Fuqia jonë do ta bëjë Shqipërinë të mirë

Nga Erion Veliaj

Teksa shoh këtë sallë të stërmbushur them me vete ‘si mund të shqetësohet kush për të ardhmen e Shqipërisë, kur ajo është në duart tuaja?’ Nuk e di si duket nga aty ku jeni ulur ju, por nga ketu ku jam unë, pamja që shoh është fotografia më e bukur në Shqipëri.

Falemnderit, falemnderit që jeni këtu, falemnderit atyre Fressh-istëve që udhëtuan me orë të tëra, faleminderit deputetëve, kryetarëve të bashkive e rretheve, faleminderit pjesmarrësve të trupit diplomatik – dhe meqë jemi këtu, doja t’I shprehja mirënjohjen e vecantë zotit Arvizu. Sot është përvjetori i tij i martesës. Në fakt, duhet të falenderoj Zonjën Arvizu që u tregua aq bujare ta ndante me në kohën e Ambasadorit në këtë përvjetor. Ju urojmë shumë përvjetorë me kaq shumë miq sa edhe sot!  Sa mirë që nuk jeni shqiptar, se ne për përvjetor u shkojmë miqve në shtëpi, dhe s’di a do gatuanit dot drekë për 5mijë vetë në ambasadë.

Të them të drejtën, unë ende nuk e di si pranova të flas pas Elton Dedës, është një performancë shumë e vështirë për t’u konkurruar.  Shumë faleminderit Elton, për fjalët dhe suksesin që t’i përfaqëson dhe frymëzon tek të rinjtë shqiptarë. Me sa duket të gjithë kemi nevojë për një re:fressh! Re:fressh I Eltonit quhet Voice of Albania – dhe na ka frymëzuar të gjithëve.

Po e them që në fillim: Gëzuar! Gëzuar ditëlindjen e FRESSH-it, më shumë mirënjohje për të gjithë ata djem dhe vajza që 20 vjet më parë patën vizionin për të themeluar organizatën me impaktin më të madh në politikën progresiste në 20 vitet e fundit në Shqipëri.

Shumë faleminderit Pandeli Majkos, një histori suksesi e të rinjve Shqiptare në drejtimin e vendit dhe në përballimin e krizës më të madhe moderne të kombit tonë, luftës së Kosovës. Sot e përshëndesim dhe i urojmë të njëjtin sukses teksa do të përfaqësojë Shqipërinë me emër të mirë në OKB. Tani që Pandi – babai i FRESSH-it – është në Amerikë, FRESSH-i realisht ka fituar pavarësinë e një 20 vjecari – se mund të kthehet në shtëpi kur të dojë, e babai s’është aty që t’i bërtasë pse erdhe vonë!

Pafund mirënjohje për Ilir Zelën, mikun e mirë e të duruar, një bashkudhëtar të kujdesshëm e të mencur të këtij udhëtimi të rinisë shqiptare – Ilir, të falenderojmë me gjithë zemër për praninë dhe kontributin tënd. Të tjerë të rinj, si Lavdrim Krashi që sot drejton degën e PS në Londër dhe është një aktivist laburist shembullor e miq të tjerë që kaluan këtë stafetë ndër vite kanë sot gjithë mirënjohjen tonë.

Teksa vija sot në Pallat të Kongreseve, disa nga prindërit tuaj më telefonuan për të na inkurajuar duke më thënë “Erion, fëmijët tanë janë aty, ju lutem ndryshojeni këtë vend”! Dua të marr një moment për të falenderuar ata mijëra prindër që ndoshta nuk kanë paratë, ndoshta nuk kanë krahunn e forcës, ndoshta nuk kanë pushtetet, por që i kanë dhënë kësaj lëvizjeje për ndryshim, kësaj rilindjeje shqiptare, gjënë më të cmuar që kanë, dritën e syrit të tyre, fëmijët e tyre! Teksa po na ndiqni në këto momente, në emër të PS ne ju falenderojmë si prindër idealistë që keni rritur fëmijë me pasion për Shqipërinë e për këtë Rilindje Shqiptare. Faleminderit, dhe po, ne do ta ndryshojmë këtë vend!

