Potocnik, Mediu dhe importi i plehrave

Nga Lavdosh Ferruni

Komisionerin për zgjerimin në BE, z. Fyle, e njohin gjithë shqiptarët. Nuk është dëshira e z. Fyle për tu dukur në mediat shqiptare çdo ditë. Atë e tërheq në ekranet e faqet e gazetave tona politika shqiptare, e cila luan për më shumë se 20 vjet me ëndrrën e shqiptarëve për të qenë qytetar i barabartë europian. Katër ditë më parë, kur u bë publik raporti progresiv i BE-së për Shqipërinë, ku pasqyrohej se nuk ka progres ose ka pak progres (të sforcuar) këtu e aty, kjo mungesë progresi u përshëndet me fishekzjarrë nga qeveria. Loja me popullin  vazhdon.

Së fundmi, ndryshe nga gjithë komisionerët e tjerë të Brukselit,  ka filluar të bëhet i njohur në Shqipëri Komisioneri i Mjedisit, z. Janez Potocnik. Jo se z. Potocnik dëshiron të jetë figurë e njohur në Shqipëri, por figura e tij i intereson z. Mediu për të certifikuar pisllëkun anembanë vendit, që nuk e pastron, por e shton për ditë edhe me import plehrash vetë z. Mediu dhe qeveria ku ai bën pjesë.

Disa muaj më parë, me kërkesën e Mediut, z. Potocnik e priti atë në një takim. Do ketë qenë habi për z. Potocnik kur ka parë që z. Mediu kish marrë televizionin qysh nga Shqipëria. Mediu erdhi në Shqipëri e sajoi lajmin  se Potocnik ka thënë: “Ligji i mbetjeve është një ligj në përputhje të plotë me prioritetet politike të BE për mjedisin, madje ai është më i avancuar se edhe në disa vende të BE”.

Në fakt, siç u mor vesh nga vetë punonjës të BE-së, fjala e z. Potocnik nuk ka qenë ashtu si e ka interpretuar Mediu. Por përpara se të shkonte tek Potocnik, Mediut i duhej një raport nga një ekspert i pavarur, në të cilin të konfirmohej se nenet e importit të plehrave në ligjin për menaxhimin e integruar të mbetjeve nuk i kish futur Mediu e Saliu, por ishin në përputhshmëri të plotë me direktivën përkatëse të BE-së, pasi kështu ishte shkruar dhe në ligjin e miratuar.

Një sërë politikanësh, përfshi dhe Mediun e vetë Potocnik, kanë folur duke iu referuar edhe këtij eksperti, krahas dhe një eksperti këtu në Tiranë me emrin Paolo, që i fiton të gjithë tenderët për bërjen e ligjeve (tani dhe për zbatimin e tyre) dhe që ha çamçakëz e nuk vë kufje të dëgjojë kur flitet shqip në takime me publikun.

AKIP (Aleanca Kundër Importit të Plehrave) kërkoi disa herë  prej muajsh nga Mediu raportin e ekspertit të pavarur dhe ky raport nuk iu dha, as stafi i delegacionit të BE-së këtu në Tiranë nuk e dha. Raporti nuk u dha se ishte diskreditues jo vetëm për Ministrinë e Mediut, por dhe vetë Komisionin Europian që e merrte si referencë, pasi ai ishte vetëm 2 fjali (edhe pse i financuar nga projekti i Komisionit Europinan RENA) që kërkonte Mediu, që ligji është në përputhje të plotë me direktivën dhe madje më strikt se legjislacioni i BE-së.

Po pse i duhet kaq shumë Mediut e qeverisë që ta certifikojë ligjin e plehrave si ligj në përputhje me direktivën e BE-së, ndërkohë kur asnjë ligj tjetër sipas progres raportit të fundit nuk është në linjë me BE, ose mbahet pezull?

Shumë e thjeshtë. I vënë para një zemërimi popullor për sjelljen e plehrave nga importi, në një kohë që Shqipëria kutërbon plehra nga të katër anët, ai dhe qeveria e tij shohin si kalë beteje kundër armikut popull, kalin e lodhur të BE-së.

