INTERVISTA/ Dashamir Shehi: I detyruar të bashkëpunoj me PD-në. Vendimi për "21 janarin" nuk të lë shije të mirë

Dashamir Shehi nuk dëshiron të mbetet një politikan pa peshë. Jo se ka qenë i tillë, porse ka vendosur të mos jetë thjesht një analist konstatues dhe aq. Prandaj, ditët e fundit ka zgjedhur të bashkëpunojë me Partinë Demokratike, të hyjë në koalicionin e saj, pavarësisht se ka qenë një nga kritikët e ashpër të mazhorancës. Arsyeja e këtij hapi është e thjeshtë: I vetëm nuk do t’ia dilte dot kurrë të hynte në Parlament. “Sigurisht, unë kam humbur shumë nga autonomia ime, por gjithnjë në funksion të pranisë parlamentare, nëse do të duam të bëjmë “real politikë”. Përndryshe, do të mbetesha një analist, moralist, i ndershëm e intelektual, me një tog fjalësh të bukura, por politikisht pa peshë”, thotë ai. Nga ana tjetër, premton se nuk do të rreshtë së qëni kritik sepse i tillë është. Dhe si për ta vërtetuar, nuk ndryshon asnjë grimë nga qëndrimi që ka pasur për 21 janarin. Vendimi i gjykatës i ka lënë një shije të keqe.

Nga Renato Kalemi

– Zoti Shehi, ndonëse na ndajnë edhe dy-tre muaj nga fillimi zyrtar i fushatës zgjedhore, partitë politike kanë disa javë që kanë nisur negociatat për marrëveshje parazgjedhore e aleanca partiake. Vitet e fundit, Lëvizja për Zhvillim Kombëtar ka garuar gjithnjë e vetme në zgjedhje. Po në 23 qershor, po shihni mundësinë e ndonjë koalicioni apo do të dilni sërish vetëm?

Kam qenë i këtij mendimi dhe moralisht i qëndroj idesë. LZHK-ja ka qenë gjithnjë një alternativë, brenda krahut të djathtë. Mirëpo, me ligjin e ri elektoral, të dalësh i vetëm në zgjedhje është bërë praktikisht e pamundur. Që një parti politike të hyjë në Parlament duhet të marrë 8 për qind të votave në të gjithë Shqipërinë dhe kjo është përtej mundësive elektorale që ka LZHK-ja. Luftë elektorale mund të bëhet vetëm në Tiranë, pasi qarqet e tjera do të përfundojnë me një zgjidhje mes PD-së dhe PS-së. Ligji është ndërtuar me këtë synim. Në këto kushte, po diskutojmë mundësitë e bashkëpunimit me një koalicion me të gjerë. Historia, personazhet dhe rruga që kemi ndjekur si LZHK, na çojnë në mënyrë të detyrueshme nga mazhoranca e sotme, drejt qendrës së djathtë. Po diskutojmë me të gjitha palët se cila mund të jetë shtegu elektoral që LZHK-ja të përfaqësohet në Parlament dhe të mos mbetemi në nivelin e analizës politike, të cilin unë, mirë apo keq, e kam përcjellë tek qytetarët prej vitesh. Mirëpo, nëse do të duam që përtej analizës, debatit dhe lirisë së të shprehurit, të kemi edhe disa kartona parlamentarë, detyrimisht na duhet të lidhim aleancë me një koalicion që e bën të mundur këtë. Principi politik është relativisht i mbyllur. Kemi bërë një lloj marrëveshjeje xhentëllmenësh, ku në njëfarë mënyre të dyja palët jemi tërhequr mbrapa. Sigurisht, unë kam humbur shumë nga autonomia ime, por gjithnjë në funksion të pranisë parlamentare, nëse do të duam të bëjmë “real politikë”. Përndryshe, do të mbetesha një analist, moralist, i ndershëm e intelektual, me një tog fjalësh të bukura, por politikisht pa peshë.

– Fryma e Re Demokratike dhe Lëvizja Socialiste për Integrim janë dy forca politike, të cilat po përfliten në kërkim të krijimit të një Poli të Tretë në zgjedhje, jashtë dy forcave të mëdha. Ju e keni provuar në vitin 2009 themelimin e një Poli të Tretë. Si e shihni këtë përpjekje të tyre?

Politika jonë është bipolare, e cila fatkeqësisht në Shqipëri përkthehet si bipartizane. Por, këto janë dy koncepte krejt të ndryshme, prandaj “Poli i Tretë” nuk më duket një term i përshtatshëm sepse polet gravitojnë ose përqark ideve të së djathtës ose të së majtës. Kur themi një “Pol i Tretë”, duket sikur në Shqipëri kemi një histori centriste, e cila në Europë do të konsiderohej me partitë liberale europiane. Këtu nuk ka! LSI-ja dihet që është një parti e majtë dhe ka qeverisur edhe me të djathtën. Nga ana tjetër, z. Topi vjen nga e djathta. Mendoj se edhe këto bashkime janë në funksion të këtij ligji elektoral dhe daljes nga ky rrethim, pasi alternativat politike jashtë dy partive të mëdha e kanë të vështirë të mbijetojnë. Kjo është një shprehje e kësaj nevoje për të pasur më tepër shanse elektorale dhe jo ide të qendrës, midis të majtës dhe të djathës. Nga kjo pikëpamje, do të ketë padyshim grupime të treta, jo se qëndrojnë në mes, por që qëndrojnë veç këtyre dy partive kryesore për të rritur shanset e tyre elektorale. Unë uroj që kjo të ndodhë sepse harta politike shqiptare do të zgjerohej, do të ishte më elastike, dhe do të thyhej ky lloj bipartizanizmi, të cilën nuk e konsideroj si zgjidhjen më të mirë për Shqipërinë.

