Parlamenti Europian miraton rezolutën për Shqipërinë, Fyle: Zgjedhjet, test thelbësor për integrimin

Kritika të forta për retorikën nacionaliste të Berishës dhe propozimin e tij për dhënien e shtetësisë. PE kërkon prova për luftën ndaj korrupsionit dhe krimit të organizuar

Parlamenti Europian ka miratuar rezolutën për Shqipërinë. Në këtë rezolutë është shtuar edhe një amendament pas shqetësimit se Sali Berisha i është kthyer retorikës nacionaliste. Në rezolutë thuhet se Shqipëria duhet të ketë kujdes me marrëdhëniet me fqinjët në rajon.

Gjatë debatit për rezolutën në Strasburg, Komisioneri për Zgjerimin mirëpriti raportin e Parlamentit Evropian për Shqipërinë.

Me gjithë reformat e mundësuara nga një klimë e re pas marrëveshjes politike të vitit 2011, Komisioneri për Zgjerimin Stefan Fyle përsëriti keqardhjen për mosplotësimin e kushteve të përcaktuara nga Komisioni.

“Ne e kemi bërë të qartë se çfarë duhet të bëjë Shqipëria për të vijuar progresin në rrugën e integrimit Europian. Fatkeqësisht, udhëheqësit politikë të vendit nuk ishin gjithnjë të aftë të vënë vijimësisht integrimin në krye të axhendave të tyre politike dhe nuk patën gjithnjë vullnetin për të bërë kompromiset e duhura politike për mbështetjen ndër-partiake që kërkojnë dukshëm reformat thelbësore. Kushtet e nevojshme janë ende aty prandaj duhet të vazhdojmë të inkurajojmë miqtë shqiptarë në qeveri dhe në opozitë që të fokusohen mbi procesin e integrimit europian,” tha Fyle.

Komisioneri përmendi edhe sfidat e shumta me të cilat përballet vendi, veçanërisht në fushën e Shtetit të së Drejtës, si dhe rëndësinë e zgjedhjeve të lira dhe të ndershme.

“Shqipëria duhet të ndërtojë mbi arritjet e deritanishme dhe të forcojë e të ruajë dialogun konstruktiv politik. Kjo është thelbësore që të vijojë të japë rezultate në reforma. Shqipëria duhet gjithashtu të dorëzojë prova të mëtejshme dhe të dëshmojë rezultate konkrete në luftën kundër korrupsionit, pastrimit të parave dhe krimit të organizuar. Mbajtja e suksesshme e zgjedhjeve parlamentare të vitit 2013 përbën një element thelbësor për perspektivën e integrimit europian të Shqipërisë,” theksoi Fyle.

Në përfundim komisioneri Fyle theksoi rëndësinë e ruajtjes nga vendi të politikës konstruktive në rajon, duke nënvizuar për liderët shqiptarë rëndësinë e mesazheve të qarta për promovimin e marrëdhënieve të mira fqinjësore.

Konkluzionet për Shqipërinë

Për herë të parë Këshilli i lexoi Parlamentit Europian përfundimet e vendeve anëtare përpara votimit të rezolutës për Shqipërinë në seancë plenare. Pas përsëritjes së konkluzioneve, Presidenca qipriote u ndal gjatë tek testi i zgjedhjeve.

“Ne të gjithë e dimë se shpesh zgjedhjet në Shqipëri kanë qenë të kontestuara. Zhvillimi i suksesshëm i zgjedhjeve në qershor të vitit të ardhshëm do të jetë thelbësor për të dëshmuar angazhimin e të gjitha partive politike shqiptare ndaj reformës zgjedhore. Ky përbën një test thelbësor për mirëfunksionimin e institucioneve demokratike të vendit,” tha ministrja e Jashtme e Qipros, Erato Kozakou- Marcoullis.

Debati i eurodeputetëve u mbizotërua nga thirrjet për dialog politik, çështja e zgjedhjeve dhe shqetësimi për retorikat nacionaliste.

“Kur zoti Berisha shkoi në Vlorë për të festuar 100-vjetorin e krijimit të shtetit shqiptar siç ishte krijuar në atë kohë, ai përmendi pesë vende ku jetojnë minoritete shqiptare. Më pas ai u përpoq ta ndryshojë atë deklaratë dhe mendoj se përpjekjet e tij i përkeqësuan edhe më keq gjërat,” tha eurodeputetja greke Marietta Giannakou.

“Parlamenti Europian dhe institucionet europiane duhet të mbajnë qëndrim kundër deklaratave të tilla nacionaliste dhe irredentiste, në mënyrë që të promovojnë marrëdhëniet e mira mes Shqipërisë dhe vendeve fqinje,” tha Nikolaos Chountis, raportues për Shqipërinë në PE.

