Te fundit
Ndalimi i vizave të emigracionit nga SHBA burimin e ka në Tiranë
16 Janar 2026, 09:10Blog
Nga Thoma Gëllçi
Vendimi i Departamentit Amerikan të Shtetit për të pezulluar përpunimin e vizave emigratore për 75 vende, mes tyre edhe Shqipëria, u shoqërua me një arsyetim që tingëllon i dyshimtë: emigrantët nga këto vende “marrin ndihma sociale në nivele të papranueshme për popullin amerikan”. Një fjali e tillë, e servirur pa asnjë shënim shpjegues, pa asnjë burim dhe pa asnjë ndarje të qartë statistikore, është propagandë.
Në datën 4 janar të këtij viti, presidenti Trump publikoi në Truth Social një listë me kombe që, sipas tij, “jetojnë me welfare”. Shqipëria ishte aty me shifrën misterioze 41.3 për qind. Askush nuk e di ende çfarë përfaqëson kjo shifër: emigrantë të sapoardhur apo qytetarë amerikanë me origjinë shqiptare? Përfitime legale apo abuzime penale? Ndihma të përkohshme emergjente apo skema të plota sociale? Nga cila databazë u morën këto të dhëna? Cila agjenci federale i raportoi? Heshtje absolute.
Në Shtetet e Bashkuara ekzistojnë institucione që prodhojnë statistika të imta: Census Bureau, Department of Homeland Security, USCIS, HHS, Social Security Administration. Asnjë prej tyre nuk publikon raporte që ndajnë përfitimet sociale sipas kombësisë së emigrantëve në këtë mënyrë politike dhe stigmatizuese. Me aq sa kam kërkuar unë, asnjë agjenci federale amerikane nuk ka raportuar ndonjë të dhënë të tillë.
Lista e 75 vendeve ka një tipar të përbashkët: shumica janë vende që Trump i ka etiketuar më parë si “shithole countries”. Somalia, Haiti, Eritrea, Irani, etj., vende që për vite me radhë janë parë nga administratat trumpiste si problem gjeopolitik, kulturor ose elektoral. Këtu kemi të bëjmë me një logjikë selektive politike, ku nëse vjen nga një vend i varfër ose i brishtë institucionalisht, konsiderohesh potencialisht barrë. Welfare-i shndërrohet kështu në alibi morale për një vendim që në thelb është politik, elektoral dhe simbolik: t’i thuash elektoratit se po “mbron pasurinë amerikane” duke mbyllur dyert për ata që po e grabisin atë.
Por Shqipëria nuk ndodhet rastësisht në këtë listë. Ne jemi sot vendi me numrin më të lartë të azilkërkuesve në Evropë në raport me popullsinë. Një vend pa luftë, pa katastrofa natyrore masive, pa regjim totalitar klasik, por me një eksod masiv. Ky realitet flet më shumë për dështimin e politikave tona të brendshme sesa për ndonjë paragjykim amerikan. Kur qytetarët ikin në numra biblikë nga një vend që në letra quhet “demokraci në tranzicion”, problemi nuk është Amerika, por Tirana.
Administrata Trump sot nuk sheh qytetarin shqiptar si individ, por si pjesë të një mase që kërkon azil, që troket në dyert e welfare-it dhe që shfaqet në statistika të mjegullta. Kjo është padrejtësi, por edhe pasojë direkte e politikave që kanë prodhuar dëshpërim, varfëri dhe mungesë perspektive në Shqipëri.
Pezullimi i vizave emigratore nuk i ndëshkon abuzuesit, ata tashmë janë brenda sistemit, por familjet që presin bashkimin familjar, profesionistët që kanë ndjekur çdo rregull ligjor dhe njerëzit që nuk kanë kërkuar kurrë ndihmë sociale. Në emër të një shifre pa burim, mbyllen dyert për mijëra histori individuale.