– Cilat janë pritshmëritë e LZHK-së në zgjedhjet e ardhshme? Mendoni se mund të hyni në Parlament?

Shpresoj të kemi shumë më tepër se një votë. Por, minimalisht një. Megjithatë, kjo varet nga njerëzit që do të vëmë në qarqet kryesore si Durrësi, Fieri, Elbasani; pra, aty ku ka shanse më të mëdha elektorale. Uroj dhe shpresoj që fushata zgjedhore të jetë e lirë, e ndershme dhe të mos ketë tensione sepse ngarkesa emocionale bën që votuesi të shkojë ose në një krah, ose në krahun tjetër. Liria në Shqipëri, duke qenë akoma e dobët, përkulet.

– Ndërkaq, për ju personalisht flitet për mundësinë e të qënit në listën e deputetëve të Partisë Demokratike në Tiranë, si çelësi për të qenë pjesë e Parlamentit. Sa e vërtetë është kjo dhe nëse po, keni pranuar?

Ky është një debat që nuk është mbyllur. Por, është një nga zgjidhjet që mund t’i jepet këtij bashkëpunimi. Sigurisht, kjo temë i takon fillimisht PD-së, pra ajo duhet të zgjedhë mënyrën se si duhet të operojë me aleatët e koalicionit, sipas peshës dhe specifikave që kanë ata. Megjithatë, deri tani asgjë nuk është vendosur dhe gjykoj se do të vendosen në limitet kohore të kodit. Esenca politike e marrëveshjes është mbyllur, pjesa tjetër janë çështje teknike. Unë do të preferoja një zgjidhje, e cila u siguron të gjithë atyre që kontribuojnë me votat e historinë e tyre politike, garancinë për të hyrë në Parlament. Sepse jo të gjithë kanë mjetet financiare apo të pushtetit. Në njëfarë mënyre, unë kam qenë disident, kritik, një lloj opozitari i mazhorancës së sotme dhe nuk kam as shanset dhe as mundësitë e shumë zotërinjve të tjerë, të cilët administrojnë ministri dhe një sërë levash e mekanizmash që fatkeqësisht po përdoren edhe për të mbledhur vota.

– Ju thatë se keni qenë kritik ndaj mazhorancës aktuale. Përse vendosët që të lidhni marrëveshje me të? Çfarë ju shtyu drejt saj?

Na shtyu ky ligj elektoral sepse në rrethana të tjera, sigurisht që do të kishim bërë edhe zgjedhje të tjera politike. Ne u detyruam të zgjedhim grupin që ndjejmë më afër, por nuk kam aspak ndërmend të heq dorë nga kritika ime, nga idetë ndryshe brenda kësaj mazhorance sepse kjo ka qenë pasuria ime dhe investimi im politik. Këtu qëndron edhe vlera ime, sepse ata që janë njëlloj, unë nuk e di se ç’bashkojnë me njëri-tjetrin; bashkojnë thjesht interesat. Gjykoj se bashkimi është bashkimi i gjërave jo të kundërta, por që janë ndryshe. Dhe kjo është “vlera e shtuar” e imja dhe e LZHK-së. E dimë shumë mirë se do t’i paguajmë edhe një çmim vendimit që kemi marrë. Do t’i paguajmë çmim atyre që kanë qenë më rezistent kundër kësaj mazhorance, e sigurisht këto janë vota që do të shkojnë në drejtime të tjera. Siç jam i sigurtë që, ndoshta do të vijnë edhe vota të tjera brenda kësaj mazhorance, të cilat nuk kanë kurajon të dalin më vete dhe shohin tek LZHK-ja një alternativë tjetër. Pra, nuk gjykoj se ka ndodhur qameti i madh, por një fenomen politik shqiptar. Jemi munduar që brenda kësaj marrëveshjeje të ruajmë interesat e atyre që do t’i kemi partnerë në të ardhmen, si dhe të ruajmë dinjitetin dhe personalitetin e kësaj force politike, hapësirën e së cilës e kemi fituar me dhëmbë dhe duke qenë në luftë me të gjitha palët.

– Para disa ditësh, Gjykata e Tiranës dha pafajësinë për dy të akuzuarit e vetëm për vrasjen e katër protestuesve në protestën e 21 janarit 2011. Ky vendim u vlerësua si tronditës nga Ambasada Amerikane në Tiranë. Çfarë shije ju la ai vendim?

