Stafi i ILDKP: Kuvendi të ndalë Zana Xhukën, po krijon institucion paralel!

Stafi i Inspektoratit të Lartë të Deklarimit dhe Kontrollit të Pasurive vazhdon të denoncojë titullaren e këtij institucioni, Zana Xhuka, kësaj here duke e akuzuar se po krijon struktura paralele në institucion, që do të dëmtojnë dosjet personale të çdo zyrtari, duke i vendosur ato në duart e ekspertëve të jashtëm. Më poshtë letra e plotë e tyre.

Në vijimësi të informacionit, të përcjellë më datë 21.10.2013, ku kemi bërë me dije shkeljet e kryera nga Inspektorja e Përgjithshme e Inspektoratit të Lartë të Deklarimit dhe Kontrollit të Pasurive dhe Konfliktit të Interesit, detyrohemi të vijojmë përsëri me denoncimin e një tjetër shkelje flagrante të kryer prej saj, e që sjell përfundimisht degradimin e një institucioni të tërë.

Në datën 24.10.2013, në faqen zyrtare të Inspektoratit të Lartë të Deklarimit dhe Kontrollit të Pasurive dhe Konfliktit të Interesave  nga znj. Zana Xhuka është bërë publik njoftimi si më poshtë vijon:

“Inspektorati i Lartë i Deklarimit dhe Kontrollit të Pasurive dhe Konfliktit të Interesave, në përputhje me ligjin nr. 9049, datë 10.04.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, neni 29, njofton thirrjen e 2 ekspertëve  të pavarur, të licencuar, të fushave të ndryshme, për të bërë vlerësimin e deklaratave të interesave private të subjekteve deklarues. Të interesuarit mund të aplikojnë zyrtarisht ose me e-mail në adresën elektronike postare zyrtare [email protected], brenda datës 30 tetor 2013”.

Ky fakt skandaloz, për të cilin vihemi në dijeni nga njoftimi zyrtar i sipërcituar, vërteton edhe një herë shqetësimet e stafit, të bëra publike edhe më parë, për ndërhyrje në dokumentacionin zyrtar nga persona të huaj, që në këtë rast “legjitimohen” nga titullarja e institucionit me emrin “ekspertë të licencuar”. Ky njoftim zyrtar i Inspektores së Përgjithshme, provon shqetësimet tona për manipulim, ndërhyrje arbitrare dhe të kundërligjshme në deklaratat e interesave private apo serverin e të dhënave me qëllim zhdukjen dhe manipulimin e dokumentacionit.

Baza ligjore sipas znj. Xhuka është neni 29 i ligjit “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, ndërkohë që në këtë nen shprehimisht thuhet se : “Inspektori i Përgjithshëm ka të drejtë të thërrasë ekspertë të pavarur, të licencuar, të fushave të ndryshme, për të bërë rivlerësimin e pasurive ose për çështje që këta çmojnë të arsyeshme”.

Pra, në këtë dispozitë, e cila keqinterpretohet në mënyrë të qëllimshme nga zonja Xhuka, përcaktohen qartësisht rastet kur Inspektori i Përgjithshëm ka të drejtë të thërrasë ekspertë të licencuar dhe që ka të bëjë kryesisht me vlerësimet e pasurive te paluajtshme, objekt kontrolli.

Ligji organik nr. 9049, datë 10.04.2003 “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, i ndryshuar, ngarkon qartësisht vetëm punonjësit e Inspektoratit të Lartë, pra inspektorët e lartë dhe ndihmës-inspektorët e lartë, për të ushtruar kontrollin e drejtpërdrejtë të deklaratave të interesave private (neni 17).

Në interpretim të nenit 29 dhe 30 të ligjit 9049 të sipërcituar, ekspertët e licencuar merren vetëm në raste të veçanta kur gjatë hetimit të kryer nga grupet e kontrollit inspektorë të lartë dhe ndihmës- inspektorë të lartë, të ngarkuar nga ligji për kryerjen e kontrolleve dhe hetimin administrative, nevojiten njohuri specifike për fushat të caktuara, të cilat janë të nevojshme për të dalë në rezultate të sakta. Pra, eksperti i thirrur me vendimin përkatës, në rastet kur kjo shihet e nevojshme apo e arsyeshme nga grupet e kontrollit, nuk bën verifikimin e deklaratave të pasurisë të subjektit në hetim, por shprehet me akt vetëm për atë çështje konkrete për të cilën i kërkohet mendim. Akti i ekspertimit bëhet pjesë e dosjes së hetimit, por akti përfundimtar i kontrollit, i bazuar edhe në të dhënat e aktit të ekspertimit, përpilohet nga inspektorët e lartë.

