Ç’na bëre Qebir?!

Nga Agim Jazaj

Miq të mi të vjetër dhe të rinj, lexues e dashamirës të dyfishtë, shprehën konsideratën e tyre rreth një opinioni publikuar ditë më parë. Madje disa lexues të vëmendshëm, brenda e jashtë vendit, në rrjetet sociale, kërkonin të korrigjohej një pasaktësi: Personazhi i njohur, Qebir Lika, ka ndërruar vendbanimin e mëparshëm dhe ka mbërritur tashmë në Vlorë. Ka zbritur nga lartësitë dhe është vendosur në buzëdetin. Ka marrë me vete edhe tufën e zgjebosur të dhive dhe qentë për zinxhiri. Ata bëjnë me dije, me koordinata të sakta, edhe stanin me tufën e tij, të ngritur në lagjen “Çole” të qytetit. Mirëpo një lexues tjetër sqaronte më shkoqur: Qebiri e ka shitur tek Beqiri tufën e zgjebosur të dhive. Duke e shtrirë arsyetimin e tij të përligjur: Tani zgjebja e dhive do të zërë edhe njerëzit. Dhe këmbëngulte se kishte parë një moment një zonjë, e cila e kishte hedhur në shesh mishin nga të kruarit dhe mjekja e lagjes nuk po i bënte dot derman. Na mungon vaksina e zgjebes së njerëzve- ore babam! Institucionet shëndetësore nuk kanë vaksinën as për malarien e tashmë duhet dhe vaksina e zgjebes së dhive –rënë mbi njerëzit. Ai jepte të dhëna të rrepta, me koordinata, edhe stallën e ngritur brenda lagjes, kullotën e tufës: lulishtet, barin e mbjellë dhe pemët nga ndërmarrja përkatëse, në qytet… Dhitë e dhentë me kakërdhitë “bëjnë spërkatjen“ e udhëve!

Nuk u zura besë dhe nuk dua t‘u besojë zërave të tillë. Meazallah! Nuk ka mundësi. Kur shoqëria shqiptare kërkon të hyjë në Europë! Me dhentë e dhitë e vërshuara nëpër sokaqet e qyteteve! Do futemi me “traditën, identitetin“ tonë! Po e vërteta është kokëkrisur, kokëforte. Madje dhe kur e thonë njerëz të besueshëm, që nuk e kanë dëgjuar, po e kanë parë me sy, nuk mund të dyshohet.

Këta e njohin nga afër Qebirin, po dhe të birin…

Zëra të besueshëm edhe brenda politikëbërjes qeveritare bëjnë me dije se së shpejti edhe për tufat e dhive, dhenve e qenve do të ngrihet një TACK-FORCË e serisë!

Burime të afërta dhe të besueshme lokale thonë se: Qebir Lika, i njohur për bëmat dhe gjëmat e tij, në mal dhe në fushë, edhe gjatë kohës së tranzicionit të pushtetit, në prag të zgjedhjeve të 23 qershorit ndërmori shumë aksione të guximshme dhe të leverdishme edhe në qytetin e Vlorës:

-Ndërtoi pa leje një shtëpi dykatëshe. Thonë se e legalizoi fët e fët, apo e ka në proces.

-Zaptoi me leje një institucion shtetëror -shëndetësor, dhe po rri brenda pa u qederosur për 7 palë qejfe.

-Shiti tufën e dhive të zgjebosura dhe bëri prokopi.

-Bleu një vend pune në CEZ, elektricist e po kapardiset.

Për besueshmëri ndaj eprorëve dhe për të zbutur faturën e kripur të blerjes së vendit të punës, u fuste poshtë dyerve fatura të panumërta afrofe, me disa zero nga pas, edhe aty ku nuk banonte njeri e nuk kishte fare energji! Thonë se me yryshin e tij ka futur edhe nëpër kasolle dhe shpella. Tashmë faturat afrofe të Qebirit janë futur në sistemin, allaqebir lika, sistemin allshqiptarçe…

Fatura e CEZ-ÇEKUT për qytetarët shqiptar është: “Titull Ekzekutiv”.

Njerëzit e thjeshtë dhe me mendje minimum, deri dhe të fushës së (pa)‘drejtësisë mbeten të shokuar nga absurdet shqiptare: Shteti nuk përfill deri më tani as Gjykatën Europiane të Strasburgut, qytetari duhet të zbatojë gjobat afrofe të Qebir, CEZ-it?!

Bekçinjtë, bashkë me batakçinjtë do të trokasin me faturat tallava- alla qebirëve në dyert e barkboshëve! Nga një llogari më këmbë, vetëm “borxhet”, gjobat e faturave afrofe të tipit Qebir Lika, thonë nga administrata e ditës në filialin rajonal, janë të listuar mijëra e mijëra debitorë shqiptarë, pa përfillur pallatet e ngritura përgjatë 23 vjetëve, të palidhur kontratat e ndërsjella! Kjo shifër bën të pamundur shlyerjen e tyre. Njerëzit e thjeshtë në bisedat e ditës llogarisin pamundësinë e shlyerjes dhe padrejtësinë, madje duke dhe përzgjedhur konvertimin me burg të faturave afrofe shumëzerore! Vendit do t‘i duhet ndërtimi i deri në 20- fishin e ngritjes së burgjeve! Të shlyejnë faturat e Qebirëve!