Nuk më ka lënë ndonjë shije të mirë. Gjykoj se 21 janari i ka të gjitha palët fajtorë. Në radhë të parë, Gardën, policinë ose këtë qeveri, e cila në mënyrë inkompetente nuk ishte në gjendje të administronte një demonstratë. Sepse përpara se të mbërrijmë tek armët e zjarrit, kemi hidrantët, tymuesit, plumbat e gomës, me mijëra policë përqark Tiranës, për të ndalur një turmë të dhunshme, e jo më kur bëhej fjalë për 300-400 vetë. Sigurisht, nga ana tjetër, kemi edhe një opozitë, e cila një manifestim popullor shumë të madh e shpërdoroi me një grup gjysmë vandalësh në mënyrë të panevojshme, duke iu turrur kot mureve të Kryeministrisë dhe policisë, pa ndonjë qëllim konkret. Ai manifestim mund të ishte i madh dhe i rëndësishëm, pa përfunduar në atë mënyrë. Nga të gjitha organet e drejtësisë, duke filluar nga Prokuroria e deri te gjykatësit, gjykoj se ka një mungesë përgjegjësie e profesionalizmi, sepse një palë kërkon 25 vjet, një palë tjetër i nxjerr të akuzuarit të pafajshëm. Në këto kushte, të gjithë bëjnë një analizë me veten: ose e kanë fajin prokurorët, që kërkojnë dënime maksimale, ose e kanë fajin këta gjykatës, që shpallën pafajësinë.

Ky është një proces që nuk është mbyllur ende. Është një proces që ka nevojë të ketë qetësinë e vet, si të gjitha proceset e mëdha, për t’u realizuar plotësisht. Që të shkarkohet nga pjesa emotike, njerëzore, sepse kemi katër viktima. Që të shkarkohet edhe nga presioni politik, i cili është parazgjedhor. Por, shpresoj që ai të kalojë në të gjitha fazat e nevojshme të një procesi të madh, i cili ka marrë këtë lloj valence morale e politike, mbi të cilin shpeshherë gjykohen edhe pavarësia e institucioneve.

– LZHK-ja ka një të kaluar të lidhur me monarkinë, duke qenë se u themelua nga Leka Zogu I. Ndërkaq, prej disa ditësh është ndezur një debat lidhur me kërkesën që Princi Leka ka bërë për kthimin e Pallatit të Brigadave, si pronë e familjes së tij. A keni një koment mbi këtë çështje?

LZHK-ja nuk është parti e legalitetit. Ajo e ka marrë spunton nga qeverisja e Ahmet Zogut, nga dëshira dhe suksesi shtetformues që pati ajo periudhë, të cilat kemi dashur t’i sjellim edhe në Shqipërinë e sotme. Kjo ka qenë dhe është fryma e LZHK-së. Parrulla jonë ka qenë: “Ne bëjmë shtet”. Ideja për të bërë monarki nuk ka ekzistuar brenda LZHK-së. Ne jemi një grup republikanësh, të cilët për referencë të së djathtës marrim atë pjesë të historisë në të cilën e djathta shqiptare ka prodhuar disa struktura shtetërore, që kanë funksionuar relativisht mirë për kohën. Këtë lloj shpirti e fryme, ne vazhdojmë ta përcjellim. Pra, “zogizmin” si filozofi shtetformuese do ta vazhdojmë.

Problemet e pronave janë probleme “puro” familjare. Unë duhet të isha një noter ose avokat që të jepja një mendim për këtë çështje, nëse i takon kësaj familjeje apo i takon shtetit shqiptar. Por, gjykoj se ç’është e familjes, i duhet dhënë si çdo familjeje tjetër. Çfarë është e shtetit shqiptar, duhet ta mbajë shteti.

Marrë nga Revista Klan

Rikthehen hetimet për vdekjen e agjentit të SHISH, Isa Çopa

16:34 Politika

Malaj: Lista e deputetëve, nga vota e fshehtë. S’na duhet një trajner i fortë, por një ekip zinxhir

15:17 Politika

Topalli arrin të takojë Erdogan, bisedojnë për gazsjellësin TAP

13:03 Politika

Eduard Selami në 'ditë të hallit' me jetën në SHBA?

12:34 Politika

Nju Jork, Kreshnik Spahiu shpallet ‘Qytetar Nderi’ për mbrojtjen e interesave të shqiptarëve

11:30 Politika

INTERVISTA/ Shinasi Rama: Shqipëria është kthyer në një shkretëtirë morale

11:05 Politika

“Rrëzimi i bustit të Enver Hoxhës”, Nishani dekoron Jamarbër Malltezin

10:55 Politika

72- vjeçarja: Burrin e vrava se më tradhtonte me fqinjën

10:51 Politika

Gjendet i vdekur në motel 45- vjeçari, e kishte tepruar me Viagrën

10:46 Politika

Eduard Selami takon Nishanin: E vlerësoj për punën që po bën si president

10:38 Politika