Egjipti do të spostojë kryeqytetin 45 kilometra në lindje të Kajros, në një qytet të ri të ngritur nga themelet që mendohet të jetë funksional nga viti i ardhshëm.

Edhe Indonezia shpalli planin për të lënë Xhakartën si kryeqytet e për të ndërtuar një të ri në mes të xhunglës në krahinën e Borneos.

Por përveç mbipopullimit, sikurse edhe Kajro, Xhakarta rrezikon edhe të zhduket pasi po zhytet në det me shpejtësi.

Ndërtimi i një kryeqyteti nga e para nuk është një lajm i ri, pasi shumë shtete përgjatë historisë e kanë bërë, mes tyre Brazili, Kanadaja, Shtetet e Bashkuara dhe Australia.(a2)

Brazilia, kryeqyteti i Brazilit. Ndërtimi filloi në vitin 1950, edhe pse ideja për të spostuar kryeqytetin nga Rio de Zhaneiro, më në qendër të vendit, u sanksionua në kushtetutë që në vitin 1891.

Valeta, kryeqyteti i Maltës. Më i vogli në Europë, i ndërtuar në vitin 1565, pas Rrethimit të Madh të Maltës. Qyteti ka marrë emrin e Mjeshtrit të Madh Jean de Valette.

Kanberra, kryeqytet i Australisë. Në vitin 1911 nisi një konkurs për dizajnin dhe ngritjen e kryeqytetit të shtetit kontinent. Transferimi i statusit kryeqytet nga Melburni u bë në vitin 1927.

Uashington DC, kryeqytet i Shteteve të Bashkuara të Amerikës. Kongresi amerikan vendosi të krijonte një territor që nuk i përkiste asnjë prej shteteve, të quajtur Distrikti i Kolumbias, në vitin 1790. Qyteti mori emrin e Presidentit George Eashington dhe ishte vetë ai që dekretoi projektligjin.

Otava, kryeqytet i Kanadasë. Para se të emërohej kryeqyteti i kolonisë britanike të Provincës së Kanadasë në vitin 1857, Otava ishte një qytezë e vogël. U zgjodh për faktin e vetëm se vendndodhja ishte mes zonës anglishtfolëse dhe asaj frengjishtfolëse.

Nju Delhi, kryeqytet i Indisë. Në vitin 1911, Mbreti Xhorxhi V, asokohe Perandor i Indisë, deklaroi se kryeqyteti i territorit të sunduar nga Anglia në periudhën 1858 - 1947 do të spostohej nga Kalkuta në Delhi. Themelet e një qyteti të ri, Nju Delhit, u ngritën rreth 5 kilometra në jug të qytetit ekzistues dhe përurimi u bë në vitin 1931. Sot e kësaj dite, Delhi i vjetër dhe i ri janë të ndarë. Ndërsa në të gjithë territorin, të quajtur zona metropolitane e Delhit, banojnë 16 milionë persona.

Islamabad (qyteti i Islamit), kryeqytet i Pakistanit. Zëvendësoi Karaçin në këtë rol në vitin 1963, pasi u ndërtua nga e para për tre vite. Me një popullsi prej 1 milionë banorësh, Islamabad është qyteti i nëntë më i populluar në Pakistan.

Abuxha, kryeqytet i Nigerisë. Zëvendësoi Lagosin në vitin 1991. Shteti afrikan donte të krijonte një kryeqytet që të përfaqësonte neutralitet dhe për këtë arsye u ndërtua në zemër të vendit, me një klimë më të freskët se sa Lagosi.

Gaberones, kryeqytet i Botsvanës. U shpall i tillë në vitin 1965, një vit para se vetë shteti të deklaronte pavarësinë nga Britania e Madhe.

Naypyidaw, kryeqytet i Mianmarit. Zëvendësoi Yangonin në vitin 2006, duke u bërë shpejt shtëpia e 1 milionë personave.

Lima, kryeqytet i Perusë. Themeluar me emrin Qyteti i Mbretërve në vitin 1535 nga pushtuesi Francisco Pizarro. U zgjodh kryeqytet për shkak se ishte pranë bregut dhe rrjedhimisht më afër Spanjës. Mbeti i tillë edhe kur shteti mori pavarësinë nga Spanja në shekullin XIX.

Nouakchott, kryeqytet i Mauritanisë. Një fshat i vogël peshkatarësh, u shpall kryeqytet në vitin 1960 kur vendi mori pavarësinë nga Franca. Edhe pse fillimisht qyteti u ngrit për të mbajtur vetëm 15000 banorë, sot aty jetojnë 1 milionë vetë.

1 komente në “FOTOT: Të ndërtuar nga themelet për të qenë kryeqytete”

mik says:

27 Shtator, 2019 14:19 te 2:19 pm

Te gjithe keto kryeqytete, ne mes te tyre edhe te botes se trete, duken ma te bukur se Tirana !!!!

Përgjigjjuni