Jam menduar gjatë se si do ta nisja këtë mesazh. Në fund vendosa që nuk jam këtu përpara që t’ju qetësoj, jam këtu që t’ju shqetësoj. T’ju shqetësoj sepse familjet tona janë të shqetësuara, komunitetet tona janë të shqetësuara, njerëzit e ndershëm të këtij vendi janë të shqetësuar, kombi ynë pas 100 vitesh pavarësi është i shqetësuar. E për turpin tonë, sa herë përmendet Shqipëria e gjthë bota perëndimore është e shqetësuar.

Kthejeni kokën në të majtë e shikoni atë që keni në krah. Kthejeni kokën në të djathtë tani dhe shihni tjetrin. Në Shqipëri ka 1 milionë të papunë. Statistikisht, 1 nga ata ulur afër jush është sot i papunë. 1 milionë të papunët në Shqipëri nuk janë statistikë, janë njerëz prej vërteti, kanë fytyrën e atij që është ulur pranë jush, quhen Marsel, Blerta, Arbri, Joni, Leart, Ana… dhe janë plot 1 milionë vetë, kryesisht të rinj, të shkolluar e të pashpresë. KJO, është për t’u SHQETËSUAR!

Mendoni tani për vëllain, motrën, kushërinjtë apo prindërit tuaj që jetonë jashtë. Nuk ka asnjeri në këtë sallë që nuk e ka një lidhje të tillë. Janë 1 milionë shqiptarë që sot jetojnë në Greqi, Itali e gjetkë. Të gjithë kanë ikur të rinj, e sic po duket vazhdojnë të ikin të tjerë. Pas 20 vitesh tranzicion, e vetmja ide finale për të rinjtë e pashpresë është: Të ikin! Kjo, është për t’u shqetësuar!

Shumë prej jush jeni studentë. Kam dëgjuar nga ju historitë e rryshfeteve për cdo provim që duhet të merrni. Kam dëgjuar por oraret mesjetare të dushve për t’u larë në Qytet Studenti. Kam parë se si zhvateni për stazhet e skllavërisë, provimet e gjuhëve të huaja me pagesë skandaloze cdo dy vjet, protestat e pafundme për klasa, banka, ngrohje e ndricim. Kjo është për t’u shqetësuar!

1% e të rinjve nuk i ka këto probleme. Nëse je fëmijë apo dhëndër i familjeve në pushtet sot punon në cilëndo Ministri, Ambasadë apo Drejtori që dëshiron, pa meritë, pa garë, pa ndershmëri. Kjo është për t’u shqetësuar! Po, për 99% të të rinjve shqiptarë që nuk e kanë këtë lidhje me pushtetin kjo është për t’u shqetësuar.

Sot kemi shoqërinë më të pabarabartë të 20 viteve të fundit. 5% e njerëzve kanë gjysmën e pasurisë, dhe 95% ka gjysmën tjetër. Një pabarazi e tillë, është për t’u shqetësuar, e për t’u shqetësuar shumë!

Po cfarë? Cfarë vallë mund të bëjmë?

Në një vend normal, këto probleme duhet t’i zgjidhte qeveria. Por në Shqipëri, qeveria nuk është zgjidhja, sot qeveria është bërë vetë problemi që duhet zgjidhur. Ky është problemi ynë!

Qeveria thotë, djali që doli nga burgu i të miturve dhe shkoi në skamjen e frikshme të familjes në Has “nuk është problemi im”. Ne themi, ky është problemi ynë!

Qeveria thotë të rinjtë që u vranë, plagosën e sfilitën në Gërdec nuk janë problemi im. Ne themi, ata janë problemi ynë!

