

E kundërta ndodh në PD. Nga lista e kryesisë së PD së vitit 1991, është vetëm kryetari. Të tjerët janë larguar nga PD në kohë të ndryshme. Disa prej tyre janë rikthyer në zgjedhjet e vitit 2005, por me një status shumë më të ulët se sa e kishin kur ishin themelues të kësaj partie.

PS, ndryshimet në vitet 1991-2010

Në kongresin e dhjetë të PPSH-së, më 12 qershor 1991, 43 vite pas kongresit të parë të PKSH, kur u ndryshua emri nga PKSH në PPSH, kjo e fundit u riemërua Partia Socialiste e Shqipërisë. Emri i ri i PPSH-së u përcaktua pikërisht në sallën e kongresit të dhjetë të kësaj partie. “S’ka më PPSH, tani jemi një forcë tjetër politike”. Ky ishte edhe akti i themelimit të Partisë Socialiste të Shqipërisë.

Kongresi i dhjetë i PPSH-së zgjodhi si kryetar të partisë së re, Fatos Nanon. Ndërsa anëtarë të forumeve drejtuese të kësaj partie, u zgjodhën figura të rëndësishme të PPSH-së, por në nivele të dyta të saj.

Deri në vitin 2003, PS i rezistoi ndarjes, edhe pse pati një luftë të pandërprerë për pushtet brenda kësaj partie. Kryetari Fatos Nano udhëhoqi partinë për 15 vite, që në kongresin 12 qershorit të vitit 1991 deri në shtatorin e vitit 2005, kur dha dorëheqjen si rezultat i humbjes së PS në zgjedhjet e 3 korrikut të këtij viti. Gjatë kësaj kohe Nano fitoi të gjitha betejat politike me kundërshtarët brenda partisë së tij, madje edhe në kohën kur ai ishte në burg, kur ai fliste për demokraci të cunguar brenda partisë dhe për tipare marksiste të saj. Kundërshtari i tij, Ilir Meta, i mbështetur edhe nga figura të rëndësishme të partisë, të cilët kishin marrë peshë pas viti 1991, nuk ia doli të fitonte betejat ndaj Nanos, deri sa shkoi në vendimin për tu larguar nga PS në kongresin e dhjetorit të viti 2003, kur Meta u largua bashkë me një grup deputetësh e anëtarësh të forumeve të larta drejtuese të kësaj partie, për të themeluar një parti të re, Lëvizjen Socialiste për Integrim.

Pas zgjedhjeve të vitit 2005, kur Nano e la partinë, në kongresin e tetorit të këtij viti, u zgjodh në krye të PS Edi Rama. Për pesë vitet që pasuan Edi Rama kreu një reformë të rëndësishme në këtë parti, si pasojë pati largime të tjera nga PS. Në forumet drejtuese të PS janë aktualisht të përfshirë disa të rinj në moshë dhe politikë, por që kanë zënë vendet kyçe të drejtimit të kësaj partie.

Duket qartë se Partia Socialiste ka pësuar ndryshime thelbësore qysh nga viti 1991, gjithnjë sa i përket emrave që përbëjnë forumet drejtuese të kësaj partie. Por janë disa prej tyre që e bëjnë lidhjen midis viti ‘91 dhe 2010.

Kryesia e PS së vitit 1991 ngjan me kryesinë e këtij viti vetëm për shkak se në këtë forum vazhdojnë të qëndrojnë disa prej emrave që i përkasin edhe listës së vitit ‘91, Gramoz Ruçi, Ermelinda Meksi, Namik Dokle, por edhe Ethem Ruka. Këta emra i kanë rezistuar të gjitha betejave politike të 20 viteve tranzicion.