Ndihma sociale nuk është shkaku. Në Tiranë duhet të pyesim veten se çfarë po bëjmë që Shqipëria të mos shfaqet më në këto lista turpi. Shpresa në Shqipëri nuk po shuhet rastësisht, por po mbytet çdo ditë nga një sistem që prej 35 vitesh riciklon të njëjtën kastë politike, të njëjtat fytyra dhe të njëjtat mekanizma pushteti. Demokracia reale ka mbetur slogan, jo përvojë qytetare. Rotacioni politik është bërë pothuajse i pamundur, zgjedhjet kontestohen rregullisht dhe nuk njihen nga palët, ndërsa raportet ndërkombëtare flasin çdo vit për të njëjtat plagë: institucione të dobëta, kapje të shtetit, korrupsion sistemik dhe drejtësi selektive. Në këtë mjedis, qytetari nuk sheh më ndryshim si rezultat vote, por vetëm si rezultat emigrimi.
Dhe si të mos ikin të rinjtë, kur jetojnë në një vend që mbytet sa herë bie shi, ku bujqësia dhe blegtoria janë shndërruar në dekor statistikor ndërkohë që tregjet mbushen me produkte importi, ku prodhimi vendor po vdes dhe shpresa po eksportohet bashkë me rininë? Ky nuk është thjesht dështim ekonomik, por dështim moral dhe politik. Është ky realitet i brendshëm, jo welfare-i amerikan, që e shtyn Shqipërinë drejt listave të turpit dhe qytetarët drejt dyerve të mbyllura të botës.
4 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Mire shqiptaret e shqiperise e ka fajin politika,po per ata te Kosoves, Maqedonise, Malit te zi? Edhe ata u denuan nga qe kane numur te larte shqiptaresh qe presantohen me pashaporten qe kane. Duhet ta pranojme: Shqiptaret jane nje popull pa lyre, lypes, te pa afte, servile, qe historikisht i kemi sherbyer te huajit, pra shkurt: Popull kot.
I sakte
Ështe me të vërtetë një analizë e një partiaku a hallexhiu politik se sa i një intelektuali për të cilin kam patur respekt të madh. Shpipëria ka 35 vite në të ashtuquajturin tranzicion dhe në këtë ndërkohë SHBA ka patur dhjetra presidentë Republikanë e Demokratë. Emigracioni në SHBA është i lashtë sa vet shteti. Emigracioni i Shqiptarëve drejt Amerikës ka qenë ëndërr, zhgjënder, por edhe i vërtetë. Sigurisht koha e presidentit Trump nuk ka shembull për këtë mohim të ndihmës sociale. Nëse fajin do ta kishte Shqipëria aj nuk do të ishte vend i hapur dhe e i bukur pët mbi 10 milion turistë në vit. Mediat më prestigjoze botërore e mburrin atë sa asnjë vend tjetër. Etja për emigracion është një e drejtë njerëzore . Ajo rritet pas çdo mundësie lirie. Është e turpshme të akuzosh Shqipërinë që duhet të ishte në nivelin ekonomik e ndihme sociale sa SHBA. PPK sigurisht nuk ka të krahasuar me të shkuarën. Niveli i mbështetjes për Shqipërinë në vitin 2026 sivjet arriti mbi 9 miliard dollarë. Ti zotëri mund të qeshësh e t'i quash gjë po gjë, por vendi rritet mes dhimbjesh të lindjes së një shteti të së drejtës. Ka politika që shpesh kuptohen , por nuk diskutohen. Deri vitin e kaluar ne fituam viza 10 vjeçare drejt SHBA. Për një vit u bëmë të vobegtit e botës? Mos u nxito, ish-drejtor!
Qe ne fillim ti e thua se ku i marrin te dhenat qeveria Tramp ku ne asnje agjensi qe merret me to nuk i paraqet.Pra amerikanet paragjykojnë,se te krahasosh Serbinë ku u zhvilluan gjithe ato demostrata,ku rinia serbe emigron njelloj si rinia jonë,me Shqiperine ku eshte vendi me i sigurtë ne Ballkan per nje amerikan dhe ka nje fare zhvillimi ekonomik,nuk eshte normale.Edhe qeveritar shqiptare por edhe mbare populli nuk kane treguar kurre shenja armiqesite me SHBA.Shqiptatet punojne ne SHBA,nuk flejnë nen ura,por punojne,te pakten te gjithe sa njohim dhe kur nisen per atje nuk shkon per pushime por per pune se atje nuk eshte si ne vendet europiane,atje duhet te punosh