Qeveria thotë 1milionë emigrantë, 1 milionë të papunë, 1 milionë të rinj – nuk janë problemet e mia. Ne themi, këto janë ekzaktësisht problemet tona!

Të rinjtë që vetëvriten, zhgënjehen, dorëzohen, fundosen, bien pre e krimit dhe drogës – mund t’mos jenë problemi i qeverisë, por ata janë problemi ynë.

I madh e i vogël bie dakord që kjo qeveri nuk mund ta ndryshojë këtë realitet, madje më keq, ajo ka humbur totalisht lidhjen me realitetin. Këta Qeveritarë, sa herë sëmurën, shkojnë jashtë. Sa herë pushojnë, shkojnë jashtë. Sa herë blejnë, blejnë jashtë. Ata nuk kanë idenë që nafta ka shkuar 2000 lekë, ata nuk kanë idenë se qeraja për studentët është rritur, ata nuk kanë idenë se librat janë shtrenjtuar, ata nuk kanë idenë se shkollat po rrënohen. Nuk kanë idenë, sepse ata janë shkëputur totalisht nga ky realitet.

Por nëse qeveria është problemi, ku është zgjidhja?

Zgjidhja miq është në këtë sallë, zgjidhja ka emrin, mbiemrin dhe fytyrën tuaj, zgjidhja për 99% të të rinjve të ndershëm e të aftë të Shqipërisë quhet sic quheni ju, flet sic flisni ju, vepron sic veproni ju.  Ju jeni zgjidhja! Një re:fresh, një rifreskim i gjithë energjive tona është zgjidhja për Shqipërinë.

Sot flasim të gjithë për deficitin buxhetor – dhe mirë bëjmë. Por doja t’u flisja për një deficit më të madh, deficitin e solidaritetit!

Ne nuk na pengon qeveria të jemi më të mirë me njëri tjetrin, ne nuk na pengon qeveria t’i shtrimë dorën kujtdo që ka nevojë, ne nuk na pengon kush të ndihmojmë të moshuarit pranë nesh, ne nuk na pengon kush të mbajmë pastër mjedisin, ne nuk na pengon dot kush të jemi solidarë!

Ju mund të thoni, Erion, unë s’kam gjë në dorë! Kjo nuk është e vërtetë! Për dikë që është më i vogël ke në dorë të jesh një vëlla ose motër e madhe e mirë, për një mik të sëmurë ke në dorë të jesh inkurajim i madh, për një fqinj në nevojë ke në dorë të jesh shpëtimtar, për një shok hallemadh ke në dorë të jesh veshi dëgjon e shpatulla ku mbështet ai që tek ty sheh Partinë Socialiste të Shqipërisë.

E di që nuk është e lehtë. Këto kanë qenë 6 vite të një vështirësie të jashtëzakonshme. Mjaft t’ju kujtoj që për 1 javë mbushet 1 vit nga 21 Janari, për të kuptuar se të rinjtë e opozitës shqiptare kanë përjetuar gjithcka nga plumbat, rrahjet, burgosjet, kërcënimet, përjashtimet, pushimet nga puna dhe gjithcka tjetër që vec një mendje e ligë dhe e plakur mund të orkestrojë ndaj të rinjve të kombit të vet.

E di gjithashtu se sot jetojmë në një kohë kur të gjithë janë bërë ekspertëe, jo se si bëhen gjërat por për të thënë që gjërat ‘nuk’ bëhen, që ndryshimi ‘nuk’ bëhet, që Shqipëria ‘nuk’ bëhet.