PD, ndryshimet në vitet 1991-2010

Në shtator të vitit 1991, 11 muaj pasi ishte themeluar Partia Demokratike, u zhvillua Kuvendi i parë Kombëtar i kësaj partie. PD ishte drejtuar përgjatë 11 muajve nga tre kryetarë të përkohshëm, Azem Hajdari, Aleksandër Meksi, që e mbajti këtë post vetëm një natë, si dhe Sali Berisha, i cili u zgjodh në 14 shkurt të vitit ‘91, për tu rizgjedhur në këtë post në Kuvendin Kombëtar të shtatorit të këtij viti.

Sali Berisha u rizgjodh kryetar i PD-së në 29 shtator 1991, me 449 vota përballë kandidaturës së Neritan Cekës me 91 vota dhe të Azem Hajdarit me shtatë vota. Prej këtij momenti, Berisha e ka udhëhequr PD pa u vënë asnjëherë në diskutim drejtimi i partisë prej tij, edhe kur u bë president, megjithëse në postin e kryetarit të PD-së ishte Eduard Selami. Lufta për pushtet brenda PD-së nisi herët. Me të njëjtat përmasa me ato të PS, por me pasoja më të rënda, pasi nga PD u larguan disa here grupe individësh të rëndësishëm të kësaj partie dhe krijuan parti të reja.  Përveç atyre që krijuan parti, nga PD janë larguar figura të rëndësishme, të cilët më pas nuk u angazhuan në asnjë forcë politike, siç është Eduard Selami, ish-kryetar i PD-së apo edhe Aleksandër Meksi, ish-kryeministër i kësaj partie, i cili u angazhua për disa kohë në LZHK (Lëvizjen për Zhvillim Kombëtar).

Vala e parë e largimeve nga forumet drejtuese të PD-së ishte që në fillimet e kësaj partie në vitin 1991, kur nisën betejat e para për pushtet. Shume prej themeluesve të PD u larguan nga Shqipëria, kryesisht studentët, disa prej tyre emigrantë, disa të tjerë për shkollim. Themeluesit e PD-së, anëtarët e kryesisë së kësaj partie, u larguan të gjithë si rezultat i luftës së brendshme politike, e dominuar nga kryetari i saj, Sali Berisha.

Nga lista e kryesisë së vitit 1991 ka mbetur në PD pa ndërprerje vetëm kryetari i kësaj partie Sali Berisha. Arben Imami e Genc Ruli, të cilët ishin anëtar të kryesisë së PD-së e dalë nga Kuvendi i parë Kombëtar i kësaj partie në shtator të vitit 1991, janë aktualisht anëtarë të kryesisë së PD-së. Por Imami e Ruli kanë munguar në këtë forum për shumë vite, pasi u larguan nga PD qysh në vitin 1993 për tu rikthyer në zgjedhjet e vitit 2005.

Kryesia e Komitetit Drejtues të PSSH, 12 qershor 1991 (15 anëtarë)

