Nëse do na dëgjoni, fatalitetet në rrugë do të minimizohen

Nga Dedë Shkurti

Në vëmendje të:

Kryetarit të Kuvendit të Shqipërisë, zotit Ilir META,

Kryeministrit të Shqipërisë, zotit Edi RAMA,

Me cilësinë e një qytetari të përgjegjshëm të kësaj Shqipërie të përbashkët, si inxhinier transporti dhe i industrisë automotive, me një përvojë shumë të gjatë, plot 37 vjet, si drejtues teknik i kompanive më të mëdha të transportit automobilistik, si ekspert i trafikut dhe sigurisë rrugore, po u drejtohem Ju si “kolonat institucionale kushtetuese” të shtetit, si burrështetasit kryesorë të legjislativit dhe ekzekutivit të Shqipërisë:

Me një qasje komplet ndryshe nga rutina burokratike e deritashme, vendosni në mënyrën më urgjente të mundshme autoritetin ligjor dhe qeverisës në rritjen dhe konsolidimin e sigurisë rrugore duke rivendosur rregullin dhe ligjin e munguar në rrugë, për të eliminuar anarkinë e trafikut dhe minimizuar aksidentet fatale që po përditësohen në formën e një masakre rrugore.

Insistoni me influencën tuaj imponuese në ndërmarrjen e këtyre  nismave dhe veprimeve legjislative dhe ekzekutive:

Ndërhyrjen në Kodin Rrugor dhe Kodin Penal të Republikës së Shqipërisë për të ndryshuar cilësimin ligjor të aksidenteve me vdekje nga “Vdekje si pasojë e shkeljeve të rregullave të qarkullimit rrugor”, në “Vrasje Rrugore”.

Klasifikimin ligjor të shkeljeve të Kodit Rrugor, në “Kundravajtje” dhe “Sjellje Kriminale” (Kundravajtje e Rëndë, Penale) ku, të gjitha praktikat e verifikuara të shkeljeve të dërgohen përpara drejtësisë, në gjykim me afat të shkurtuar.

Rikrijoni nga themeli (rilindeni), divizionin e Policisë Rrugore: me një personel krejtësisht të ri, me arsim universitar inxhinierik dhe juridik, nëpërmes një sistemi konkurrimi e rekrutimi rreptësisht profesional dhe moral, duke zhdukur nga mjedisi rrugor dhe kujtesa “policin- kapter” të trafikut, duke vendosur “oficerin- polic” të diplomuar dhe të trajnuar.

Zhdukni nga kryqëzimet, semaforët dhe stacionet e improvizuara në rrugë policët statikë të maskuar dhe të hallakatur me cigare në buzë që vjelin gjoba dhe “taksa” për eprorët.

Krijoni një divizion të Policisë Rrugore në lëvizje, që dikton dhe kontrollon tempin e lëvizjes në akset rrugore, i pajisur ekskluzivisht me autoveturat të reja, më të mirat në treg, të pajisura me kompjutera dhe sisteme monitorimi, e aftë të perceptojë që në fillesë anomalinë e trafikut dhe shkeljet rrugore potenciale që çojnë pashmangshmërisht në aksidente.

Jepini me ligj policit- oficer kompetencën për të ndaluar dhe shoqëruar përdoruesit e rrugës që shfaqin sjellje kriminale në rrugë.

Me një divizion policie të “motorizuar” në lëvizje njëzet e katër orë, mbulohen të gjitha akset rrugore, eliminohet “paraprita” hileqare e postablloqeve dhe çdo përdorues rruge do të ndjehet vetëdijshëm se, në më pak se çdo orë, ka në ndjekje, por edhe në ndihmë, para dhe pas Policinë Rrugore.

Vendosni rishtaz në strukturën e Policisë emërtesën e “Sherifit”, si hallkë ndërmjetëse operative midis ngjarjeve të rënda në rrugë, stacioneve të policisë dhe reparteve të paraburgimit.

Rikonstruktoni në themel Drejtorinë e Shërbimeve të Transportit Rrugor duke zhbërë korrupsionin e legjitimuar me “shkelje syri”, për të mbushur arkat elektorale dhe xhepat e shefave me “detyrim- përcaktim”, duke e vënë këtë agjenci në binarët e vërtetë të një shërbimi profesional të mirëfilltë për qytetarët.

Rishikoni në themel dhe precizion koncesionin e dhënë për Kontrollin Vjetor të Automjeteve sepse i keni hequr vetes (shtetit), një funksion jetik- kontrollin si dhe keni privuar arkën e shtetit nga të ardhura neto me investim minimal.

Rivendosni Kontrollin Periodik Teknik të Automjeteve në servise të akredituara dhe të licencuara si servise dhe të çdo individi që e quan veten mekanik automjeti.