Dua t’ju kujtoj që historia s’i mban mend fare ‘S’NUK-sat’, dekurajuesit, penguesit. Historia e mban mend Skënderbeun se tha “po,  bëhet”, Ismail Qemalin kur para 100 vitesh tha “po, bëhet”, Qemal Stafa tha “po, bëhet”, të rinjtë e Dhjetorit me të cilët u takuam në 8 Dhjetor thanëe “po, bëhet”, Pandeli Majko dhe Ilir Zela thanë “po, bëhet” – ne sot, të gjithë bashkë themi “po, bëhet, Shqipëria do të bëhet nga të rinj si ju”. Ky re:fresh është mbi të gjitha një rifreskim i idesë që Shqipëria bëhet dhe do të bëhet.

Por që të bëhet, përvec se të jemi solidarë, duhet të ofrojmë ide konkrete. Kjo do më shumë punë se sa të thuash ‘qeveria është e keqe’! Më shumë se kaq ne duhet t’i shpjegojmë cdo të riu, pse importi i plehrave është i keq, pse shitja e detit është gabim, pse ulja e buxhetit të arsimit është investim në injorancë, pse papunësia po e con vendin në greminë.

Jam shumë i ndërgjegjshëm që për cdo të vërtetë, për cdo aksion, për cdo ide të mirë, nuk vonojnë sulmet e baltës, fyerjet e sharjet. Gjuha e baltës po na vjedh mundësinë të bëjmë një debat racional, t’i trajtojmë të tjerët si vetën, të flasim për ide e jo për sharjet. Sot duhet të marrim një vendim, do bashkohemi me gjuhën e baltës apo do bëjmë dicka tjetër?  Ne të rinjtë e opozitës shqiptare refuzojmë të marrim pjesë në këtë teatër balte, ne refuzojmë t’i bashkohemi industrisë së shpifjes, ne refuzojmë të bëhemi palë me s’nuksat, hileqarët, plakaruqët që drejtojnë qeverinë e që dekurajojnë të rinjtë.

Ne do të bëjmë ekzaktësisht të kundërtën me këtë re:fressh! Do të inkurajojmë cdo të ri që do lojë të ndershme në jetën e tij, do të shkojmë në cdo qytet për të shpjeguar pse duhet që buxheti për arsimin të shkojë 5% që Shqipëria të ketë të ardhme, do të shpjegojmë si do të punësojmë 300mijë të rinj, do t’u tregojmë se taksat duhet duhen ulur për 95% të popullsisë për t’ju hequr lakun nga fyti, dhe do të mirëpresim këdo djalë apo vajzë që do të bëhet pjesë e kësaj Rilindje Shqiptare.

Ne mund të jemi të varfër ekonomikisht, por nuk ka pse të jemi të varfër në aspiratat dhe ëndrrat tona. Ndaj le të kuptojmë, se kjo nuk është betejë me policët, snajperët, bodigardët e të fortët e tyre. Kjo është një betejë për mendjet dhe zemrat e të rinjve. Mosha mesatare e Shqipërisë është 30 vjec, gjysma e popullsisë është nën 30 vjec – këto janë mendjet dhe zemrat e betejës tonë.  Nëse ata kanë paratë dhe pushtetin, ne kemi vetëm mendjet dhe zemrat e njerzve, dhe cdo pasion e energji që buron prej tyre. Ndaj ky është një re:fressh i mendjeve dhe zemrave tona, për të arritur tek mendja dhe zemra e gjithë Shqipërisë.

Lajmi më i mirë i vitit të mbrapshtë që kaloi, ishte se Shqiptarët e mirëpritën programin tonë të ri për një Rilindje Shqiptare. Ata na thonë që nuk presin që ne të bëjmë mrekulli, por ama 99% e shqiptarëve insistojnë në një shoqëri më të barabartë. Ne duhet të sigurohemi që një vajzë e vogël minatori ka të njëjtat shanse për të studiuar sa një vajze ministri. Ne duhet të sigurohemi që një djalë peshkatari ka të njëjtat shanse për t’u shëruar nga një sëmundje sa një djalë deputeti. Ne duhet të sigurohemi që fëmija e një bujku në fshat mund të konkurrojë denjësisht me një pasanik në bllok, e nëse e meriton ta fitojë atë pozicion ku po konkurron. Ne duhet t’i themi cdo të riu sot, se nuk ka rëndësi nëse vjen nga provinca apo nga bulevardi, nga deti apo nga bjeshkët, nga kamja apo nga skamja, nga e majta apo nga e djathta, nga veriu apo nga jugu – ne socialistët e Shqipërisë do bëjmë të paktën një gjë: garë të ndershme, garë të pastër, garë transparente për të shpërblyer ata që janë të zotë, ata që e meritojnë, ata që janë të aftë, ata që janë të denjë!