1. Fatos Nano        kryetar

2. Ismail Lleshi     nënkryetar

3. Servet Pëllumbi   nënkryetar

4. Spiro Dede        nënkryetar

5. Dritëro Agolli    anëtar

6. Ermelinda Meksi

7. Ethem Ruka

8. Gramoz Ruci

9. Halil Lalaj

10.   Kostaq Duka

11.   Namik Dokle

12.   Paqësor Zeneli

13.   Shaqir Vukaj

14.   Shkëlqim Cani

15.   Xhevat LLoshi

Kryesia e PS, dhjetor 2010

1. Edi Rama {Kryetar i PSSH}

2. Arben Isaraj {Anëtar i Kryesisë}

3. Arben Malaj {Anëtar i Kryesisë}

4. Ben Blushi {Anëtar i Kryesisë}

5. Erion Braçe {Anëtar i Kryesisë}

6. Ermelinda Meksi {Anëtare e Kryesisë}

7. Eva Allushi {Anëtare e Kryesisë}

8. Gramoz Ruçi {Anëtar i Kryesisë}

9. Ledi Shamku {Anëtare e Kryesisë}

10. Mimoza Hafizi {Anëtare e Kryesisë}

11. Namik Dokle {Anëtar i Kryesisë}

12. Pandeli Majko {Anëtar i Kryesisë}

13. Saemira Pino {Anëtare e Kryesisë}

14. Valentina Leskaj {Anëtare e Kryesisë}

15. Mimi Kodheli {Anëtare e Kryesisë}

16. Lindita Nikolla {Anëtare e Kryesisë}

Kryesia e PS-së, 29 shtator 1991. Kuvendi i parë Kombëtar i PD-së

Aleksandër Meksi

Ali Spahia

Arben Demeti

Arben Imami

Azem Hajdari

Bashkim Kopliku

Blerim Çela

Genc Ruli

Gramoz Pashko

Eduard Selami

Leka Toto

Merita Zaloshnja

Mitro Çela

Neritan Ceka

Pjetër Arbnori

Preç Zogal

Rexhep Uka

Sali Berisha

Ylli Vejsiu

Kryesia aktuale e PD-së

1. Sali Berisha

Kryetar, Kryeministër

2. Ridvan Bode

Sekretar i Përgjithshëm, Ministër i Financave

3. Astrit Patozi

Nënkryetar, Kryetar i Grupit Parlamentar

4. Jozefina Topalli

Nënkryetare, Kryetare e Kuvendit

5. Ilir Rusmali

Anëtar, Kryetar i Komisionit të Ligjeve

6. Sokol Olldashi

Anëtar, Ministër i Punëve Publike, Transportit dhe Telekomunicionit

7. Fatos Beja

Anëtar, Deputet

8. Genc Ruli

Anëtar, Ministër i Bujqësisë, Ushqimit dhe Mbrojtjes së Konsumatorit

9. Edi Paloka

Anëtar, Deputet

10. Bujar Nishani

Anëtar, Ministër i Drejtësisë

11. Leonard Demi

Anëtar, Kryetar i Komisionit të Sigurisë Kombëtare

12. Edmond Spaho

Anëtar, Kryetar i Komisionit të Ekonomisë dhe Financave

13. Mimoza Hasekiu

Anëtare

14. Liri Dibra

Anëtare

15. Margarita Qirko

Anëtare

16. Marieta Zaçe (Pronjari)

Anëtare

17. Aldo Bumçi

Anëtar, Kryetar i PD Tiranë, Deputet

18. Lulzim Basha

Anëtar, Ministër i Punëve të Brendshme

19. Majlinda Bregu

Anëtare, Ministre e Integrimit

20. Maksim Cikuli

Anëtar

21. Aleksandër Biberaj

Anëtar

22. Halit Shamata

Anëtar

23. Ilir  Bano

Anëtar

24. Jemin  Gjana

Anëtar

25. Omer  Stringa

Anëtar

26. Albana  Vokshi

Anëtar, Deputet

27. Gerti  Bogdani

Anëtar, Deputet

Ministria e Drejtësisë po “pushkaton” sërish viktimat e krimit komunist

19:57 Politika

Fotot dramatike: Nuk ka paqe as për Krishtlindje në Afganistan

18:03 Politika

Mrekullia e Krishtlindjeve: Kisha shembet pak pas meshës

17:43 Politika

Drejtuesit e shteteve që do debatojnë në Këshillin e Europës për raportin e trafikut të organeve

17:26 Politika

Analiza: 2011, një vit i errët për Shqipërinë e Kosovën

15:49 Politika

Krerët e politikës urojnë besimtarët e krishterë

13:03 Politika

Besimtarët e krishterë festojnë Krishtlindjen

11:23 Politika

Monitorimi i Kuvendit për një 1 vit, shkeljet, deputetët më aktivë dhe ata më të pasur

14:31 Politika

Dështojnë negociatat për komisionin hetimor

11:50 Politika

Assange, Krishtlindjet në shtëpinë e kosovares?

11:03 Politika