Ndër të tjera, vlen të përmendet dhe fakti se deklaratat e interesave private, përmbajnë të dhëna sensitive konfidenciale të subjekteve deklarues, dhe një vendim i tillë për kryerjen e kontrollit dhe lënien e administrimit te deklaratave të interesave private në dorë të personave jashtë institucionit, përbën gjithashtu shkelje ligjit nr.9887, datë 10.3.2008 për “Mbrojtjen e të dhënave personale”.

Me këtë veprim zonja Xhuka po rrëmben dosjet e kontrollit të punonjësve të Inspektoratit të Lartë, duke krijuar kështu një strukturë paralele ilegale për administrimin e deklaratave të interesave private, që përveç të tjerave institucionit do t’i kushtojë dhe financiarisht, pasi në paragrafin e dytë të nenit 29 përcaktohet se: “shpenzimet e ekspertëve përballohen nga buxheti i Inspektoratit të Lartë”.

ILDKPKI ndodhet në presion të vazhdueshëm që prej një jave nga persona të armatosur që hyjnë e dalin në institucion ne kundërshtim flagrant me rregulloren e brendshme. Për këtë qëllim znj. Zana Xhuka ka thirrur në ndihmë të emëruarit e saj së fundmi, bashkëshortët dhe të afërmit e stafit dhe bashkëpunëtorëve të saj. Efektivë me dokumente policie nën drejtimin e Genti Mullaraj, bashkëshorti i sekretares personale së znj. Zana Xhuka, Rudina Mullaraj, dhe persona të tjerë të armatosur, mbajtën gjatë gjithë javës që shkoi nën presion punonjësit e ILDKPKI.

Po zhduken nga dosjet e personelit, aktet zyrtare që vërtetojnë marrjen e statusit të nëpunësit civil të punonjësve të ILDKPKI me qëllim pushimin e tyre nga puna. Nga ora 8.00 deri në orën 16.00, çdo ditë, të gjithë qëndrojmë të mbledhur në një sallë për të shmangur incidentet që Inspektorja e Përgjithshme dhe persona të tjerë mund të inskenojnë, siç ishte rasti me kolegun tonë Shkëlqim Ganaj, ndaj të cilit shpifi në mënyrën më të ulët, edhe pse në takimin e të martës me të, ku u pretendua dhuna verbale ndaj saj, ishin prezent 20 punonjës. Për këtë po përgatisim kallëzimin penal për shpifje për shkak të detyrës ndaj Inspektores së Përgjithshme znj. Zana Xhuka.

Përsa më sipër, pavarësisht kallëzimit penal që do të depozitojmë sërish në organin e akuzës për gjithë shpërdorimet e mësipërme, kërkojmë ndërhyrjen TEPËR URGJENTE të Kuvendit të Shqipërisë, në cilësinë e organit epror, që të ndalojë veprimet e mëtejshme arbitrare dhe të kundërligjshme, deri në marrëzi, të Inspektores së Përgjithshme, znj. Zana Xhuka, të cilat po sjellin pasoja degraduese të pariparueshme për institucionin dhe po cenojnë rëndë edhe sigurinë e tij dhe të punonjësve të ILDKPKI. Ju lutemi, NDËRHYNI SA NUK ËSHTË VONË.

Visho Ajazi zbaton urdhrin e Ramës, heq portretin e Nishanit nga zyrat

10:53 Politika

Berisha ankohet: Rama hoqi flamurin e NATO-s dhe të BE-së

10:50 Politika

Ish- drejtori i Rezervave të Shtetit: Kishim dy vjet pa buxhet

10:16 Politika

INTERVISTA/ “Emri im në listën e Nishanit”

15:26 Politika

PD merr në mbrojtje Nevila Nikën: U shkarkua një personalitet i vërtetë

15:03 Politika

Sërish tritol, këtë herë makinës së oficerit të policisë gjyqësore

12:51 Politika

Reagon Shpëtim Gjika: Jam i shokuar

12:44 Politika 1 koment

Merret i pandehur Shpëtim Gjika, akuzohet se falsifikoi lejet e ndërtimit

12:30 Politika

Braçe: Do të japin llogari ata që zbrazën arkën e shtetit. Mungojnë 230 milion USD

20:23 Politika

Ish- zëdhënësi i Blair rekomandon strategjinë elektorale të Ramës për laburistët

18:05 Politika