Te fundit
Gjermania mbështet iniciativën për hapjen e dosjeve. Brenda vitit edhe marrëveshja e pensioneve mes dy vendeve
13 Janar 2015, 19:10Sociale
TEMA
Shqipëria dhe Gjermania janë angazhuar të nënshkruajnë marrëveshjen e pensioneve për emigrantët brenda vjeshtës së këtij viti. Ministri i Mirëqenies Sociale dhe Rinisë, Erion Veliaj, dhe Sekretari gjerman i Shtetit në Ministrinë e Punës dhe Çështjeve Sociale, Jorg Asmussen, deklaruan sot se dy vendet do të nisin këtë javë negociatat për nënëshkrimin e marrëveshjes, e cila pritet të mbyllet këtë vit.
Ministri Veliaj e cilësoi këtë si një lajm të mirë për të gjithë emigrantët shqiptarë në Gjermani, si dhe konkretizim i bashkëpunimit të shkëlqyer mes dy vendeve. “Ky është një lajm i mirë për të gjithë ata shqiptarë, të cilët kanë menduar se puna e tyre në Gjermani nuk do të shpërblehej edhe me vitet e punës në Shqipëri. Do doja të inkurajoja të gjithe emigrantët shqiptarë, kudo ku jetojnë, të sigurohen dhe të mos punojnë në të zezë, në mënyrë që të përfitojnë nga marrëveshjet që ne po nënshkruajmë me vende të BE”, tha Veliaj.
Asmussen e vlerësoi si një bashkëpunim të frytshëm mes dy vendeve fillimin e negociatave për nënshkrimin e marrëveshjes dypalëshe për mbrojtjen sociale. “Shpresoj të bëjmë progres që kjo marrëveshje të nënshkruhet në vjeshtë. Bashkëpunimi në këtë fushë është një hap konkret se si mund të punojmë me një fryme të vërtetë europiane”, tha ai.
Nga ana tjetër, Asmussen preku edhe çështjen e hapjes së dosjeve në Shqipëri, duke ndarë eksperiencën gjermane në këtë fushë.
“Procesi që ne ndërmorëm ishte një ushtrim i dhimbshëm, por kombi gjerman përfitoi nga bërja e transparencës për çfarë kishte ndodhur nën diktaturë dhe e kapëm këtë mundësi historike që iu ofrua gjeneratës sonë. Tani ne jemi një komb më i bashkuar, se sa do të kishim qenë pa e kryer këtë process, dhe kjo ka ndihmuar dhe kontribuar për të ribashkuar qytetarët gjermanë pas një ndarje të detyruar. Dua t’ju inkurajoj të ecni përpara me këtë proces sepse vendi dhe njerëzit tuaj do të përfitojnë nga rezultatet e tij”, u shpreh ai.
Sipas ministrit Veliaj, në Shqipëri ka nisur një debat i shëndetshëm për hapjen e dosjeve sipas modelit gjerman dhe se mazhoranca ka vullnetin e plotë për të miratuar një ligj për hapjen e dosjeve. “Ky është një ligj i cili nuk ngjall vëllavrasjen, nuk ushqen tension social, por e maturon kombin, sjell transparencë dhe i bën mirë shoqërisë”, deklaroi ai.
Veliaj dhe Asmussen diskutuan edhe për thellimin e bashkëpunimit midis dy vendeve në fushën e punësimit dhe studimin e mundësive për certifikimin e punonjësve me certifikata që njihen edhe nga vendet e BE-së. “Vetëm nëpërmjet certifikimit dhe bashkëpunimit midis zyrave përkatëse të punës do të mundësojmë kontrata punësimi për qytetarët shqiptarë në Gjermani”, u shpreh ministri Veliaj.
Asmussen vuri në dukje se të dyja vendet po bashkëpunojnë për të thelluar mundësitë e aksesit në tregun gjerman të punës, jo vetëm në shërbime më të mira, por edhe në njerëz. “Ky bashkëpunim në fushën e punësimit është shumë i mirëpritur”, përfundoi ai.
Negociatat midis Shqipërisë dhe Gjermanisë për nënshkrimin e marrëveshjes për mbrojtjen sociale do të nisin në datën 19 janar, me takimin e parë të grupit teknik që do të negociojë kushtet e saj./j.h
3 komente në “Gjermania mbështet iniciativën për hapjen e dosjeve. Brenda vitit edhe marrëveshja e pensioneve mes dy vendeve”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Me e bukra eshte se sipas disa burimeve iniciativen nuk do ta mbeshtesin vete deputetet e PS ?
po cna interesojne dosjet ne mer daj? sikur nuk e dime ne se nga na erdhi e keqja?sikur nuk i njohim politikanet tane? ne or mik nuk e duam transparencen mbas 150 vjetesh demokraci..nqs shqiperia donte te bente nje shtet demokratik gjene e pare qe duhej te bente ishte transparenca e figurave politike,por ne shqiperi nuk u nderrua regjimi me revolucion por u nderrua ‘mjeshterisht’ prej dinakut r alia…
te them te drejten me vjen shum keq per prinderit dhe gjysherit tane qe dalgadale po ikin nga kjo jete dhe nuk pane nje dite demokraci…me regjimin e enverit u rriten e u robetuan e me regjimin e ish bllokmeneve po vdesin..
Nuk e sheh aty e kemi mendjen ne te dosjet, s’po na ze gjumi.
Thuaj te bejne ndonje gje per popullin, si pensionet a mundesi punesimi sic ka Bosnja e Serbia me Gjermanine, po per dosjet s’jemi keq.
Ne nje grusht popull jemi, sikur nuk i dime biografine njeri-tjetrit ne?! Apo te rrine te gjithe neper kafe e te bejne lloqe kavaje duke komentuar dosjet pastaj.