Një grua për Ketin e Shkodrës

Fizikante, shkencëtare e profesoreshë, deputetja Mimoza Hafizi flet për dashurinë e saj të madhe individuale dhe politike: Shkodrën. Qyteti i madh i veriut i ka dhënë asaj mandatin e deputetes nën siglën e të majtës dhe ajo beson se ka ardhur koha që ai të ndryshojë. Duke nisur që me këto zgjedhje lokale, me një kryetare të re bashkie si Keti Bazhdari. Ajo thotë se Keti është “…një vajzë shkodrane me profil të lartë menaxhues, që i jep sigurinë të gjithë ofertës sonë për Shkodrën”. Hafizi gjithashtu flet për të gjitha epërsitë e kandidates së majtë, të mbështetur nga PS, LSI e gjithë partitë e tjera të koalicionit të tyre, por shton edhe se fakti që Keti vjen nga shtresa të përndjekurve politikë, i jep kandidaturës së saj një përmasë edhe më të gjerë sesa vetëm e majta dhe e djathta.

Hafizi është e bindur se Shkodra meritojn shumë më shumë. Sipas saj, Shkodrës: “…nuk i mungon asgjë ! Duhet veçse një politikë që t’i hapë rrugë energjive pafund e talentit të shkodranëve »

 Nga Lorenc Vangjeli

Fushata është në kulmin e saj dhe kësaj rradhe, një nga kulmet realë të saj duket se ndodhet në Shkodër. Çfarë ka të veçantë qyteti që ju dha mandatin e deputetit?

Ka zonjat shkodrane me zërin ku kumbojnë nazet e del fjala e butë plot me ledha. Ka burrat shkodranë me gazin e zhurmshëm, në garën për barcaletën a bejten më të fortë në tavolinën e darkës me miqtë. Ka një vibrim muzike që endet ditënatë në ajrin e qytetit, në ajrin që fryn nga alpet e shkrihet me lagështirën e liqenit, Bunës, Drinit e Kirit. Ka lulet që i vënë emrin çdo stine që vjen e ikën pambarim, poshtë bedenave të kalasë Rozafa. Kjo është përjetësia e Shkodrës, të tjerat lindin e ikin zakonshëm, si në çdo qytet tjetër të këtij planeti.

Po kërkohet që Shkodra të qeveriset në nivel lokal nga e majta. Çfarë oferte afron më shumë ajo, ndryshe nga e djathta që tradicionalisht e ka konsideruar këtë zonë si një bastion të sajin?

E majta ku unë bëj pjesë kërkon ta meritojë qeverisjen lokale të Shkodrës, tashmë një bashki i madhe ku qyteti përbën vetëm gjysmën, një bashki që fillon nga buzëdeti i Velipojës, ngrihet mbi liqen e lumenj e mbaron në alpet mahnitëse të Thethit. Kemi paraqitur një program ndryshimi e zhvillimi të ndjeshëm, me objektiva të qartë e bindës. Kemi ndërtuar një ekip të mirë, të mishëruar në listën e këshilltarëve bashkiakë, njerëz të spikatur e profesionistë, emra qytetarë, me përfaqësim të plotë gjeografik. Konkurojmë me një kandidate, zonjën Keti Bazhdari, vajzë shkodrane me profil të lartë menaxhues, që i jep sigurinë të gjithë ofertës sonë për Shkodrën. Edhe ne deputetët kemi qenë gjithë kohën e fushatës pranë njerëzve, duke dhënë besimin për mbështetje nga ana e mazhorancës.

Kurse e djathta, më shumë se të administrojë qytetin, synon të ruajë pushtetin lokal si një rutinë 25 vjeçare, rutinë në fakt e konsumuar e ndryshkur keq gjatë viteve e dekadave.

Çfarë është bërë keq, sipas jush në nivel politik dhe të administrimit në qytet dhe cilat janë nevojat më emergjente të tij?

Politikisht i është fryrë përçarjes, frymë që ka dëmtuar ecjen përpara të qytetit. Eshtë krijuar një kastë e pandryshuar pushteti, që ka degraduar besimin e qytetarëve te bashkia. Institucioni ka funksinuar minimalisht, më shumë ka fjetur i qetë në gjumin e hipnotizuar nga siguria që votat nuk ia luan kush, në gjumin e mungesës së konkurencës që zhbën çdo rregull demokratik.

Emergjencë në qeverisjen e Shkodrës është transparenca e konkurenca në qeverisje. Eshtë politika larg ekstremizmave të pabukë.

Çfarë i mungon Shkodrës për të rimarrë shkëlqimin e dikurshëm; në fillim të shekullit të shkuar quhej porta hyrëse në Evropë?

Nuk i mungon asgjë ! Duhet veçse një politikë që t’i hapë rrugë energjive pafund e talentit të shkodranëve.

Në garë janë dy zonja për postin e kryetares së bashkisë. Si do t’i gjykonte ato një zonjë tjetër si ju?