Miq, unë e di se ju jeni shumë të aftë.  Ju kam parë të dilni me rezultate të shkëlqyera në studime, të nisni sipërrmarrje të sukssesshme, të bëni mrekulli me talentet tuaja.  Ju nuk keni nevojë për ne që t’ia dilni në jetë. E kundërta është e vërtetë, ne kemi nevojë për ju! Po po, ne kemi nevojë për ju! PS ka nevojë për ju! Shqipëria ka nevojë për ju – për energjinë, pasionin dhe entuziazmin tuaj. Sot ne ju shtrimë dorën për një pakt, për një kontratë, për një besëlidhje, me njëri tjetrin për një Rilindje Shqiptare – e cila mund të bëhet vetëm nga të rinjtë.

Eja t’ja nisim që sot! Kur kjo konventë të mbarojë le të firmosim në holl referendumin kundër plehrave. Pasdite le të takohemi në BlackBox për programin e të japim një ide për ta pasuruar. Pas një jave le të prodhojmë një aksion dinjitoz për të nderuar heronjtë e 21 Janarit. Le të zgjohemi cdo ditë këtë vit me një ide fikse: “Unë sot do jap kontributin tim, me një firmë, me një ide, me një aksion” A nuk do të ishte kjo e mrekullueshme?

Miq, sikur të mos mbani mend asgjë nga këto që ndodhin sot, mbani mend këtë: Ky re:fressh është momenti ynë. Kjo konventë është koha jonë. Ky është momenti për të bërë një injorim total ndaj gradave dhe spaletave. Kjo është koha për të fashitur cdo peng e qejfmbetje nga e kaluara. Ky është momenti për të përqafuar këdo e për t’u pajtuar me këdo të ri që e do ndryshimin e Shqipërisë. Kjo është koha për një përkushtim total në këtë betejë për një Rilindje Shqiptare!

Ky është momenti ynë, kjo është koha jonë, ky është viti ynë, kjo është dita jonë! Le te shkojmë ta fitojmë këtë betejë!

Gëzuar dhe njëherë përvjetorin e FRESSH-it!

Rama: Shitësit e detit, vjedhësit e zgjedhjeve e vrasësit e protestuesve, nuk na bëjnë dot moral

18:37 Politika

PD: Rama dhe Veliaj, antishqiptarë, janë kundër Rrugës së Kombit

18:33 Politika

Pëllumb Xhufi për LSI-në: “antiligjore”, “antishqiptare”, “antikombëtare”, “antikushtetuese”

18:05 Politika

Rama: Re FRESSH, për të ndryshuar politikën

18:02 Politika

Mbytet anija çisternë në Porto Romano, 3 të vdekur

18:01 Politika

Jozefina Topalli si kryetare e PD-së

16:00 Politika

Deshmia tronditëse e gruas së Faik Myrtaj: Djali nuk u vetëvra, na kërcënojnë të mbyllim gojën

12:29 Politika

Opozita në Shqipëri kundër dhunës ndaj protestuesve në Kosovë, qeveria e mbron

21:00 Politika

FOTO REPORTAZH: Të rinjtë shqiptarë ‘shkundin’ Kosovën

20:46 Politika

RE:FRESSH

20:27 Politika