I dëgjuar dhe njohur për këto ynere, “mos të dalte nami se të del edhe syri”, Qebirit i faturojnë edhe ngjarjen taze, të këtyre ditëve:

AMANET, KRYEMINISTRIT- FATURËN AFROFE TË QEBIRIT

I moshuari, i shtrirë gati pa frymë në shtratin e urgjencës së qytetit, mbante shtrënguar fort në dorë një copë letër- ferman. Me gjysmë zëri thoshte: “Do më mbetet deramet. Nuk e takova dot një ditë kur shkonte më këmbë, rrugëve të Vlorës: Nuk do më gjej rehat shpirti. T’ia dorëzojnë sekretarkat- taka lartë!

“Ç’na bëre Qebir … Qebiiiir“!- mërmëriste i moshuari, shtrirë në shtratin e urgjencës.

Këto ishin dhe fjalët e xha Rrahmanit para se të ndahej nga jeta e të gjallëve…

Pensionisti Rrahman Haxhiaj, qytetar i vjetër i Vlorës, po dhe i apartamentit, ishte i larguar nga vendi mbi 15 vjet, i ndodhur si emigrant, në Itali. Vinte rrallë, shkonte dhe shikonte shtëpinë e katandinë, e merrte malli dhe për gurët. Shprehej me keqardhje në ambiente të ngushta: “Gjendemi më mirë në vendin e botës dhe më të dhunuar në vendin tonë“. Plaga e plumbit gjen kurim, po plaga e shpirtit s‘ka shërim. Xha Rrahmani erdhi më 23 qershor 2013 për të hedhur votën e tij të njohur publikisht për RILINDJEN. U rropat disa ditë sa gjeti vend votimin. Shpresonte të RILINDTE Shqipëria. Harmoni mbi tokë dhe rehati nën tokë- uronte i moshuar. Ato ditë me bastun në dorë, mbi peshën e moshës u ngjit për te apartamenti. Sa hapi derën e shtëpisë, e zuri shtëpia nën vete dhe ra përmbys. Gjeti poshtë derës mandatën: Faturën e dritave. me 200 mijë lekë, e formuluar: “KËRKESË PËRFUNDIMTARE PËR SHLYERJE DETYRIMESH” deri në 31 mars, kur jemi në qershor!

-Sikur të kem ndezur në shtëpinë bosh, pa asnjë pajisje brenda edhe ndonjë furrë gëlqere si ato në Krujë, nuk do të konsumoja kaq energji!

Me faturën në dorë, i ra damllaja në derë!

Gjitoni i tij, i ndodhur atë çast, bërtiti me të madhe: “Ndihmë”, “ndihmë”! Drejt pallatit u ngjitën edhe banorë të tjerë. Por edhe druheshin ta zinin me dorë, t‘i jepnin ndihmë. Bela kjo punë. Sepse mund të vinte policia dhe të dallonte shenjat e gishtave në trupin e tij dhe të konkludonte: “Vrasje me paramendim, ose tentativë për grabitje“!

Dhe do të përfundoje pas hekurave!

Dikush e mori guximin. Ndaluan një makinë në rrugë dhe e çuan krahë e kofshë në urgjencë, pa ndjenja.

-Tension i lartë- thanë personeli.

-I sëmuri mbante shtrënguar në dorë një copë letër. Dikush i‘a bëri me shenjë mjekut! Mendonte se mund të kishte ndonjë dhjeçe, “amanetin e fundit”- apo testamentin për pasardhësit. .

Mjeku e goditi lehtë në gishtat e dorës.

I hapi dorën dhe i mori letrën për ta lexuar!

Nuk kishte asgjë të shkruar…

Ishte faturë- gjoba me 200 mijë lekë!…

“Ç’na bërë Qebir! Qebiiir”…

Këto ishin fjalët e fundit të xha Rrahmënit.

Amanet kryeministrit të Rilindjes- Faturën afrofe të Qebirit…

Lufta me heronjtë

20:47 Blog

Shfryrje për të mbytur të vërtetën

20:45 Blog

Isa Mustafa duhet të japë dorëheqje

20:57 Blog

FIFA e trajton Kosovën sikur edhe BE-ja

20:52 Blog

Të lidhesh në Prizren

20:09 Blog

Shteti e Demokracia

18:12 Blog

Kur shkel betimin e Hipokratit

20:02 Blog

Maskimi patriotik i Kelmendit

20:01 Blog

21 Janari, qokat dhe drejtësia

19:37 Blog

Katër muajt e parë të Qeverisë së re

18:38 Blog