Keti e Voltana i përkasin një brezi më të ri se unë, por vërej se ndryshimi mes nesh nuk është aq i ndjeshëm. Të tilla kanë qenë nënat tona, të tilla besoj se janë edhe vajzat tona, ndonëse koha sjell gjithsesi të renë e vet edhe tek vajzat e Shkodrës.

Te Keti çmoj shumë forcën e veprimit, vendosmërinë për të përmbushur projektet e veta, përvojën e gjatë menaxhuese e njohjen shumë të mirë të terrenit ku punon, të biznesit e detajeve të tij. Këto cilësi ajo do t’i sjellë edhe në qeverisjen e Shkodrës. Keti vjen nga një familje e persekutuar, rritur në diskriminimin e pamëshirshëm nga sistemi i egër diktatorial. Kurajo e saj për të dalë mbi sfidat e jetës e bën të veçantë në të gjithë grupin e kandidatëve që Aleanca për Shqipërinë Europiane ka paraqitur para shqiptarëve në këto zgjedhje lokale.

Pse mendoni se Keti Bazhdari do të fitojë në Shkodër dhe a mendoni se një sukses individual është kusht i domosdoshëm për sukses edhe në një nivel të tillë?

Besoj se shkodranët do të çmojnë me votë forcën, vendosmërinë, përvojën e karakterin luftarak të Ketit. Shkodranët do të shohin tek Keti veten e vet, do të shohin gjithësecilin prej nesh që punon nga mëngjezi në darkë për begatinë e familjes. Të rinjtë do të shohin shoqen e shokun që ia del të përmbushë objektivat e jetës. Burrat e gratë do të shohin njeriun me përvojë në betejat e jetës, të cilit mund t’i besohet administrimi i qytetit. Prandaj Keti do të fitojë në Shkodër.

Suksesi individual është padyshim kushti i parë për të fituar besimin e njerëzve. Keti është modeli i suksesit individual. Prandaj Keti do të fitojë në Shkodër.

 Keti është kandidatja e përbashkët e një koalicioni shumë më të gjerë se koalicioni qeverisës i të majtës. Si reflektohet kjo në bashkëpunimin në fushatë mes PS-së dhe LSI-së si dy partitë kryesore të koalicionit?

Keti vjen nga shtresa e të persekutuarve politikë, e cila tradicionalisht ka mbështetur të djathtën, për arsye historike. Ky tipar i jep asaj një bazë shumë të gjerë përkatësie, përtej asaj çfarë ofron koalicioni mes dy forcave të majta.

PS dhe LSI janë gjithësesi baza e suksesit në këto zgjedhje në Shkodër. Janë dy forca politike që japin sigurinë e fitores, forcën e organizimit, masivizimit e stabilitetit në fushatë.

Ka pasur shumë akuza, kryesisht për Shkodrën për shitjeblerje vote, cili është opinioni juaj për një akt të tillë kriminal e të dënueshëm?

Kam vetëm neveri dhe zemërim për çdo tentativë cënimi të votës së shkodranëve Shteti, qeveria, strukturat, çdo qytetar, duhet të jenë aleatë për të ruajtur votën nga deformimi. Vigjilenca e mprehtë dhe vullneti i fortë për të ruajtur zgjedhjet e 21 qershorit nga çdo lloj degjenerimi është kontributi që secili jep për qytetin e vet. Kush nuk e bën këtë detyrë qytetare, le ta mbyllë përgjithmonë gojën e të hedhë në kosh të drejtën e vet të fjalës, e të drejtën e vet të protestës kundër varfërisë a papunësisë. E drejta e tij morale si qytetar ka marrë fund !

Javanews.al

Nafta vendase: Rruga “e dyshimtë” nga nëntoka në automjet

20:38 Politika

Mesazhi i Veliaj në Farkë: Edhe një votë sjell ndryshimin, ndaj kemi edhe 7 ditë kohë për të dalë të gjithë në votime

19:21 Politika

Qeparoi, një transformim i pabesueshëm në prag të sezonit (VIDEO)

18:26 Politika

SHBA bëhet gati për luftë

17:50 Politika

Mesazhi i Magna Carta-s për Shqipërinë e sotme

17:18 Politika

Luan Rama i përgjigjet me letër të hapur Patozit: E ftoj të denoncojmë zyrtarisht në Prokurori çdo provë që cënon procesin zgjedhor

16:27 Politika

Berisha shpërthen ndaj Kryqit të Kuq: Po shpërndan ndihma për të blerë vota për dyshen Rama-Meta

16:14 Politika

Alibeaj dhe Deromemaj vijojnë takimet elektorale

16:07 Politika

Kurdët rekrutojnë luftëtarë shqiptarë për të luftuar ISIS-in

15:47 Politika

Grisen posterat e Fredi Bejlerit/ PBDNJ: Akte vandalizmi

14:59 Politika