“Zgjedhjet janë një shans i madh për të treguar se sa fort janë të rrënjosura vlerat demokratike tek politikanët dhe mekanizmat në vend,” u shpreh Eduard Kukan.

“Pa bashkëpunimin mes qeverisë dhe opozitës progresi i deritanishëm s’do të ishte i mundur. Prandaj dëshiroj t’i bëj thirrje miqve shqiptare, si në qeveri dhe në opozitë që të vijojnë në këtë rrugë, pasi pa bashkëpunim nuk do të ketë progres të mëtejshëm në çështjet e përmendura nga presidenca dhe Komisioneri,” tha eurodeputeti çek Libor Rouçek.

Debati i mbrëmjes në seancë plenare për Shqipërinë përfundoi brenda 30 minutash. Rezoluta e Parlamentit Europian, e cila i bënte thirrje Këshillit të BE-së t’i jepte Shqipërisë statusin kandidat nëse plotësoheshin kushtet, u votua dy dite pas konkluzioneve të vendeve anëtare.

Cornelissen: Shqipëria, viktimë e politikës

Eurodeputetja holandeze, Marije Cornelissen, fajëson dhe kritikon ashpër klasën politike shqiptare, e cila ka nisur që tani fushatën elektorale dhe ka lënë mënjanë nevojat e vendit dhe axhendën europiane.

Edhe kjo politikane kritikon lëvizjen e Berishës me deklaratën për dhënien e pasaportave të gjithë shqiptarëve.

“Kur flitet për Shqipërinë, një prej shqetësimeve tona më të mëdha është gjithnjë klima politike, mungesa e vullnetit mes partive të ndryshme kryesore për të bashkëpunuar. Kjo u duk sikur u përmirësua gjatë vitit të fundit dhe se Parlamenti për pak kohë sikur punoi në rregull, por sot unë nuk jam kaq e sigurt. Në nëntor, tre ndryshimet e kërkuara të legjislacionit dështuan të kalonin në Parlament për shkak të një lufte politike krejtësisht pa lidhje. Përse? Kryeministri Berisha njoftoi se të gjithë personat me etni shqiptare mund të marrin pasaportën shqiptare, krejtësisht i ndërgjegjshëm se çfarë do të shkaktonte kjo në rajon. Ai është politikan prej një kohë tepër të gjatë për të mos e ditur një gjë të tillë, atëherë përse? Edhe takimi i delegacionit tonë parlamentar që ishte planifikuar për javën që vjen u anulua në momentin e fundit. Unë e kam gati valixhen dhe mezi po prisja dialogun konstruktiv dhe bashkëpunues me koalicionin qeveritar dhe opozitën. Por qartësisht ata nuk duan. Përse? Dhe të gjitha këto, përpara një takimi shumë të rëndësishëm të Këshillit, përbënë në thelb një përpjekje të koordinuar për të shkatërruar të gjitha shanset e Shqipërisë për statusin kandidat. Pse dreqin? Mua më duket se fushata për zgjedhjet e ardhshme ka nisur që tani, kaq shpejt, duke mos respektuar nevojat e vendit dhe axhendën europiane. Unë vetë do të doja t’i jepja popullit shqiptar statusin kandidat, por kam frikë se politikanët e zgjedhur prej tyre humbën sërish në betejat e brendshme për pushtet, dhe se kjo nuk do të jetë e mundur deri sa ata ta zgjidhin këtë prioritet. Prandaj ju lutem, zoti Berisha, zoti Rama, në interesin e popullit tuaj. Ju lutem!” tha Cornelissen.

Tjetër vrasje, qëllon për vdekje kushëririn pas konfliktit për pronën

13:43 Politika

Kthimi i Enver Hoxhës, zbulohet puna si kamerier dhe orator në varrime

13:39 Politika

Shinasi Rama: E vërteta e themelimit të PD, Berisha erdhi direkt nga Ramiz Alia

12:51 Politika

Gjiknuri: PS të bëjë publike që tani listën e kandidatëve për deputetë

12:24 Politika

Gjykata sekuestron pasuritë e Prudentinos, fal kunatin e Majlinda Bregut

12:05 Politika

Vrasja e gruas në Fier, ja dy pistat ku po hetohet

11:45 Politika

Paraqiten të dhënat e censusit: 99 përqind e deklarojnë shqipen gjuhë të nënës

11:47 Politika

Deputeti demokrat ndërron mendje: Nuk do e votoj buxhetin? Jo, jo, do e votoj

11:35 Politika

Vetro: Kemi paguar garancinë prej 170 milion euro

10:59 Politika

FOTO LAJM/ Targat e reja të makinave në Kamëz

23:31 Politika