Ndryshoni në themel praktikën e formimit të drejtuesve të automjeteve, (autoshkollat), duke i shndërruar ato nga kioska të shitjes së Lejeve të Drejtimit, në klasa të mirëfillta dhe laboratorë të Edukimit Rrugor.

Futeni lëndën e “Edukimit Rrugor” në të gjitha ciklet e shkollave, fillimisht edhe si lëndë ekstrakurrikulare.

Investoni drejtpërdrejtë me fonde shtetërore në përfshirjen e emisioneve televizive për edukimin rrugor.

Ndërhyni me urgjencën që ua dikton përgjegjësia shtetërore që keni, për t’i shndërruar rrugët nga thjesht karexhata elektorale për prerje shiritash, në rrugë me standarde, duke plotësuar të gjithë elementet e tjerë, të domosdoshëm, sipas Kodit Rrugor.

Vendoseni në standardin tuaj të punës, se asnjë rrugë apo segment i saj, nuk mund të përurohet dhe inventarizohet në inventarin kombëtar të aseteve pa qenë e kompletuar me të gjithë elementet e saj.

Vendosni në mënyrë të përhershme në rrugë ndalesat: “Ndal Policia” në një korsi shtesë të segmentuar, si vende kontrolli të organizuar të herëpashershëm ku përdoruesit e rrugës të jenë të detyruar ta zerojnë shpejtësinë në prani të këtij sinjali rrugor.

Të nderuar zotërinj,

Një siguri rrugore e stabilizuar është sfidë e përbashkët e jona, e ligjvënësve, qeveritarëve, mazhorancës dhe opozitës, e gjithë qytetarëve.

Asnjë qeveri dhe opozitë në botë nuk dëshiron dhe nxit vdekjen nën rrota e për shkak të rrotave.

Në përputhje me funksionin tuaj kushtetues, ju keni për detyrë të siguroni dhe mbroni jetën, shëndetin dhe pasurinë e shtetasve të cilët i qeverisni dhe u kanë dhënë votën.

Ju e keni hequr imunitetin kushtetues në Kuvend, por në mënyrë paradoksale ju vazhdoni të mbani, jo ligjërisht, një imunitet rrugor me eskorta të dhunshme dhe me “semaforë me dritë jeshile”.

Ju kujtoj se ky “imunitet” nuk është i barazvlefshëm më sigurinë rrugore.

Përvojat e hidhura dhe tragjike, me gishtërinj të thyer paraardhësish, me aksidente të shkaktuara më vdekje po nga paraardhësit, vdekje në rrugë e deputetëve, prefektëve, ish- ministrave, familjarëve të Kryetarit të Shtetit, e shumë personave me individualitet dhe personalitet të spikatur, tregon se në trafik jemi të gjithë të barabartë; përdorues të rrugës pa imunitet dhe pa hierarki.

Ngjarja tragjike e Shkodrës, për nga sasia e dhimbjes prej humbjes së pesë jetëve, e tejkaloi 21 Janarin. Çdo vit në rrugët tona realizohen më shumë se njëzet e gjashtë “Gërdecë”!

Po rezulton se makinat po vrasin më shumë se një pushkë, se një mortajë, se një top!

Leja për të poseduar dhe ngarë një makinë është tepricë në liri. Në emër të jetës kjo “liri” duhet kufizuar me një ligj të drejtë dhe të rreptë. Duhet orientuar dhe kontrolluar me një veprimtari ekzekutive intensive, gjë të cilën e keni Ju për detyrë.

Duke e konsideruar veten si një zëdhënës i kolegëve të mi, inxhinierë e teknicienë të transportit rrugor, të industrisë automotive, të menaxhimit dhe ekspertizës së trafikut, pa rol protagonisti e flamurmbajtësi, ju bëj thirrje që Sigurinë Rrugore ta vendosni si prioritet të prioriteteve në punën tuaj legjislative dhe qeverisëse dhe shpreh njëkohësisht gatishmërinë për të kontribuar me përvojën, idetë dhe veprimin tim aktiv në çdo pozicion ku jam kompetent dhe ju të keni nevojë.

“Arroganca” shqiptare

20:15 Blog

Mirëbesimi i mirëqenë historik

19:39 Blog

“Xhelati” që vriste natën, sot “Doktor” që të qan ditën…

17:38 Blog

Modele të mbrapshta

21:01 Blog

Riorganizimi i territorit: rast pas rasti dhe jo me kritere që mund të abuzohet nesër

20:55 Blog

Nga ofiçina e ndërgjegjes, në makinën politike

20:11 Blog

Mjedisi, midis interesit personal dhe atij kolektiv

19:53 Blog

Hijet e modeleve të këqija

19:44 Blog

Ra ky mort e u pamë... me SHBA

19:38 Blog

Të korruptuar, por heronj

19:36 Blog