Edhe pse duket se Mediu ka luftuar shumë për të marrë një “disi progres” në raportin e BE-së për Shqipërinë në kapitullin për mjedisin lidhur me legjislacionin horizontal, e gjithë kjo “disi” bie, qëkurse në paragrafin që pason thuhet se “mungesa e zbatimit të legjislacionit mbetet shqetësim”. Kjo fare thjesht përkthehet që ligji që lejon importin e plehrave do shkelet, që do të thotë se kompanitë e Europës dhe botës, që duan të pastrojnë plehrat e rrezikshme nga vendet e tyre kundrejt shumave të mëdha të parave që jepen për këtë biznes (për shembull Palermo jep 300 euro për ton plehra që çon në Gjermani), do t’i sjellin në Shqipëri ku “ka disi progres ne bërjen e ligjit” dhe “ka mungesë në zbatimin e ligjit”, aq më tepër që mungesa e zbatimit të ligjit ka qenë dhe mbetet. Ky është vendi ideal për të sjellë plehra. Pra ligji e lejon t’i sjellësh plehrat dhe është e garantuar se ligji nuk zbatohet.  Por BE në raportin e saj, me veten e saj dhe ata që kanë shkruar ato rreshta, janë përsëri në rregull se e kanë shkruar pak a shume që “Zbatimi i ligjit për menaxhimin e mbetjeve dhe importin legal (që më sipër u tha se nuk zbatohet) duhet të garantohet që të zbatohet”. Dhe Mediu tha pardje në një konferencë shtypi se do zbatoj me përpikmëri (vini re, me përpikmëri) ligjin e plehrave.

Dialogu  i shoqërisë  civile me Potocnik

Për të tretin vit radhazi përfaqësues të shoqatave mjedisore nga vendet e Europës Juglindore, prej të cilave edhe 3 nga Shqipëria, para daljes së progres- raportit, bëjnë një takim me Komisionerin e Mjedisit, Potocnik në Bruksel. Në takimin e sivjetëm grupi Shqiptar (edhe artikullshkruesi në të) nuk mund të mos ngrinte çështjen e rrezikshmërisë për mjedisin shqiptar shkaktuar nga importi i plehrave, spekulimin që bëhet me  atashimin e importit të mbetjeve si çështje që e kërkon BE, si dhe kërkesën për referendum për heqjen e neneve që lejojnë importin e mbetjeve. Çështja e pengesave për referendumin kundra importit të plehrave u paraqit para z. Potocnik edhe në dokumentin e përbashkët të shoqërisë civile të rajonit si dhe në takimin e Ministrave të Mjedisit të rajonit, ku ishte prezent dhe z. Mediu.

Fjala e gjatë e z. Potocik si përgjigje e pyetjeve e çështjeve të shtruara prej grupit shqiptar lidhur me importin e mbetjeve ishte vërtet inkurajuese. Z. Potocnik e mbylli fjalën e tij duke thënë: “Ju keni mundësitë për të shkuar në një regjim më strikt”… “unë ndaj plotësisht të njëjtin opinion me ju”.

Mediu duhet të heqë dorë nga strategjia për të penguar referendumin. Atij i takon të kërkojë moratorium për importin e mbetjeve, deri në bërjen e referendumit, ku do të vendosë populli pro apo kundër importit të mbetjeve, plehrave më saktë.

Demokraci me trup të djegur dhe kokë të prerë

00:37 Blog

100-vjetori i pavarësisë, Sali Berisha dhe banaliteti i politikës kosovare

00:03 Blog

Dibranët i dhanë kësulën Berishës!

00:01 Blog

Djegia e Berishës

18:32 Blog

Pishtarë të vërtetë të demokracisë

17:23 Blog

Makth!

11:11 Blog

Pse i tuten të majtës!

19:44 Blog

A ka besë shqiptari?

19:39 Blog

Muri i policisë dhe nekrofilia e Berishës

19:04 Blog

A e dini sa janë 3000 USD që Saliu i ka dhënë Gjergj Ndrecës?

18:45 Blog